Mara Novel : NÂ NGIATHAI MA Y

(Pazaona..)

Bo-2-na

“Lailai, kaw thyu bâ tyh khaw...siku kia â daih daihmâ bâ hih..nâ chhuah para khaw” tahpa ta a nô ta chôhkâ lâ tawhta avaw awsaona a thei patawnah ta a poh a bu ngâpa cha kaw thypa ta, a mo kaw padeih ta. A nahkao cha a chaih ngâkaw chypa vâta kaw chamaopa ta, chôhkâ lâ cha a nahkao chamaopâ laihna chôta ngai ta.

Chakoh meikhuh a khu ngâpa hryta sôphihta mei vaw hmô ngâpa, a nô kiah liana chata thlai a kei tyuhpa ta, “Ei nâ, ei nahkao hih eina chaih ngâkaw cha maw...a pasa dâh la” tahpa kaw chamao heih ta.

A nô chata, “Kha he keisaw, na paw kha maw...a ku pathla pasa tu tyh mâh my..tavia siku na kia chyta tilalôhpa ta cha nâ p’awna ta a pha h’aw bao na. Atanohla siku kiah chi ta, a phata ta na kei y khaw sy..siku na kiah lei khiahta la na viasanah ama cha thai chhu khai tlamaw na e” tahpa ta nahkao cha chamaopa ta.

Lailai chata, “Ei nâ, ei pâ hih kyh na pachâ vei mâ? Khazia maw eina pazei tyh tly?” tahpa ta a nô â kei hniepa ta a nô bâ cha kei patu ta.

A nô chata, “Na paw heta kyh a cha pachâ ngâsâ ha mâh my. Hawti dopa châ la, nôpaw palysa kawpa sawchapaw kaw châ la, tahpa a khohpa vâta mâh my a cha chhorei tyh bao” tah ta. Lailai chata, “Ei nâ, keila ei kaw pitloh ti ei pâ hawhta sahma doh rai rai vana” kaw tah heih ta. A nô chata, “A do, nâ la sahma rai rai doh kha y. Tawhta sahma moh chhao reih khao lah chi..hawtipa cha hawhpa reih beih vei ei” tahpa ta chakoh liata thothu cha a ku sâkha lâta kei chasôpa ta, a ku sâkha lâta Lailai ku cha chamao-chahlia ta.

A sawchapawpa hmialâ daihti awpa cha Khazohpa dei leipa ta cha pahno vei. A paw ma a kaw lyu ma, ahyma a kaw lyu aw?tahpa cha ahy hmahta rei thei vei ei. Châhrasala, nô a châna hawhta a maophaohna deikua patlô thei awpa ta Khazohpa lâta thlah a chhâ tyh. A chhôhmarupa liata a sawchapaw hmialâ daihti awpa ta a saduthliena deikua nô zydua ta ama pahnothaikhei chai thlyu aw.

Lailai siku kiah awpa ta a nô ta a pachhuahpanoh hai nona chata a paw my chareipa cha avaw di ta. A reikah leipa ta chakoh liata a tyuh thlâh ha ta. Lailai nô cha chhôhpadâhpa tawhta kaw puapa ta, “Ei Lai paw, pati nie sih châ..Lailai cha ei paniesa chhielie ha khaw..siku kiah khoh tlôh ta” tah ta. Lailai paw cha a reikah leipa ta a luh kaw chhipa ta, ama nô chhao moh hlei leipa ta a luh cha a pasa tah hmi kawpa ta kaw chamao ta.

“Ei Lai paw, na luh pasapa ma pua? Zâhnia na doh heih kha maw...tavia pati nie tua sihla Chhuakhu nônah pasapachhana cha kei hiapa lahvâna” tahpa ta Lailai nô chata pati nie cha tao para ta.

Cha nona chata Lailai viasanahzy chata siku kiah vaw hruapa ta okah liata ama vaw hâ thlâh ha bâ heih. Lailai cha chhôhpadâhpa tawhta kaw puapa ta, a nô nata paw pati nie ngâpa cha puasaipa ta, “Lailai, atanoh la siku lia va do kaw ma y. Tawhta na pheiky kha Ball a kei khaih khei khao kha y...nama bâ patawnah ta nâ vaw di pâ haw khaw” tahpa ta a nô ta a kaw awsao ngâpa chata a nah rai khai khao heih vei. Ama okah liata a viasanah hmi a hmô hapa vâna chata khizaw thiehpa liata pahrâ ha heih ta. Thapawh kawpa ta a viasanah kiah liata siku ngaipa ta amâ thao ha heih.

Ama siku he ama khih liata su â ryh kawpa, tlâh byuhpa, thokô hluh kawna su liata a ypa châ ta. Nohpi daihti liata chhochhi cha satlia nata laihsazy charei chaina su, hawtipazy palao chaina su a châ tyhpa a châ. He siku liata a kiahpazy heta cha ama Headmaster Puhpa Rôkhâ moh pachyupa ta, ‘Rôkhâ Tlâh’ tlâ tah tyh ei ta. Satlia nata laihsa zy deikua ta cha, lôhraoh kawpa ta ama vâ-iapazy nahta daihti ama hmâna tyhpa a châpa vâta, ‘Lôraohna Tlâh’ ama vaw tah tyh.

Lailai-zy siku Headmaster, Puhpa Rôkhâ he siku kohki pahnie kawpa, pathichhiepâ thlâh hapa, pathaihna lâchhâh pachâ peimawh kawpa nata raihria pasâhsa kawpa he châ ta. Mychareih a siku hâtinah siku tlyhmia liata patlâhsapa ta, ama pheipazah tawhta ama laki taihta ama pathaih nata pathaih leizy phie a mohpasia hoh thlâh hapa a châpa vâta thotlâh khih ama châ tarawpa ta, a siku su nata chheipâh hleikhôta siku hawtinah chhao rai ama pathaih pathao kaw tyhpa a châ.

Lailai chhao py palih achu ha hra ta. Hawti hropazy hawhta siku kia paphasa ta, siku liata viasazy nahta daihti hmâpa ta, noh pakhôsapa cha a paphasa ngaita kaw. Anodeikua, ama Headmaster Puhpa Rôkhâ deikua ama viasa sahlao ta ama ngiaroh kaw tyh. A chhâpa cha, pathaihna pasâhsatu leipa âmo châta cha pathaihna pasâhsa kawpa Headmaster Rôkhâ cha ama hmiahaopa la a châ ha.

Cha my chhao chata Lailai tah leipa a viasanah cha siku kiah awpa chhao lyu vei ei. A viasa hryta a lai pahlawpa, a pôhpa pahreih kaw tlôh ta a pachâna dua kaw tlôhpa, Lailai ta khodâh hawhta a pahiepahâ theipa Khailai cha a viahkao heihlâh a ki leipa ta, a mawzâ chhao cha â kholeipa dei châ leipa ta, a ‘lasti’ â dao ngaita kaw. Ama ‘Form’ chaopasy pachhopa a châ hapa bao hnaihta a ngialy râh kawpa nata a pheiky pua kawpa cha â tla ngaita kaw. Khailai hawhpa pyly ta khatinorai ta Headmaster Rôkhâ ta a hrie ngâthlâh hapa, Chhuakhu chhao cha noh hro hawh pyly ta pua kaw heih ta. A sâ cha nochhi nata notla, maw nata chhao ta â pachhaihpa ta, a ôhkhaih vo nata a rao vo cha ama rôh a â hlie kaw. A chaopasy cha a chai a laipâ hapa cha ma a châ ma, a ku sâkha lâta patupâ lai ta. A sahria hra cha a paw lyu siena sahria ma a vaw phaoh ma, a ngialyh a za pazeipâ ngâkaw.

Ama viasa hryta a chavie chavâ chaipa, siku dyuchhai liata atyupa hlâta khôtho lâta ama paduasa hluh via tyhpa Laibei chhao chata pyly. Ano chhochhi he la Siku he tlâ kiah ta, khâpa ma amâ chu, khâpa ma pachutuhpazy ta ama reih, tahpa hlâta siku dyuchhai nata dawhkâhzy cha pasiepasâ awpa nata a khona su liana maihta a râhrei awpa hawhta a pachâ thlâh hapa, ama hyutuhpazy amâ zâ ngia no chhaota chhikao lâ tawhta lâpaw liata pavaw sâh dâh â zipa ta pyury a tao thlâh hapa, ama py liata chanô hluh viapa â tukhei hapa châ ta, siku he kiah leipa ta, Khailai reisa ta, ‘Siku lâ avaw charei tyh’.

Ama hryta Lailai a pathaih chai, eima tah tarawpa ta, a viasanah ama pua tu hapa vâta ano chhao he ‘pathaih chaipa’ tahpa tovyuh a to hrapa dei ta châ ta. Khailai hlâta pathaih via ta; Laibei hlâta bâhta â chavie via leipa deita a châ. Âmo sahlao he py palihna liata biehnei viapa deikua châ ei ta, ama py liata chanônah zydua pachasa paki ha ei ta; chapaw chhochhi cha reih hoh khao vei ei.

Cha hawhpa cha he ama thâtih eima rei ngâpa sahlao he châ ei ta. Heta mopa ta cha hâti sawnawhpa, uasakhi leipa deita he lyu ei ta. Anodeikua, ama siku pachutuhpazy nata Sunday siku pachutuhpazy palôhrupa rie deikua ama pathei ngaita kaw...

Siku ama kei tlô tawhta buakha ama y aw tahpa liata dawh vaw paropâ ha ta. Ama Headmaster Rôkhâ ta khôtho liata sômasih a chabapa ta a mohpasia pathao ha heih ei.

Lailaizy viasa sahlao cha a hnôh lâ a duahpa ta Puhpa Rôkhâ ta a hmiatlâh lâ tawhta a sômasih hmâthaipa chaluah chalâna chôta a za mohpasia lymâpa cha ngiaroh kawpa ta ama vaw hâ thlâh ha bâ.

Khailai chata a ngialy râh kawpa cha a pachih a kupazah liata pachhao parapa ta za chamaochamâ ngâkaw ta; Laibei chata a sâ cha a ku ta kaw pazupathâ para ta, Chhuakhu hmi tlai chana mopha. A pathai ma a pua ma, tahpa chhao pachâ khao leipa ma hmi he phaoh ta. Ama pachutuhpa sômasih cha kheita ma vaw hmiachhy sala a pasa lei chai aw, tahpa cha a pachâna liata za ypa a lyu kaw. Lailai chhao cha ngiarohna ta bie pyly ta. Zâhnia a nô ta a ngai a pasi nota a rao chata awpa  apasaih leipa kha â ngiapachhi pathao haw..

Siku hawti papalih rachhôh cha Headmaster Rôkhâ chata awhpapuapa ta, sômasih hmotaotheina padi awpa ta Siku Verandah liana chata siku hawtipa hropazy hmiachhypa ta paduasapa châ ha ei ta. Ahyzy ta ma chanah cha a kei pahlyh aw ei, tahpa cha Headmaster Rôkhâ biehneina deita a châ.

Headmaster Rôkhâ chata âmo sahlao cha âvaw hnia lymâ haw. A sômasihpa hiesawpa pyu cha nahthlie pha muarua leipa ta; siku hawtipazy cha pahneih ngâhpa tlyma, reikah pathlie ngâhpa tlyma y vei ei. Phie a chalih khai ha ei ta. Ahy hmahta reikah pathliepa rai y vei ei.

Ama ngiaroh dâh cha, Khailai reisa ta, “Hlo-ia lâta â lie ta a lyh syulyu h’awpa byuh achhih ta; a châ leipa chhaota tihu lâta a lie ta, ziza liata pai syulyu theipa châ sala aw!’...

Khailai yna dahdy avaw tlô haw. A sômasihpa cha a phei a zipa ta za chabapa ta, a mobaina chô tawhna chata Khailai pheipazah tawhta a kaw mo pathao haw.

Khailai cha a hu chhao so ngâh khao vei. A hna za thlaoh awpa cha khâchâ a hnapasu liata pakhâ ta; a ngialyh, a pachih ta a padâpa kaw hi pathao hapa, a rôh ualuapa lâta a kaw lie ngâpa cha a za hmô thei thlâh ha. A hmialâ daihti cha uahva â chhih lei kawpa vâta ngiarohna na ta bie leithei vei.

Headmaster Rôkhâ chata a mobaina chô lâ tawhna chata kaw moh laih lymâ ta..a mopadei tawhna chata Khailai cha pasâhsa muarua vei, tahpa â hno thlâh ha ta. Khahlâ tawhta pathaihna â hao kawpa Khailai châta cha Headmaster mopadei cha chi achhih pachaih ta, cha daihti liana tlai chata tihu lâta â lie thlâh ha sala aw!

 Khailai hnôhta liata a duahpa, Beilai cha y molo thei khao vei. A mo kaw paso, kaw padei, a lei lâ za moh, a vâ kaw-ua. Siku avaw kia chyta a hmia dâhdei chhao â pahlie leipa kha pei a tah pathao haw...

Cha hawhta chipa nata a chalyupa ta ama Headmaster mohpasiana tawhtapa kheita amâ boh rimâ aw?tahpa ta chihupa ta ama y hai nona chata, pachutuhpa hryta pakha chata, “Sir, na Office liata Siaha lâ tawhta MADC Education Department tuapa chyhsa pakha ta â châ hmô khoh” vaw tah ta. Headmaster chata Khailai a mohpasia ngâpa cha pahlie a heisaipa ta, a Office lâ cha ngai haw ta. Office lâ â ngia hlâ chata Pachutuhpa hnohna chata khâpa tlyma he chho ta, pachutuhpa chata ama py nochâchyu lâ â ngia awpa ta siku hâtipazy cha vaw chhopâ ha ta.

Lailai nata a viasanah huhiehna cha mâ ta chalei thei rimâ awpa châ vei. Âmo châta cha pachhana rônahpa tlai he châ ta. Ama Headmaster sômasih cha khatluta pasapa ma a châ, tahpa avaw padi chiehpa sai ama châpa vâta amâ lyna cha mâ ta chalei thei rimâ awpa chhao châ vei!

Siku hâtinah cha kalihpi tohpa ta ama py nochâchyu lâ â râ chhiechhu ei ta. Ama py yna a tlô tuapa maih chata, ‘Eima tlâh lia sâkhana’ tahpa ta amâ tyuna chyu tawhna chata pahniena hladyu ama kaw pathluah lymâ ha heih.

Lailai nata a viasa sahlaozy chata amâ tyu tyhna, a hnôhtlâh cha ngai para ei ta. Ama py liata riahpha chaipa ama châpa hnaihta ahy hmahta amâ tyuna cha chhu ngâh vei ei. A hnôhtlâh liata atyupa cha riahphana, a hmiatlâh liata atyupa cha riahchhiena tahpa biepipa khâchâ a vaotuhpa, Lailai nata a viasa sahlaozy châta cha a hnôhtlâh lâta atyupa cha pachutuhpazy ta ‘chhorupa nah atyuna’ tah ngâkaw hr’eisala, ‘Ama riahpha vâ’ tahpa hawhta khâchâ amâ pachâ.

Amâ tyuna ama kei tlô hlâna chata amâ tyuna liata siku hawti hmia thiehpa, pathaih pathao kawpa, ama khih hawti hropazy hmi a phaoh leipa, anodeita avaw tyuh thlâh hapa cha ama kei hmô haw. Ama viasa sahlao chata â moh ei ta, Khailai chata a sahria cha amâ tyuna dawhkâh liata za taikhypa ta, a chao ta cha hawtipa atyuh thlâh hapa cha kei chatôhpâpa ta kei chadie ta. Mohropazy chhao cha avaw tyuh lymâ hrapa ta, â cha-ie thei chaina hawhta amâ tyuh haw.

Cha chapaw hawtipa hmiathiehpa cha a reikah leipa ta y thlâh ha ta. A pasie deikua â chhuah lei hmi kaw.

Khailai chata, “Eimâ tyuna liata ahy atyuh tyh cha ta? A hmialâ a kei pasie tyh.”vaw tah ta. Cha chapaw hawtipa chata Khailai cha vaw mohpa ta, “Na chao ma nâ so? Ei tyuh tua chai. Na khoh khiah nâ a pasie tyh” vaw tah ta.

Khailai chata Lailai cha vaw mohpa ta, “Siku amâ thao tua no tawhta eimâ tyuna a châ hih. Eimâ cha-ie. A pasie tyh. Ei kha ei no” tah heih ta. Liahsa a ku chahupa ta cha siku hawti hmiathiehpa cha uahnaopa ta â duahpâ thlâh ha bâ.

Siku hawti thiehpa chata kaw mohpâ hrapa ta, “Na khoh khiah nâ a pasie bao. Nâma paw eih mâ?” kaw tah ta. Ama reikah a theipa siku hawti hropazy cha kaw pahnei hôlô ei ta.

Khailai chata, “Kheita â? Eima viasanah a tyuna, keimo eih a châ hih. Eina ngâh hra chi mâ?” tahpa ta a ku cha chaluah pahru pahrâ ta. A pôh pahreih thlâh ha hra tlô ta, cha chyhsa thiehpa cha heta mo ta khaipâ thlâh ha hra tlô. Avaw motuhpazy châta cha Khailai chata a hria tlamaw aw, tahpa ama vaw chi kaw.

Chapaw hawtipa cha a reikah leipa ta y thlâh ha ta.

Siku hawti hropa zy chata ama vaw moh khai thlâh ha bâ.

Khailai cha luh laipâ ha ta, chanônah ta ama vaw moh, tahpa a mochaki ta a kei hmôpâpa chhochhi cha, “A pasie tyh ei cha tah mâ? Eima py nah eimâ tyuna  a châ hih. Na ngâh mâ?” tahpa ta chapaw hawtipa hmiathiehpa cha a zâ khuhnaopa ta, a chachôhna liahsa a pa-ia khai thlâh ha bâ.

Lailai chhao cha y molo thei khao vei. Khailai zy cha avaw hniapa ta, “Khailai, a kei hnei via thlâh ha tyh. Â pasie khoh lei khiah tlâ eima chatôh papua khaw” tahpa ta avaw pahôpahâh ha hra. Laibei chhao chata a hmi liahsa a pachhie khaipa ta avaw mopâ ha bâ hra.

Cha nona chata pachutuhpa he a zâ ngia ta, ama zydua ta a kaw duahpa ta vaw chyh-eih ei ta. Pachutuhpa chata mohzy liahsa a paki khai tawhta, “Siaha lâ tawhta eima siku liata a kiah thiehpa hnei pi ta. He lâ kaw pua tua sala” vaw tah ta.

Lailai zy tlâh liata atyuhpa chapaw hawtipa cha a reikah leipa ta kaw puapa ta, Pachutuhpa kiah liana chata a kaw duah ta.

Pachutuhpa chata, “Ano he Simon Beipha châ ta. A paw he eima khih liata Health Worker ta a kaw ypa vâta eima siku liata atanoh tawhta avaw kiahpa a châ. Namâ vaw viasa hr’aw khaw” tahpa ta Simon cha âtyuna lâ a kaw tyuh awpa ta tah ta.

Simon ta amâ tyuhna avaw ngai nona chata Khailai chata âtyuna phie kei pho ta, Simon chata Khailai cha a ku ta vaw nâpa ta â zâ tyuh raruah haw. Khailai pachâdâh châ khao vei, eikhapina ta a chaotô cha kei pasie ta, Simon cha â pa-ipacha ha hrapa vâta Khailai chata chati pathlah thei khao vei.

Khailai cha a hiehâh ngâsâ thlâh ha ta. A kutô chahu khaipa ta, ‘Pachutuhpa a pua tita sy’ tahpa a mopâ thlâh ha bâ.

Ama pachutuhpa chata, “Vaw nahthlie khai ula, atanoh he Siaha lâ tawhta MADC Education Department liata biehneituhpa ta miah kaw tly ta. Atahmâ he eima Class liata avaw ngia ta, hiahrihna nano nanopa cha hiahrih ei ta, â do kawpa ta nata a pha kawpa ta namâ vaw chhy lymâ aw” tah ta. A rei khai raohpa chata paw pakha, thawhpâ thlâh hapa, rao-ao nata chôtho a kypa he a zâ ngia ta. A hmi cha tlaichhai a chhih kaw ta, a nônai hmi ta, chyhsa mo a la kaw hra.

Siku hawtinah chata a duah khaipa ta vaw chyh-eih ei ta. Atyuh awpa ta bie a pie tawh ei ta atyuhpa ta, “Nama siku he eikha ei kaw tlyna châ ta, Nama siku pathaih ta, nâmo chhao pathaih ei chi ta. Châ chhao nama thai kaw na ta ei pangiasa. Hiahrihna cha hiahrih eina ta, a padopa maih lymâ ei cha pie ei” tahpa ta Blackboard liana chata hiahrihna roh pathaopâ ha ta.

A hnôhtlâh lâ deikua ama ziza â hri ngaita kaw. Khailai nata Simon likah ziza cha mei châ mawh sala a ia pha kaw aw. Cha hawhna pyly chata Lailai nata mohropazy chhao cha amah mi liata pahneina hmi rai hmô awpa y vei. Hawti thiehpa, Simon cha hmialâ khâchâ â heih ta, mohropazy chata taorâh ama tawpâ thlâh ha.

Ama siku vaw tlytuhpa chata, “Um, he liata hiahrihna he kheita ma â roh? Vaw reih tua u” tahpa ta siku hawtinah cha vaw moh ta, â raohpa ta, “Father of the Nation ama tahpa kha ahy maw?” kaw tah ei ta. Hiahrihtuhpa chata, “Hiahrihna a padopa maih lymâ ei cha pie ei. Ahyma ei hiahrih tuachai vâ i?”tahpa ta a hnôhtlâh lâ cha kaw moh ta.

A hnôhtlâh liata a kâ chaipa liata a tyuhpa Lailai cha kaw dypa ta, “Nâ khaw avaw duah tua tyh khaw. Na moh vaw reihpâ la, hiahrihna he avaw chhy tua tyh khaw”vaw tah ta.

Lailai cha ama tlâh liata hawti thiehpa saita avaw pachâ thlâh hapa vâta vaw thei chho leipa ta, ama pachutuhpa chata, “Laitlua, avaw duah tyh khaw!” avaw tahpa cha a kaw theipa ta a kaw pahlawpâ ta. Siku hawtinah chata athata vaw pahneisao ei ta. Lailai chata a pahneisaotuhpanah cha za mohpâ ha tua heihpa ta, “Pâpuh khâpa maw?” kaw tah ta.

Hiahrihtuhpa chata, “Na moh ahy ma chuh?” vaw tah ta. Lailai chata a chatlie kawpa ta, “Laitlua” kaw tah ta. Hiahrihtuhpa chata, “Laibua mâ?” kaw tah ta. Siku hawtinah cha athata kaw pahneih heih ei ta. Lailai cha a hmia a chhie pathao ha bâ. Ao thathyu lei kawpa heta “Uh pâpuh” kaw tah ta.

Hiahrihtuhpa chata, “Khiahla, Laibua..” a kaw tah patawnah chata siku hawti hropazy cha athata kaw pahneih heih chaimâh ei ta, Lailai cha a lei lâ â khu thlâh ha bâ. Siku hawti hropazy chata, “Pâpuh, Laibua châ vei, Laitlua” kaw tah hôlô ei ta.

Hiahrihtuhpa chata, “Aw ei vaw thei chhei naw..khiah Laitlua, Ahyma Father of the Nation ama tahpa khaw na vaw chho tua tyh khaw?” vaw tah ta. Siku hawti zydua mohkhaoh chata Lailai cha ama tawpâ thlâh ha bâ.

Lailai chata cha hiahrihna cha thei beih leipa ta, pahno beih hra vei. A vâ lâ kaw moh, a lei lâ za moh. ‘Thai na’ tah awpa a nawhtawh tlô. A byh cha za chapao, a pôhpa cha liahsa a kaw sah papua ha. A luh kaw khaoh heih ta, dusawta heta, “Pâpuh pahno na” kaw tah haw ta.

Hiahrihtuhpa chata, “Khiah a pazipa khaw”, kaw tah heih ta. Lailai tawhta Khailai taihna chata ‘Pahno na’ ama kaw tah khai haw.

Ama pachutuhpa hmi liana chata, “Khazia ma â mo cheingei na hiahrih tly?” tahpa hmi he phaoh thlâh ha bâ ta.

A chhâ chaina liata Simon, siku hawti thiehpa cha a kaw duah ta, “Sir, Mahatma Gandhi” kaw tah ta. Hiahrihtuhpa chata, “Na pado. Nama pahno ma nâmo khaw? Father of the Nation cha Mahatma Gandhi a châ chuh naw. Na thai kaw, avy la na lymâ vaw la tyh” tahpa ta Simon cha lôthlôhpa sâthôh lymâ châta pie ta. Mohropazy cha hiahrih lymâ ha heih ta.

Lailai dei châ vei, Khailai nata ama viasa hropazy chata ama tlâh liata atyuh hrapa, siku hawti thiehpa Simon cha amâ chhyh thai lei via ha bâ heih. Siku hawti thiehpa ria ria lei ta, amâ tyuna phopâ, hiahrihna thaipâ a tahpa cha siku hawti hropazy ta âmo sahlao ama vaw ngia kaw tyhpa cha ano chata ama duasu a pho ha aw, tahpa ama pahno thlâh ha bâ. Ama py liata chanô hawtinah mopadei tawhna chata Simon cha ama pasâhsa pathao kaw, tahpa pahno thlâh ha bâ ei ta. Â ryh ma ryh vei ma, ama py liata chanônah mo lana awpa ta a chapawsa n’awpa ta thokô tawhta amâ zaw pathlahpazy, siku pâchhôh liata amâ bangiehpazy ta cha ama mo la khao vei, tahpa cha ama chhôhmaruh chaipa liata ama chi chaipa a châ ha bâ. Cha hawhpa zydua za pachâpa ta, siku hawti thiehpa, Simon ta ama lakho a chhu ha awpa cha, ‘A nawhtawh â chhih dâh rimâ chy’!

Siku bâ daihti vaw châ ta, Lailai nata a viasazy chata Simon cha siku laikathi liata amâ byh thlâh ha bâ.

Khailai cha a hiehâh hmi chai ta, Laibei cha a tu abyuh hmi chai. Lailai deikua cha a viasanah thapathyutuhpa he lyu ta, Khailai pasyu, Laibei pasyu, a tah ngâthlâh ha bâ.

“A zâ di tua sâ..he lia ei taikhypâ aw..eima tlâh liata miah avaw tyuchhu. Mama Kanadi miah pahnochhupâ” tahpa Khailai cha âhlaihlâ ngâthlâh ha bâ. Ziza liata a phei kaw thuah, a ku kaw hiesaw, ama yna kiah liata thokô cha a pyhpahly a tah ngâthlâh ha bâ.

Laibei chata, “Khailai, Mama Kanadi tah vei ei.Mahatma Gandhi ama ta” tahpa ta athata pahnei ta, Khailai chata, “Laibei iekhie, nâma he ma tlao ei cha taikhy tua tly” tahpa ta a hiehâhna cha â chiavo khei ngâkaw bâ.

Cha nona chata paw pakha, pathaih pathao kawpa he avy ta, Lailai yna dahdy avaw tlô na ta, “Ei saw sai, siku nama bâ ha mâ? Simon â za bâ mâh hra ma?” tahpa ta vaw hiahrih ta, Lailai chata, “Uh eima bâ ha. Simon, vaw kiah thiehpa kha mâ? A za bâ ngâkaw hra aw” thlai vaw tah ta.

Cha nona chata Simon chhao cha ama yna za tlô ta, a paw chata thlai vaw cha-aopa ta a di haw ei ta.

Lailai chata, “Simon paw a châ naw...a paw ta a dao hmi dâh!” kaw tah ta.

Khailai chata amâ dipa cha mohpazipa ta, “Mylâ tua kaw sâ. Ei taikhy pyly aw” tahpâ laihpa ta a di awpa ta Simon nata a paw lâthlôh a chhihpa cha a chhih haw hra ei ta.

(Pazao heih awpa..)