FIFA World Cup 2018 Russia Semi Finals Saichhieliena : FRANCE Vs Belgium

FIFA World Cup Semi Finals : FRANCE Vs BELGIUM, St.Petersburg Stadium, Russia at 11:30PM (IST) 

Belgium nata France he ei 19 avaw su ha ei ta; atazâ ta amâ hmiachhy awpa akhaihna tluta peimawhpa deikua châ tlâ thlyu aw vei.

Atakô FIFA World Cup 2018 Russia liata pangiasapa, Brazil, Argentina, Spain nata Portugal-zy tla ha ei ta. Atazâ liana heta Champion thei awpa duasu liata aduah rairiepa hawhta pachâpa, Football chhâthiehpa padua haituhpa, Belgium nata France zy cha Semi Final hmiatuapa liata amâ su aw.

France nata Belgium zy he amâ vaw khaih chiehna tawhta saipa chhaota Final liata tlao a su ei sala, Final mopha kawpa miah ama pamosa thei aw. Anodeikua Semi Final mopha kawpa miah pamosa pyly awpa ta a hnabeiseih ei sihla, France nata Belgium heta World Cup ngiatlâhpa miah ama siesai cheingei na ta a hnabeiseih â chhih.

Les Bleus nata atazâ ta ama hmiachhy awpa, Belgium he ei 19 avaw hmiachhy hapa ta, France heta pahniena ama to hluh via chy.

France heta ei 19 amâ vaw hmiachhy hapa liata Belgium he ei 8 vaw pahnie ha ei ta, Red Devils heta ei 5 pahniena ama vaw to ha hra. He râh mianopazy amâ hmiachhyna hnôh chaipa, kô 2015 liata pahniena a totuhpa deikua Belgium châ ei ta, he heta Belgium â châhtuhpazy thlah a palôh thlâh ha thei hra.

Anodeikuala tah heih tua sih, atliata tawhta Football khizaw liata laipady kawpa Belgium apielyuzie heta France he a patypamâ tu vâ tlyma?. France he FIFA World Cup 2018 Russia ama pathao tua no tawhta pangiasapa hryta alâluah chaipa châpa ta, atanoh taihta amâ pielyuzie mopa ta he he â do lymâ chypa alyu kaw. 

Group Stage liata ama group liata sâkhana châ ei ta, Semi Final ama kaw tlôna lâthlôh liata goal 9 khôpa ta, goal 4 ama pathlie. Kylian Mbappe châta cha he World Cup he khizaw hmiakô liata atheina nata thaina apalâhâhna hmeiseihpa châ pâ ta, Antoine Griezmann nahta goal thôh rairie khôpa ta, France apahniehna ama châ hra.

Atahmâ World Cup liata cha atazâ ta a su awpa, Belgium nata France akhaihpa tluta mo byuh achhihpa he y thlyu aw vei.

France ta ama hmiachhypazy tlahnaona kyh liata ama thai patluanazie ama palâsa nota, Belgium chhao he amâ khaihlâhpa defender zy châta cha mâchhiena khi ama châ pyly hra. England Captain pazipa ta goal khô hluh chaipa, Romelu Lukaku ta France diahsua (Defence) a chaphie thei ma? .

Lukaku deita he Belgium hmiatôhtuhpa nata France ta ama chi awpa châ heih leipa ta. Belgium châta tlyliah kito pathlâpazi theipa Kevin De Bruyne nata Eden Hazard zy he pakhâ ama ru kaw heih aw.

Akhaihna liata peimawh chaipa, goal khôna kyh liata chhao Belgium he chhie leipa ei ta, goal 14 khô hapa ta, akhaihna to liata goal 2.8 pangia lymâpa hawhta ama châ. He hawhta a châ nona heta Belgium heta goal 5 ama pathlie ha hra.

Atakô FIFA World Cup liata hmo ngiatlâh kawpa cha, Belgium he First Half hlâta 2^nd Half liata a pie pha via lymâ ei ta. He he France ta ama ngia kaw awpa â ngiah aw.

France chhao he goal pangia hawh pyly hra ei ta, ama zakha liata 33 cha minute 60 tawhta 75 chhôhta ama pangiapa châ ta, he he Belgium chhaota ama ngia kaw hr’awpa â ngiah aw.