MARA NOVEL : DÔTHÂ NATA NGÔKI (BO-3-NA)

Bo III-na

Hmypi thlâpâ khô daihmâ ha bâ ta, Pamih thlâpâ, nopi daihti âvaw liena noh awpa chhao avaw tlô daihmâ ha heih.

Lyuva khai ha ei ta, lyurai chahrâh viapa hria awpa ta lyuzy ama rao mâh leipa vâta paw satlia viapa nata satliapazy ta râh a khiepa ta sa a byhpa ta daihti pakhôsa ei ta. Ku phei chô viapa paw nata satliazy ta khih ama pahrâ hluh viana daihti châ ta. Nô nata laihsazy ta thohaw phaohpa ta, satlia ama ngâ viapazy nata amâ khy viapazy cha thohaw phaokhei awpa ta ama hruana daihti châ ta. O rai hriapa ta o chhôh ama tlôh viana daihti chhao a châ hra.

Lyuva khaina daihti he Khihhrâ khih satlia nata laihsazy rai tlyna daihti châ ta. Lyu rao avaw daih heih aw ta, chichei bia lo awpa buakheipa ta nata lyurai hriapa ta ama tlaitlao n’awpa noh avaw chhi heih aw. Cha tina chata chao patyuh hmâ leipa ta nohchareih raihriapa ta kopi kô kha ama pakhô heih aw.

Lyurai chahrâhpa hria awpa a y hmeiseih hlâta cha zilih phapa ry liata nohchhôh lâta laihsa sâhdaihpa nata viahdie a hneipazy, thaisa ngâpazy O liata satlia thokha amâ hmaohpakhy nota, vaih chaki lâta laiheihnô a tlaichhai viapazy chhao y pyly ei ta. Cha hawhta a châ nota, cha-yna daihti chhao pachâ leipa ta râh lâta daihti nata noh a hmâh hluh viapazy chhao ama y hra. Laiheihpaw nata pawhrâhpa thokha beihraih kiah liata noh nata daihti pakhôsa tyhpa chhao chie pyly hra vei ei.

A zo lâta laihsa siapa O liata laiphô chôpa amâ chie thlâh ha nota, khihsaw ta ama reipasipasuapa nata noh nata tlâh ta ama zawh hapa laihsa zy deikua hmiahi maolaopa ta a zo lâta amâ tyuh châh chhao y hra ta; laihsa, ama vâ-ia viapa nata ama tlaichhai viapa thlaita a palâhâh thlâh hapazy chhao laiphô chô awpa satlia hnei theina kyh liata ama ky ha tyh.

Laiphô chôpa he, Mara satliazy ta a zo lâta daihti ama vaw hmâna dâh hry liata peimawh chaipa nata alâluah chaipa châ ta. Laihsa O liata satlia pathôh-papalihzy amâ rie tyh. Laihsa chata ama O liata laiphô vaw chôpa satliazy cha dao tyh ei ta. Ama O liata a riepa satliazy ta O hro lâtapa laihsa ama kei charei hapa chhaota amâ vaw dipa ama vaw hâ thlâh ha tyh. Satliazy ta ama tuapa maih chhao pa-eipachhia leipa ta, ama ky a patha khiahta la ama ky khaoh ta; ama luhzy die ta, ama kuparo nata ama pheiparo â daopa tyh ei. He hawhta laihsa ta ama O liata laiphô chôpa satliazy avaw mohôh tyhpa he ama veiseih palôhâhna liata a pahnieh kaw ta. Laihsa veiseih palôhâhna a phahlapazy cha zâkha ama O liata laiphô ama kei chôpa ta ama pahno thei thlâh ha tyh. “Veiseih palôhâhna kyh liata Ngôki a tlupa rai y vei ei” tahpa cha Khihhrâ satliazy bietluna chhao a châ hra.

Laihsa châta laiphô chôpa hry liata a vâ-ia viapa nata a tlaichhai viapa ama ypa chhaota a palâsa tu leipa he pha ta; Mara chanô zy he veiseihna kyh liata palôh pasih kawpa ama châpa vâta laiphô chôna liata satlia thokha cha, chanô so viapazy palôh phaohzie pahnothai leipa ta, amâ lôh chhei ngâkaw tyhpa rai châ ta; chanô palôh pahnothaileina vâta ahmôthaileinazy taihta avaw y tyhpa a châ.

           

Zâkha cha Dôthâ nata a viasapaw, kyhtotie liata a ngâ chaipa nata a unawhpa hawhta a hmôpa, Vâchai nahta Ngôki nah O lâ laiphô chô a chhuahpa ta ama kahmi kaw kiah ngâkaw ei ta; cha nona chata âmo hlâta Ngôki nah O a kiah tuapa satliazy bielôhawh reipa cha khôtho tawhna chata â thei pha kaw ta.

            O chhôh lâta a ypa hryta Dôthâ a iekhy kaw tuhpa, Ngôki palôh pahnie a chhuahpa ta kha hlâ tawhta chhaota Dôthâ vaw reipachhie ngâthlâh ha tuhpa, Biekhâ ta, “Dôthâ bao cha hnaihta, hâra thorapa a châna hao a pahno leitu ha ta; zâhnia ta â pielyuna dâhzy kha â ngia lei kaw. Kha hawhta a y ngâthlâh ha khiahta la a mohnao sakiana zie ta reihkah eina pathliesa pyly aw. Chhoreituhpa hnei leipa hârapa a châna khi a palâsatu ha tyh” tahpa ta a rei ngâpa cha Dôthâ chata thei hmâ ta.

Thlaita O chhôh a zâ ngiapâ awpa â chhuahpa cha Vâchai chata thlaita a bâh liata vaw patupa ta, ama pano theikhi ta, “Dôthâ, a ngia mâh khâ. Buakha nahthlie via pi ta, tawhta eimâ ngia khaw” tahpa ta Hmypi thlâpâ khaihna ry liata nohpahlih a taopa Ngôki-zy okah liata thobuh a ypa ry lâna chata a kei pasie haw ei ta.

           

Dôthâ biereipa cha satlia hropazy chata vaw hiahrih pazao lymâ ei ta.

“Dôthâ cha kheita â piechhei ha heih. A pakah â chakhyh tu ha ta, eima khih nôpawnah mo chhao a ka kaw bâ mâh my. Khi hawhta a y lymâ khiahta la na reipa hawhta noza hmiachhiena a tao pyly aw” tahpa ta pahneipâna chôta vaw reih ngâtuhpa cha Biekhâ viasapaw, a viasapaw hlâta hmahta a tuapahaihipa, Biekhâ rei sai ta a y thlâh hapa, Zaka a châ, tahpa Dôthâ chata pahno thlâh ha ta.

           

Biekhâ he lahpinô pakha a chhaih hapa, saw deikua a hnei leipa châ ta. Nôpaw khihsa theipa, a paw he bei machâ hry liata ama bei ta a bie nata hla a la chaipa hry liatapa a châpa hnaihta ama khih liana heta ‘Sôhmovarapa’ a y chhôhpa hawhta â hmô ta. Amo hlâta khihsatôhtuna liata â hnai viapazy nata â iekhy viapazy cha laihsa hmiakô liata a thata reipachhie tyh ta. Râh akhiena nata hrâsiena nohkhi liata â tlu leipa satliazy chhochhi cha ama hnôhlâ tawhta â ngia lei kawpa ta reih tyhpa châ ta. Châhrasala, Laikhâ heta â kho awpa mo ta moh leipa ta, ama khih satlia hryta a hluh viapazy ta khâ amâ châhpa vâta Biekhâ adyuhpa cha, ‘Khihtlâh adyuhpa’ alyu ha tyhpa vâta ‘reihkah pathlie leipa ta a y ha heih tyhpa a châ.

           

Biekhâ ao nata reih he a paro kawpa hnaihta a yna su liana maihta ano ao ngâlâh he thei awpa y tyh ta; hmo phichhyhpâpa ta a reih thaipa a châpa vâta reihkah a pazai kaw hra.

Ngôki he kha hlâ tawhta vaw khoh kaw tyh hra ta. A palôh pahnie a chhuahpa ta athata a tei tyh hra. A nô nata paw palôh pahnie a chhuahpa ta ama raizy taihta a bao tyhpa a châ. Châhrasala, Ngôki heta â hao kaw ta, cha cha âlâhâhpa ta palâsa hlei vei. 

Ngôki he rilâhpa a hnei leipa, chanô pakha deita bao hnaihta a nô nata paw heta mothai ei ta, dao ei ta, lôsôhpa dao heta daodo ei ta. Ano ta chhao avaw chu tlai hra ta, ama khih satlia zydua ta ama vâ-ia tah thei awpa ta tlaichhai leituhpa rai y vei ei. Ano chhao heta satlia zydua he bie a chho pha khai thei thlâh ha ta; ama O liata laiphô a chô hapa satliazy ta a thâtih he rei ama ai leipa a châ.

He zâ liana chhao heta Biekhâ biereipa liana chata chôpho ta pahnei ngâkawpa nata apapeisa lei kawpa lyu hrasala; a palôhrupa liata deikua Biekhâ â haona nata Dôthâ a ngiachhiena lai via ngâkaw ta. Chakoh mei iapa ta a hmia avaw khaipa cha mohpasia mawh ei sala cha a mothlih â o khai hapa hryta Biekhâ â haona mopadei cha hmôchhei aw vei ei.

Biekhâ chata Dôthâ chôchâh cha reipazao lymâ ta, “Zâhnia chakâ vaih lâta Dingô nah O liata laiphô chô pi ta. Dôthâ chhao vaw chô hra ta. Zâ âvaw zia pi ta, â rei thei chaimâh ta, ‘Eima khih satlia liata la keima tluta sa a ka theipa y vei ei. Ei sa kapa zie a ka hapa nama hry liata nama y khiahta la ei Meithei ei cha pie ei’ tahpa ta reih lymâ ta. Kei cha a chalih thlâh ha na ta. Satlia hropazy chhao chata chhyh thai lei kaw sai ei ta. Anodeikua laiphô chôna liata a pabua pabâ awpa cha ama khoh leipa vâta amâ chalih khai ha. Cha khai tawhta Dingô kiah liata a kei tyuhpa ta, satlia hropazy moka kaw awpa ta a byh chô liatazy a kei zia ta” kaw tah heih ta. Satlia hropazy chata, “Cha Dôthâ rai cha dia maw!!” vaw tah ngâkaw ei ta.

Dôthâ chata, “Cha hawhta dawh-ei satlia liana hmahta hâra thorapa tlaita ei mo ka kawpa ta a y hrapa cha la, tahpa ta thyuhnao achhuahpa ta ei ziana tawhta ei kaw thyupa cha, Dingô ta na vaw pakhâ haw ta. Cha tawhta cha Dingô nahta amâ vâ-ia tahpa ei pahnopâ ha hrapa a châ” tah heih ta.

“Na vaw pakhâ vei mawh sala cha chhaolei a kaw tly hrapa he â ngiapachhina taihta ei chhorei aw, ei tah ngâpa tlai ta” kaw tah heih ta. Satlia hropazy cha athata kaw pahneih ei ta.

Chakoh meita a hmia a khaih pha tu leina su liata atyuhpa, ama biereipa vaw nahthlieh thlâh ha tuhpa Zithai palôh mei hawhta a kâ ngâpa cha pahnothai vei ei.

Khôtho liana chata Dôthâ nata  Vâchaizy cha thobuh ry liata pyury a chado kawpa ta avaw chatôh ngâkaw ei ta.

“Na pathlie tyh Vâchai. Biekhâ sachhie sahrupaw tlai ta Ngôki hmiakô liata ano leipa pi ta ei thâtih na reih hrapa cha a rao za chamieh tua sâ. Sahrâh hmia lia dua beih va na; Chariah luh chalopa ta vâhla pathluah ha hra na. Biekhâ sâchhie cha…na pathlie tyh” tahpa ta Dôthâ chata khâchâ ano pakhâtuhpa Vâchai cha vaw nâ ngâkaw ta.

Vâchai chata, “Dôthâ, lôhso phaoh ma y. Zithai palôh hmah pahro tlamaw ha la chi. Haipazy la âvaw lâpapua pyly aw. Hiahvâ ta daihti ryhpaohpa cha pie ta, Biekhâ haiphiah zie he eima palâsana daihti avaw tlô bao na. Atahmâ ta nâ zâ ngiahnao khiahta la Ngôki nô nata paw hleikhôta, satlia hropazy hmiakô liata maophyu aw chi ta; Ngôki châta chhao mopadeina awpa y aw vei” tahpa ta khâchâ patu ha ta.

Thlâpâ vawpa ta Dôthâ hmia a za khaipa liata hiehâhna nata palôhpasana a pahlaopa cha ngia khoh a chhih tlai vei.

A viasa pha chaipa Vâchai biereipa cha pachâ ta, â do kawpa ta pahno ta. Daihti pha viapa hâ chy ta, Biekhâ haiphiana palâhâh awpa cha tlao atlyh via haw ta. Dingô nah O lâ laiphô chô awpa ta a thao haw ei ta.

Dingô he ama khih liata cha Ngôki pazipa ta ama mopa, laihsa sovâh kawpa nata chhithaipâ thlâh ha hrapa châ ta. Anodeikua, Dôthâ a kho tuna liata Ngôki he hrohrâ ta â hao thlâh hapa chanô a châ. He vâna heta Dôthâ ta ama O lâ laiphô a kaw chô tyhpazy chhao he lyusie-thophaona liata Dôthâ ta a vaw thei thei n’awpa liata â khohpa hawhta phie âvaw reih ha tyhpa châ ta. He tlai he Biekhâ ta pahnopa ta, Ngôki-nah O liata kha hawhna khata Dôthâ mao a paphyu ha hrapa a châ.  

Ngôki deikua ta cha khahlâ tawhta Biekhâ bierei khohna dâh pahnopasiatuhpa a châpa vâta, zo tiarâh leipa ta. Cha leipa chhao rai ta, Dôthâ hrozie nôchâ nata Biekhâ ta a baina dâh cha alei nata a vâ a châ, tahpa a pahnopasiatuh chaipa châ tlôh ta.    

Dôthâ nahta ama likah liata ngâchhihna pathaihpa khâchâ a y hapa vâta, ama likah liata biedoleipa hmâpa ta amâ zaokhina hleidy chhie achhuahtuhpazy chata, tlao pa-i via ei ta; tlao âmo pano cha a pahnia via rili tyh ei ta. Nohchareita ta a vâ pasa via ei ta; zâchareita amâ tlaichhaina cha pôh rili ta; duahmo nata chhichâna ananona nata alyuleina, apahliena chata ama likah liata kyhpachâna mei hawhta a ia ngâpa cha padia thei vei!

Dôtha he Khihhrâ khih satlia hry liata cha râh lâ chhao, khichhai lâ chhao, ama bei ta â pachy chaipa pakha châ ta. He vâna heta ama khih satlia hluhpi ta amâ iekhyhpa, ama chhyh thai leipa chhao a châ hra. Ano hra heta sasyh a reithaina reikah pathlie beih leipa ta, riahpha kawpa ta nata veiseih kawpa ta a tao awpa taopa ta, chyhsa zo moh thai kawpa ta nata a châna a pahno kawpa ta a tao awpa a pha kawpa ta patlô tyhpa a châ.

(Pazao heih awpa....)