Saopi daihti liata chhiena a tlôpa liata chyhsa 1,400 ama thi – Home Ministry

New Delhi, Sep 3 (PTI) Atakô saopi daihti liata India râh pôhpalôhpa liata vâsuapa nata tilapia vâta chyhsa 1,400 ama thi ha tahpa Union Home Ministry chata palâsapa ta, he hryta 488 he Kerela liatapa ama châ, a tah hra. India râh state nano nanopa 10 liata vâsuapa vâta tilapia, leichopa nata chhiena nano nanopa a tlôpa vâta hrona pahleipazie he a pôh via lymâ chy na ta pangiasapa a châ.

Home Ministry ry liata National Emergency Response Centre (NERC) ta ama palâsana dâhta, Kerela liata chyhsa 488 thipa ta, district 14 liata chyhsa thysy 54.11 (lakh) ta O nata lyu ama pahlei hra, tahpa palâsa ta. He o nata lyu liata pahrâ thei khao leipa hryta maluh thysy 14.52 (lakh) zy cha deichhyna tlâhphiah (Relief Camp)-zy liata ama y hai, tahpa a palâsa hra.

He vâsuapa nata tilapia vâta chhiena a tlôpa liana heta Kerela liata lyu/leipalie, 57,024 hectares ta a kawhpa cha a rao khai ha hra.

He hawhta a châ nona heta Uttar Pradesh liata chyhsa 254 thi ei ta, West Bengal liata chyhsa 210, Karnataka liata chyhsa 170, Maharashtra liata chyhsa 139, Gujarat liata chyhsa 52, Assam liata chyhsa 50, Uttarakhand liata chyhsa 37, Odisha liata chyhsa 29 nata Nagaland liata chyhsa 11 ama thi tahpa palâsapa a châ hra.

Chyhsa, ama yna chybia pahno khao leipa 43 y ei ta – Kerela liata chyhsa 15, Uttar Pradesh liata 14, West Bengal chyhsa 5, Uttarakhand nata Karnataka liata chyhsa 3 zy cha ama yna chybia pahno khao leipa châ ei ta, chyhsa 386 hmah a phaohpa ama y hra.

Vâsuapa nata tilapia vâta Odisha liata district 30 ta rairuna a tyh ei ta, Maharashtra liata district 26, Assam liata district 25, Uttar Pradesh nata West Bengal liata 23 rairie, Kerela liata 14, Uttarakhand liata 13, Karnataka nata Nagaland 11 rairie, Gujarat liata district 10 zy ta rairuna amâ tyh.