RÂHZOHPA NOH TÂRI 1 THLAZOH - By Rev.Dr.Lai-U Fachhai

Atanoh Thlazoh noh kha noh he Mara râh Awnanopa ta misawnâri eima tua tuachai noh châ ta, 1966 liata misawnâri hmiatua chaipa Puhpa A Khôsa cha Khumi râh lâ tuapa a châ. Atakô he Mara râh Awnanopa ta râhzohpa chkaona rai a vaw hria tawhta a kô 52-na a châ haw.

He kô 52 chhôh râhzohpa chakaona rai eima hriapa vâta ta mo hluhpi Krizyhpa vaw châ ha ei ta, Awnanopa (Local Church) chhao a hluhpi padua hapa a châ. ABEIPA cha reithaipa ta y se.

Khizaw Awnanopazy hry liata Mara râh Awnanopa he râhzohpa kyh a pachâ chaipa, râhzohpa châta thlah a chhâ hluh chaipa, râhzohpa châta piena kyh liata â pasaih chaipa, misawnâri a tuah hluh chaipa nata râhzohpa chkaona kyh liata a hriapasa chaipa py liata eimâ hlao hra. A rônah ngaita.

Hriapasa via lymâ aw pi ta, eima viahchhâ ti chô liata thy via lymâ aw pi ta, a theilâpa hmô lymâ aw pi ta, Thaitihpha chhona rai eima hriapa heta mo hropazy Krista ama kaw pahnona dei châ leipa ta, keimo chhao sapa nata thlahpa kyh liata eima mopakha, chhôhkha, khihtlâh nata râh byhnâ eima tona a châ lymâ aw.