Article : Mararãh ativy n'awpa châta Small Scale Industry eima peimawh - By Beihrua Lôdua

Eima pahnopa hawhta Marasaw he khizaw hmasiena hawh tlai ta achuna lâ chhao hmasiena thata to pi ta, châ thaipa hluhpi chhao ama vaw pua lyma hra. Cha nota Marasaw Opi chaipa MADC ta sawkhâ rai la tiah awpa cha reih lei, atahmâ hmata Over staff tahpa reikazy thei awpa a hluh kaw ba. Central sawkhâ cha reih lei pata State sawkhâ ry liata sawkhâ rai hmata a roh patlo awpa he a thai patluapa nata vâhnei patluapazy châ deita ta sawkhâ raih a ngia thei chyu chyupa a châ.

Nôpawzy ta ama hnei tlakaipa sôh hryu pata ama pachusapa kô chareih ta châthaipa vaw pua ngâthlâ tlô ei, Graduate tawhta chô lâ sai hmata chhôh to heta pakha pano chhâ la eima hnei chyu nata pangiasa a chhi. Châthaipa chysa chyh viapa hmata nietluana kyh liata rairuna eima tyh khiata cha mara zawpi hluh via syulyu châthai leipazy padua papua nawpa chhochhi pachâ ngâh hmata ngiaroh a chhi via heih. Châthaipazy chhochhi Ku raihria pata nietlua awpa hra raihria thai khao tlô ei va, kheita tao awpa chi ma a châ va i? Eima râh nôpaw nahzy châta la lu pahia khi tlai a châ nata ei pangiasa.

Business tao awpa tah mawh ei sih la, pathao patô nawpa phusa hra hnei tlôh pi va, agriculture lâchhâ tah mawh sih la chysa râh sairô vaw châ thla ha ba. Hmotao nawpa khaovâ chhao y thai khao hra vei, nohto eima ahmie awpa ativypa cha rei lei, Khazohpa Noh my ngâlâ ahmie awpa Vaosa dâdei chhao mararâh heta ativy thei khao pi va, a bua khai ha...

Chavâta, Small Scale Industry he eima râh liata introduce ei sih la pha thlyuna aw?tahpa pachâna lai kawpazy ei na pahneisa. Small scale industry cha Rs 1 crore (Rs 100 lakhs) hlâta chyh viapa industry/machinery reina châ ta, individual, group or co-operative zy chhaota a tao thei khai. Industry tawtaw kawpa hmata padua ei sih la châthaipa nata thaileipazy chhaota hria thei chyu ei ta, chysa hluhpi nietluana phapa ama hnei thei nata ei pangiasa.

Small scale industry he a hlaotloh thei hmeisei khiatala Châthaipa hluhpi nata châthai leipa hluhpi zy ta nietluana phapa vaw hnei ha aw ei ta, raw materials a tôh tuh awpa chhao ku raihriapa hluhpi cha ama thapaw via aw ta, kô hro hlâta ama hria pasa via lyma hra aw.

Eima râh ta a pha theipa rakha small scale industry thokha pamosana ei vaw pie tuah aw.

1. Tisôpi = Iah-mai processing plant
2. Kaochao = Iphô processing plant (frooty, maaza..)
3. Zyhno = Chhilli Processing plant
4. Zyhno Tisi chavah- Water Bottling plant..
5. Phura-Pala = Rotu processing plant.
6. Handloom & Weaving industry...etc..

Reih awpa hluhpi y hra sala khi a chô liatapazy khi novah nao via naw pata ei vaw palâsapa a châ. Tiama kaw pata ama hria nawpa lâthlô phapa mokhei awpa hela a daih kaw ba thlyu na aw....

(He article pha kawpa rohtuhpa he atahmâ ta MSO Gen.HQ : Siaha President a châ haipa a châ. Admn)