Article : Pa-ôpazy taopa he MOLEINA a châ - Rev Dr Laiu Fachhai
Kuvâ ta pakah, rao, pavyhpi nata rih zy liata kesâh (cancer) tlôkhei thei ta, châhnamei, karao, khaini nata sâdâ zy ta pakah, rao, pavyhpi, rih nata pachao zy liata kesâh (cancer) hri a tlôkhei thei hra. Paôpazy heta atlia tawhta eima râh liata a vaw hluh kawpa stroke zy, thisaih a sâhpa zy, pazô thlôhpa nata lôpo pasana zy chhao a tlôkhei theipa hawhta reipa a châ hra.
He hawhta paôpazy taopa ta hri-iah chhiepazy a tlôkhei theizie he athaipazy ta liahsa ta pasia ha ei ta, chavâta thotlâhpaw bie ei ta, “Châ bao aw vei” tah ta ei chakhyh thai awpa châ khao vei. “Paôpazy a tao leipazy chhao kesâh ama vei thlâh ha hra bao na, paôpazy a taopazy eima vei via pachai n’awpa y hlei bao vei” tahpa chhao he pitlohpa bierei awpa chi châ vei. “Eima manô nata mapawzy kha ama hro chhôh zydua ta karaoti paô ei ta, kesâh hri vei bao veih ei” tahpa chhao bie tlohpa châ hra vei.
Tah heihna thâhta cha manô mapaw daihti no kha ama chhâ vaw pasi hlei vei. Kô 50 kô 60 ama kaw tloh tawhta cha machâpa hawhta pachâpa châ ei ta, kô 70 khô lâ a hrohpa kha ama chyh kaw. Pakah nata rao zy liata hmah chhiepa phaopa hawhta ama vaw reipazy nata chhôh lâta hri vâta a thipa hawhta ama vaw reipazy chhao kha karao pazypa, karaoti paôpa nata châhnamei pazypa vâta pavyhpi, rih, pathi, pachao nata lôpo zy liata hri nah iah a la ta a thipazy ama vaw châ thei.
Paôpazy a tao leipa chhao kesâh hri ama vei thei tlai hra. Châhrasala paôpazy a taopazy cha kesâh hri vei theina risk â sâh via syulyu tahpa he bie dopa a châzie my lei awpa a pha. Manô mapaw daihti nota ama châhnamei nata karao kha âmo tata ama chheipa aoh-mâ tawhta pazypa châ ta, atahmâno reikah ta lei pahâhpa nata lôvâ thiena thohnazy (chemical) hmâ thlu leipa organic châ ei ta, a aoh-mâ liana kha khâpa thohna hmah pahlao leipa ta ama paô pazy tyhpa a châ. Cha dei châ vei. Châhnamei nata karaotita kha ama tao chhôhpa châ ta, chavâta atahmâ notapa hlâ heta chi â chhih lei viana a rakhapa ta a y thlyu aw. Atahmâ cha chemical chhaota ama process laihpa cigarette zy châ ei ta, a thatlô kaw tlai aw. Cha dei châ vei, atahmâno ta paôpazy a taopazy cha châhnamei pazy pâ ei, kuvâ nie pâ ei, karaoti paô pâ ei, sâdâ paô pâ ei, khaini paô pâ ei tah ei ta, ama pakah rai ta rua leipa ta, chavâta pakah nata rao nata chhôh rih ta a tao thei n’awpa a ru ngâsâ thlâh ha.
Paôpazy ataopazy nata ataopazy kiapâh liata a ypazy ta kesâh hri a la ei ta, chhâ a palo leipa ta Marasaw eima thi lymâpa he thlazoh a chhih ta, pachârôh â chhih ngâsâ thlâh ha bâ. Paôpazy taopa vâta hri chichhihpa a lapa vâta lapinô nôhmei chho lei ta a panôhmeisapa nata vahpa pawhmei chho lei ta a papawhmeisapa nata saw nata nawhzy hara chho lei ta a paharasapa eima râh liata a hluh kaw bâ. Paôpazy he atanoh Mara râh chariah lai chaipa sâkha châ ta, he chariah heta maniah a pahnie ngâ kaw.
Nôpawzy ta paôpazy tao ei sala, paôpazy ia ta zai ha ei sala, ama pathleih thei khao vei khiata cha, ama sawzy hnohta paritheipazy (bei, thohna, number 4, sahma, etc) tao lei awpa ta chho theina hmotaotheina hnei khao veih ei. Âmo nôpawzy na addict-pa a hnei ha hra ei. Chavâta kao kha lâ tawhta cha nôpawzy ta atanoh sawzy paritheipa tao lei awpa ama chho thei khao leipa he noâhchhihpa hmo châ vei. Kheihta ma addict nata addict cha amâ chho thei rai aw? Ama bie amâ nathlie rai aw?
“Paôpazy taopa he eima phoryhpa (culture) châ ta, chavâta culture cha a dyuh ngâ kaw awpa châ bao vei” a tahpa ama y heih. Phoryhpa phapa cha chhypa ta palaiseihsa tlai aw pi ta, phoryhpa pha leipa cha eima hmâ pazao awpa châ vei. Manô mapaw daihti liata cha sahma taopa nata dopa kha ama phoryhpa a châ. Ch
