International Champions Cup : Liverpool 4 - 1 Manchester United

CHICAGO: Liverpool ta 2nd half liata si 3 khôchhipa ta Pre-Season Tour, US liata ama hnei haipa liata 4 -1 ta Manchester United cha Michigan Stadium liata ama pahnie.

Liverpool ta ama lapangia thiehpa Xherdan Shaqiri chata Liverpool châta â khaih tua chaina liata goal rônahpa khô ta, International Champions Cup, Michigan zawpi 101,000 ta ama mona akhaihna liata â pie pha kaw.

Shaqiri, Switzerland he atliata Liverpool ta player 5 ama pangiapa hryta pakha châ ta. Liverpool heta Player thiehpa lapangiana châta 200 million pounds ($260 million US) ama hmâ.

He akhaihna liana heta Sadio Mane ta minute 28-na liata Liverpool hmia asahna penalty tawhta khô ta. He he Manchester United châta kô 22-pa midfielder Andreas Pereira ta minute 31-na liata free kick tawhta a zâ pasu ta, 1-1 a châ.

2nd half liata Jurgen Klopp nawhtazy ta akhaihna kohki viapa ta, Daniel Sturridge ta minute 66-na liata Liverpool hmia a sahna za khô heih ta. He he Shaqiri, kô 26 ta uhtheipa ta ball avaw piepa tawhta a pangiapa a châ.

Sheyi Ojo ta minute 74-na liata penalty tawhta za khô heihpa ta 3-1 a châ heih. Shaqiri ta â die lâ tawhta a pathluahpa ta Liverpool goal 4-na he za pazei pangia ta, Liverpool he 4-1 ta ama tlô hapa a châ.