PIHNÔ, VAW TLÂH HA MA Y!
MGC Hospital ngaipa ta keih eima kaw chakâ tua no tawhta palôh liata ngiahrohna y chhielie ha ta. Tlâhleipa pasa taopa hmi mopa tluta rairupa he hluh tu thlyu aw vei..
MGC Hospital chô chai liata Deluxe Suite/Cabin/Room ochhi cha khótho lâ tawhta za mopa ta, thohna-O hropa ochhi hawhta tlâ châ hra ta, chyhsa sydie muarua vei. Hnatlâhna phapa zy hneipa ta, leithei leina vâta tah leipa liata la, ahyrai ta thohna-O he la tlaichhai muarua tu sai thlyu aw ma pi!
Châhrasala, atanohta thohna-O eima ngaina chhâpa deikua, Marasaw ta thlalôhna hnawh châta khâ eimâ vaw pahniehna tyhpa, a biereipa kawh kha deita hmahta Mara phopi dua ta nah eima pachôhna tyhpa; lei peirâh hawh tlupo ta pachâ thei awpa, Kupinainô laina râh, nohtla tiah leina râh liata khota laizaolao thei awpa, phasana dythapa ta eima hryta maniah pahrâlâh awpa atlyh viatuhpa, Mara satlia tlai hrochhôh kaolâhpa ta, Marapa chipho cháta atanoh taihta a pachâna nata thlahchhâna hmâhtuhpa Pihnô Vaili, tlâhleina vâta a zia thlâh hapa tly awpa ta eimâ thao hapa kha a châ!
 ziana chhôhpadáhpa chhôh eimâ zâ ngia hlâh tawhta, palôh liata pachâna nano nanopa avaw ngia ta. A tlâh pha nota Saikao liata Lorrainville lia cheingei ta a ku ei chalyu nopazy palôh liata avaw lâ ta.
Atanoh deikua chiehleina ta khôphei thyusai thei lei awpa ta khâchâ â ngieh hapa vâta, chiehlei kawna chôta rakhô tawhta miah avaw hmô thei lei daihmâ!!
Kô nata khih zy hluh ha hra ta, atahmâ cha liahsa a nôhrâh ha hra...
Á ziana rakhô ngaipa ta, chiehleina vâta a tha naizualuah kawpa hryta a ku kaw chaluahpa cha kei chyh-eihpa ta, a ku chalyupa ta, *Pihnô, na vaw laihsa kaw bâ dia!* kei tah taraw hr'aw sala; reihpapua thai lei awpa palôhrupa râh lâ deikua chihuna ta su to leithei vei!
A sabia ta a thatlôna viana daihti a kho khao hra vei sala, a veiseihna nata Marapa kyh a pachâna chata tha pie hnolopa ta, eima ku avaw chalyu hnolo lymâ! Chiehleina tiahpa ta rakhô thyusai awpa cha khatlu a tlaichhai hr'aw vâ!
Palôhrupa deikua thlahchhâkhei ta...a mahnô nata mahpaw Khazohpa hnohta tlâhna hiakheipa ta, miah chakuchavei chy awpa ta thatlôna pie awpa ta hiakheipa deita cha ei tao theipa châ tlô ta!
Pihnô, na vaw tlâh h'aw la y
