Mizoram : Kô 2018 MLA Atlyhna Saichhieliena

Mizoram MLA General Election 2018 â hnia via lymâ ta, official candidate chhao a hluh viapa cha phuah khaipa a châ haw! He hawhta a châ nona heta kô hropa a pangiasa pasuana hluh kaw heih ta, râh châta ahy pha chai aw, tahpa chhao pahnothai a ru kaw bã heih.

Kô 2018 atlyhna saichhielie awpa ta atlyhna hnôh chaipa, kô 2013 atlyhna chôchâh khazie rakhama pahno awpa a ngiah ta. Chavâta, kô 2013 atlyhna liata pahniena totuhpa MLA-zy tlôna vote zie chhao pahno awpa â ngiah hra.

Mizoram MLA Election hnôh chaipa kha November 24, 2013-liata hneipa châ ta, Congress nata ZNP zy âmo deita a duah ei ta, MNF, MPC nata MDF-zy amâ pakaoh. December 8-liata vote reipa châ ta, result phuahpápa a châ.

Kô 2013 atlyhna liana heta hnabeiseihna khôlâ ta Congress a pie pha ei ta, MLA 34 hnei ei ta, MNF-ta MLA 5 hneipa ta, MPC-ta MLA pakha hnei t. INC heta MLA 40-liata 34 hneipa ta pahnie kawpa ta sawhkhána tao ta, vote tlapa zydua tawhta 44.63% hmôpa ta, Congress â kaw hnia chaituhpa MNF heta 28.65% deita ama kaw hmôpa vâta Congress heta pahniena â chieh kawpa ta ama to tah leithei'pa châ vei.

Congress party candidate thokha tlohna vote chhao â sâh kaw.

Apahniena â sâh chaipa cha Tuichawng bia liata châpa ta, INC Candidate BD Chakma chata â kholâhpa MNF candidate RM Chakma cha vote 8726 ta a pahnie. Amâ pahniezie, vote 8726 hmô phapa he Mizoram pôhpalôhpa liata MLA pano deita ama y. He hleikhôta, Tuichawng constituency he 2013 atlyhna liata vote hluh chaina châ ta, vote 26278 ypa ta, he candidate panopazy hleikhôna heta BJP candidate, vote 374 deita a hmôtuhpa Victor Talukdar deita a ypa vâta Congress nata MNF candidate zy heta vote he amâ rai khai rô.

MLA atlyhna liata pahniena chyh chaipa cha Tuikum Constituency tawhta patlohpa, MNF candidate  Er. Lalrinawma châ ta, ano heta â kholâhpa K.Lianzuala INC candidate cha vote 14 ta a pahnie. Lunglei West-liata Chalrosanga, INC candidate chata Dr. R.Lalthangliana, MNF cha vote 94 deita a pahnie hra. Pahniena chyh viapa hry liata H. Rohluna (INC-Lengteng), Lalsawta (INC-Aizawl E-II), Dr. K.Beichhua (MNF-Siaha), Hmingdailova Khiangte (INC-Tuirial)-zy chhao amã hlao.

Siaha bia liata cha Mizo National Front (MNF) Candidate Dr.K.Beichhua ta vote 222 ta INC Candidate Puhpa S.Hiatô  a pahnie.