Article : ECM NATA CCIM APÔKHANA HE A HLAOTLOH THEI HMEISEIH MA? - By LD Beihrua

Kô 1989 tawhta ECM nata CCIM cha a vaw chhai ha ta, Awnanopa râh liata a kiachohna rai y khao thlyu vei. Maraland Gospel Centenary 2007 chy khata apôkha biereina a y taraw pata hlaotloh thei hmeiseih vei. 

Mara awnanopa a chhaihna kô 25 tlai a vaw châ tawhta kô 2014 khata Gospel Outreach Ministry pachhuapanohpa zawzi ta LPM Mission Missionary Bungalow kô 100na nata Pinô Vaili B'Day alyna hneipa châ ta, he Lorrain Ville liana heta ECM nata CCIM nôpawpazy cha su kha lia programe hmah khohpa a châ. He liana heta CCIM nata ECM liata eima nôpaw chai vei nah ta apôkha a byuh zie nata marasawzy sapa nata thlahpa liata eima vânazy reih papuapa châ ta, cha zawzina chata kô 2016 khata ECM Assembly, Chakhei liata CCIM delegates Rev AZ Beirôna hmia khochhih kawpa a vaw lâ haw. 

(Ei pahno chhei va tlyma, kha hlâ zydua kô 25 chhôh liana khata delegates eima vaw tuah tla leipa hawhta bie ei dao cha maw.) A hmeiseihpa a châ khiah a rarôh y ngaita kaw tahna a châ.

ECM nata CCIM Apôkha thei lei nawpa thokhazy:

1. ECM nata CCIM nôpaw thokha palôru liata apôkha khohna hmeiseihpa y hlei vei. 

2. Pinô Vaili ahawna vâ chyu chyu ta taopa châ ta, Marapazy pi heta eima Missionary zy reih ngiah leina taochhei lai kawpa eima vaw hnei ha tyh.

3. Atahmâ hla thyutliapazy nata social media reika vâta taopa dei ta a châ khiah a hlaotloh ru kaw aw.

4. ECM & CCIM Awnanopa liata nôpaw thokhazy he Mara dopa ama châ leipa vâta chi nata pho a pachhaina kyh liata tha pasana hmeiseihpa y vei. 

5. Assembly member thokha chhochhi la ama moh lâluah nawpa nata amo local pha nawpa rakha lia a daih ama tah kaw, râh vei hmeiseihna y vei.

6. Marasaw a châ leipa nata râh thapasana a hnei leipa zy awnanopa puasai awpa hawhta biethâ ama chipa vâta.

7. The Lakher Pioneer Mission ta a sa papua leipa awnano hropa tawhta maniah a pahlao pahlipa zy heta eima missionary sô zie pahno khoh leipa ei ta, amo vâta marasaw thokha chhao missionary sôna padâhsapa ama hluh kaw ba hra.

Khi leipa point hropa chhao a y ngyu thei, khi zy khi problem y leipa sala moh nata hmobao liata eima bua tu nata pangiasa vana..