Article : Pasana chichhihpa ' DEPRESSION' - By Eric Notlô Zawthâ

Depression he Khizaw liata pasana zydua liata chi a chhih chaipa pasana a châ.

Cha vâta kheita eima tao aw?

Biehmiachhihpa: Tahmâ hlâ khizaw ta daihti  maniah a siekhei haipa noh nata daihti eima sai nata thlapa saw zyta y chakhy thai rimâ awpa châ khao vei. Sâta ta eima hrona kho a chhi ngâsâpa nata a sôh ngâsâpa zy parao lymâ awpa nata pahlei padia lymâ awpa ta noh chareihta nata zâ chareihta maniah â dyu lyma. Cha hawna hrata eima thyudyupa khona chhi mgâsâp zy a daihti leipa liata maniah a chhu lymâ. Cha vâta y chakhy thla ha awpa nata diathla chaimah pata eima daihti nata noh zy he a hmâ chakhy khao lei awpa he a pei mawh hmeisei. Abeipa bie nata a pakao lymâ pata he eima charia he eimâ dyu lymâ bah awpa chhao he a byu hmeisei hawba. Cha vâta thlapa sawzy ta he hawpa duasu tawhta eimâ boh thei nawpa ta eima chakaona he khâ tiama papua lymâ bei suh vy.

A chô liata eima palâsapa eima bietla hawta, kheita e he hawpa pasana chichhi kawpa palôhru lâ liata hnabeiseina a hnei khao leipa nawzy chôta eima chakao aw.

Khizaw liata chysapa ta eima tlâ leina nata eima pasana zy he, Khizaw pahno theina nata thaina sohna ta apatlâ thei aw. Cha hawna hrata eima pasana chhao ama pahno thei hra aw. Cha hawna pyly hei hrata tlâna thohna zy chhao maniah ama pie thei hra aw. Anodeikua he hawpa pasana deikua he cha Khizaw pahno thaina Dawty nata nurse nawzy ta ama taithaipa châ khao vei.

Palôhru lâ liata pasana” (Depression) a hnei hawpa nawzy hrona eima moh nata ama pasana he Khizaw thohna chakhypa zyta patlâ thai awpa nata panano thai rimâ awpa châ vei.

Chavâta he hawpa pasana a hnei tlamaw hawpa nawzy chô liata chakaona he thlapa sawzy ta eima vei awpa ta eima pachâ papei mawhsa awpa he a pei mawh hmeisei. Cha hawna hrata Abeipa bie hmeiseipa deileipa ta cha ama tlâna awpa he y vei.

1 Pity 4:12 liata eima hmôpa bie cha....Kho ngaitapa saih u, nama hryta pasiana thata a vaw ypa nâmo pasiana awpata nama chôta a vaw tlôpa he hmonoâhpa nama chôta a tlôpa hawhta raopata y khah u tahpa ta Pawla ta tha maniah a patlô.

Anodeikua tahmâ hlâ Khizaw duahmo eima sai nata eima thyudyupa kho a chhi kawpa nawzy ama chô liata pasiana a tlôpa he khâpa vâta mah ama phaothei khao vei. Apha pata eima pachâ pasia awpa a byu? A ei chaihpa ta nô nata paw Awnanopa liata chakaona a hnei tuhpa nôpaw zyta eima pachâ pasia chaimah awpa a byuh.

Krizyhpa sawzy chhô tawhta a laiseipa châ thla haw taraw ta hro hnabeiseina a hnei thai khao leipa nawzy he khâpa vâta mah a châ eima moh pasia chaimah awpa a byu. Cha vâta he hawpa pasana hri-ia chhô liata eima y pa he apha chaimah pata eima ngiapâna he Abeipa bie hmeiseipa nata pakaopa ta eima moh pasia lyma awpa a pei mawh.

Chavâta he pasana he hmialâ tah thai awpa châ khao leipa ta, Mylâ hânoh nata tâvia chhao ta thai awpa châ khao vei. Ta hmâ tawhta eima chakaona he pathao lymâ awpa ta Abeipa ta nâmah nata keimah tlai maniah â hnaw hmeisei.

Isai 41:10 liata cha...
Chi khah u, kei nama hnohta y tlôh na ta, nôpopa ta y khah u. Kei nama Khazohpa châ tlôh na ta; tha cha patlô aw ei na ta, ei siana ku chachâh lâta ei cha patu thlâh ha aw ei.Amen

2 Kor 1:4-Khazohpa ta keimo thlah maniah a palôh, chavâta keimo chhao riethei ataopazy thlah eima palôh thei nawpata cha thlahlôhna hawhpa cha Khazohpa tawhta eima hmôpa a châ.

Keimo duahmo châna lâ tawhta la pahnie thei aw mapi. Anodeikua cha a chysa zy apathla pala bei leipa Zisu Krista vâta he pasana he eima phnie thei lymâ aw.

Thâtihpha Zawhana 16:33 liata eima moh hei khiata cha, He biezy he nama hnohta ei reih haw hih, keima liata thlahlôhpa ta nama y nawpa ta. Khizaw liana heta rietheipasapa ta nama y tyh; châhrasala thlahlôh ngaitapa ta y teh u, kei ta khizaw ei tiah haw,” tah ta. Amen

Khizaw apahnie thei tuhpa he Zisu deita a châ. Cha vâta keimo tha tlôna ta châ aw vei. Keimo pahnona ta châ hra aw vei. Zisu vâta eima pahnie lymâ aw.

Chavâta he pasana tawhta eimâ boh chyu thei nawpa ta thlapa lâ liata hrona hmeiseipa a hnei hawpa nata Khazohpa saw châna apahno hmeisei hawpa nawzy ta tanoh tawhta pathaopa ta he chakaona he keimo nata eima phuna chyu hawta eima vaih nata tlâ Awnananopa liata chakaona hnei chyu awpa ta eima khokhei.

Abeipa thlahpa pathaipa ta he pasana hri-ia chhiepa tawhta maniah patlâ hei sala, a rônahna cha a thiepa ta maniah pahmôsa hei mawh sy. Amen