Mara Hlasa Py (MHP) aduana noh liata thisaih pie

SIAHA, 28 Nawh, 2019, Hriatuanoh - Atanoh he Mara Hlasa Py(MHP) paduapa a châ tawhta kô 16 atloh-na noh châ ta, Mara Hlasa Py General Headquarters: Siaha ta aduana noh pachhaipadaipa ta nata aduana alyna châta District Hospital, Siaha Blood Bank liata thisaih piepa a châ.

Thisaih pie awpa ta athaopa maluh 13 hry liata manôh 4 zy cha pie thei awpa ama châna hawh ta ama pie. Cha nahzy cha:-

1. S. Vabeihrongia, Finance Secretary
2. Jessica B. Khuhly,  Secy. i/c Art & Culture
3. FC. Henry, Active Member
4. NT. Vabeido, Artiste

Artiste nata Member thokha zy chhao ama pie khoh kaw tarawpa ta achuna liata Exam awpa zy ama châ vâta, atahmâ liata pie thei mâh vei ei; thisaih apie theipa zydua hnoh ta MHP General Headquarters ta alynabie eima reih hmeiseih.

Atanoh MHP eimâ duana pachhaipadaipa ta Siaha New Colony(Mylai Building kiah) liata MHP General Headquarters Opi pathaina tlâh-rai hriapâpa a châ hra.

MHP General Headquarters: Report tlâhpipa:-

1. Mara Hlasa Py he târi 28 January, 2003, Tuesday liata paduapa a châ.
2. Marasawzy hlasana lâ nata literature lâ liata hmahsiena awpa châta paduapa a châ.
3. Atahmâ he General Headquarters Headquarters Term 8-na (2018-2020) siekhei ngâ haipa a châ.
4. MHP ry liata Artiste 50 chhaihchhyh member hnei pi ta, Active member he 15 – 20 ama châ.
5. Kô 2 padai liata Mara (Maraland) Idol tao tyhpa a châ.
6. Kô 2 padai liata General Headquarters leader zy atlyna General Election hnei tyhpa a châ.
7. Kô 2019 kô chhâna lâ liata MHP ta Music Award rai awpa.
8. Theiva râh liata MHP Tliatlâh eima hneipa cha târi 20-12-2018 liata pahypa a châ. He liata Mara hla nata bie liata nôpaw hmiatuapazy lobo pa ta, ama tliatlâh taopa a châ aw.
9. MHP ry liata Artiste nah zydua pachopa ta Booklet tao ngâ haipa a châ.
10. Kôchareih, kô chhâna lia maihta bao ngiahpazy châta Street Concert hnei aw tyh awpa tahpa châ ta, kô 2018 lia chhao hnei theipa a châ.
11. Atahmâ Term(2018-2020)  liata Hlapy Music Video pachhuahpanoh awpa.

MHP he târi 28 January, 2003 liata Puhpa A. Thazi ta a vaw paduapa châ ta, Siaha he General Headquarters a châ. Chakhei, Chhaolô, Amôtlâh, Saikao, Tipâ(V), Phurâ lia zy ta Sub-Headquarters paduapa a châ hra.

MHP liata member a châ khohpazy châta Annual member fee Rs.50/-, Life Member 1,000/, Patron Member Rs.2,000/-  cheipa ta khatino rai member châtheipa a châ hra.

Issued by:-
Mara Hlasa Py
General Headquarters
Siaha