Article : EI CHÂHNAMEI TLÔNA KHAW!?

Zâlâ dawh 3:30 rachhôh châ ha ta..

Chasipaw ziza pai pathao ha ta, nopi avaw lie awpa ziza hryta tlâh to su to cha chawh karai thlâh ha ta. Ziza chhao a hi maolao kaw chy. Chasipaw ziza chakuapa hryta râhhmâh thothih ry liata thlihua a pahmôsa awpa chhao tlaichhai â chhih leipa vâta, ziza chakuapa pai pathao ta, nopi daihti â vaw lie awpa ry liana chata ei sahria liata ei tâkô pasâpa ta râh lâ thao ha hra na ta.

Chasi muarua khao leipa ta; palo muarua mâh hra vei. Ziza cha â daih thai kaw ta, ei pheilia haipa chhao cha â huatlâ kaw hra. Ei byh liata Thiahra aomâh chatypa, eima nô ta *Statement* phiapa ta a chatypa cheingei ei vao thlâh hapa vâna chata su a ryh kawpa tlô para ta, ahy thâ a ngiah leipa ta ei châhnamei sy n'awpa daihti cha a ngiahtiah khao vana!

Khi hawka tawhta buakha chhôh tlai ei sie tawhta eima khih tawhta chavah â hnia chaipa, Lôdu chavah cha thlai kei tlôpâ ha na ta.

Ei hawti nota chavah lai kawpa, lâpaw tawhta hmahta chavahti loh khôlô ngâpa pyury tôkalô athuapa hawhta paro tyhpa kha, atahmâ cha â reisi kawpa ta kasôh nôchâ phaohpa hawhta sidia thlâh ha bâ..chavah hlâta saimakaopa chhao alyu via ha bâ..eima khihtlâh nôpawpazy ta *A hnaw lâta thothih parao pi ta, lyu tlana châta eima hmâ tawh rakha khata na heta a y ha..eima khih ta ti eima nie chaipa hnaih bao a châ* tahpa ta pei tah kawpa ta ama rei tyhpazy kha ei pachâna liata avaw lâ leithei vei!

Cha chavah nata a chheihpâh cha chawh karaih thlâh ha bâ ta, pazu-pavaw hmi hmôpa cha rei lei, ama reikah thei awpa dâhdei chhao y khao vei! Lâpaw lâhlapi liata Tykaru sâ ngâpa pyu deita cha cha su nata a chheipâh charaotuhpa a châ thlâh ha bâ!

Chavah ngiakâh liata alô laipâ kawpa chô liana chata a tyuhpa ta, ei viahkao byh liata eima nô chatypa, Thiahrâ aomâh, *Statement* châhna ta a laipâ kawpa ta a chatypa cha sô kha za thaohpa ta, ei kuparo likah liata za teipa ta, ei chaopasy byh liata meilô cha za thaoh heihpa ta, chavah haosâ râh chawh karaipa lâta mohmia kei pasaihpâna chôta ei châhnamei cha kaw khai na ta, khâpa hropa paveih khao muarua mâh leipa ta â chiehpâ kawpa ta kaw hi na ta, avaw pahâh tlai na!

Pachâna khizaw liata totie rohpadypa ta ei châhnamei ei vaw hi hmeiseihpa cha - daihti rai avaw thei hmâpa chhao za châ hra vâ! Ei châhnamei ta ei kuparo a kaw pasahpa cha a kaw thei papua para na ta, avaw tlô daihmâpa he vaw châ ta, thlai laikachha lâ cha kaw thy parapa ta, ei tyuna su cha thyusaipa ta, *Kha he chavah ei za tlô lâlao hapa cha a luh lâ kaw sao sala, thosaw pha viapazy kaw moh laih tua sâ* tahpa ta chavah luh lâ ngaipa ta a kaw thao na ta..buakha chhôh tlai ei sie tawhta thosaw pha kawpa ei hmôpa cha chhawhpa ta chavah luh sao lymâpa ta khih lâ cha ei kaw kua pakhua ha heihpa a châ.

Khih a kaw ngiapa ta, O ei kaw tlô na tlâh cha zoh pâ phiephu ha ta, eima nô chata pati nie eina vaw hâ thlâh ha bâ..a hmi tawhta a no chhao a di kaw tahpa ei pahno thlâh ha..châhrasala, *Kha he pawhrâhpa ei châ cha ma..* tahpa ta *Nôpih, ei ngai si nawpa na vaw pachhuahpanohpa la, ei ngai avaw si tua sala tawh pati eima nie sy* tahpa ta ei sahria nata tâkô cha pasopa ta ngaisi awpa ei chhuahnohpâ ha heih..

Ei ngai liahsa ei si khai tawhta eima nô ta pati nie tao para ta, pati nie awpa ta eimâ vaw tyuhpa cha apakhyna dawh a paro ngâkaw bâ..cha daihti sie chatlie rimâ chy!!

Eima pano ta reikah leipa ta pati eima nie ngâ nona chata eima khih tlâh-awhna supipa (Info.centre) tawhta tlâh-awh awpa ta amâ chhuahnoh ngâpa pyury cha ei kaw theipa vâta, ei pati nie ngãpa cha liahsa a chalihsaipa ta ei nah kaw chôh na ta, *Job Card tlâhrai khiahma ama vaw phuah vâ nôpih..noh khazie hria awpa ma pua vâ he?* ei kaw tah ngâ nona chata, tlâh-awhna su tawhna chata thlahzoh-hmizona ao chhaota eima VC tlâh-awhpa, Puhpa Khizô ao tlai chata, "Khihsaw chapaw pitlohpa zydua, râh kãpa pachhai awpa ta eima khih thlâ su pangai khai ha awpa ta eimâ pahnosa. Atahmâ he râh kâpa heta eima khih thlâ su kaw kâ daihmâ ha ta, atahmâ a thaopâ lymã suh vy" a tahpa pyu chata eina pahlaw chaimâh tlai na! Ei pati nie ngâpa cha thyusai parapa ta, ei ku cha poh liata phiephu â hrupa ta ei sahria nata tâkô a la para na ta, *Nôpih vaw nie thlâh ha tyh..ei thao haw hih* tahpa nata châhkeih ei puasaipa cha â raohpâ ha!

Mohropazy chhao cha aparaparô kawpa ta thlâsu lâ ngaipa ta a rá chhiechhu ei ta; keichhao cha ahy hropa hmahta hâ hlei leipa ta, thlâsu lâthlôh lâ cha ei zawpâ lymâ haw!

Thlâsu ei za tlôpa cha râh kãpa chata hmia a kaw tôh chatlie kaw. Thlâsu laikathi ta liata mei paleih a kaw dua ngâpa hu sahpa hryta kaw papâ ngâpa pyu chata cha su cha bie ta.. a tlô tuapazy ta meilâ phipa ta, kalihpi ama vaw to ngâpa cha thlai a kei pazaopa ta ei theina zydua papuapa ta thapi ei kei phiapâ lymâ ha hrapa a châ..

Zâ dawh 6:30 rachhôhpa tawhta eima pachhaipa cha, zâ dawh 9 taihta bua pi ta, vâsâ ta eima khih thlâ su pabohsapa ta, chhiena rarô-ypa patlôsa hraoh leipa ta mei cha eima pachhai thei hapa a châ.

Liahsa eima pachhai khai tawhta eimâ kaw dina lâta hmo yzie hiahrihpa ta eima khih VCP Puhpa Ngâtu cha kei chapiapâ na ta, râh a kaw kâ pathao laihna dâh eina chhopa chata na pahlaw leithei vei!

Mei cha Lôdu chavah ngiakâh lâ tawhta kaw kâ pathaopa he vaw châ ta..kaw kâ laih lymâpa ta thlih chakuapa nata hi mualuapa pathlipa ta a kaw hmôpâ lymâpa vâta a kaw kâ chatlie kawpa he vaw châ ta..eima VCP reisa ta, *Vichadih eimâ pahleipahlô daihmâ cha zaw!*..

VCP chata, *Râh a khiepa tlyma chavah a siepazy ta mei patih ei ta, a ia thlâh ha nota ama kaw siesaipa ma a châ ma, châhnamei tlôna thi mâh leipa ama pazawpa ma a châ thlyu aw..atahmâno he cha râh chawh ta, thlih hi pha kaw ta, mei sih chyta chhaota râh a pakâ tyhpa he châ ta..eimâ sohsi via awpa â ngiah hmeiseih..râh kã hapa zydua kha kheita eima taopathi khao vâ? Pazu-pavaw chyh via aw ei ta, ziza a nano heih aw ta..cha zydua hlâta pei chaipa cha eima khih ta eima nie chaipa, Lôdu chavah a kua via ngâkaw awpa tlai hih* a tahpa cha nah liata a paro pachaih!

Ei pachãna liata avaw luah tua chaipa, *EI CHÂHNAMEI TLÔNA KHAW!?* tahpa he za châ leithei vei!

Ei châhnamei tlôna, paliesao ha tua leipa ta ei vaw pazawpa tawhta he rãh kãpa he avaw thao sala ei pangiasa chai ha bá! Cha a pei rimâ chy! Kheita tao thai'pa châ khao tlô vâ! Ei chãhnamei tlôna ei thy chakhyh tu hapa vâta RAONA reitiahlei ei tlôkhei ha he zaw!

Râhhmâhpa liata châhnamei tlôna rai thy chakhyh beih khao aw vana! A pei tu haw! A pei tu haw!

He zâ he cha, a mô cha rei lei, ei mo hmahta vi vana tah thei awpa a châ!

*Ei châhnanei tlôna khaw!?*