Pakhy zâ EPL : Liverpool, Man City, Arsenal nata Man United tlô ei ta - Tottenham tlô vei ei

Liverpool chata Manchester City hlâta point kha ta â sâh via chy awpa ta Watford cha ama tlyliah Anfield liata ama vaw pahnie.

Sadio Mane nata Virgil van Dijk zy ta goal 2 rairie khô ei ta, Divock Origi ta goal kha vaw khô chhi hrapa ta, Jurgen Klopp nahta a nawhtazy he 5-0 ta pahniena ama to.

Liverpool a chadai haituhpa, Manchester City deikua tlôna hmi hmô lei daihmâ ei ta; Sergio Aguero ta Penalty tawhta goal khô vei mawh chhochhi sala cha West Ham kha 1-0 ta pahnie vei ei tahpa a sia thlâh ha. Ama vâhnei ta point 3 sôh kawpa ama hlaopapua.

Chelsea manager Maurizio Sarri kaovaihtuhpa Kepa Arrizabalaga pakhaihsa leipa ta, atahmã nota ama duasu mopa ta cha no-âh â chhih tah thei awpa ta Tottenham cha 2-0, ta ama pahnie. Chelsea goal 2 -pa zy he Pedro ta a khôpa nata Kieran Trippier ta ama kao lâta a pangia tlamawpa tawhta a ngiapazy a châ.

Tottenham Hotspurs he 3-na liata ypa ta, sâkhana Liverpool hlâta point 9 ta amâ hnai via chy. Chelsea deikua 6-na liata ama y pazao chy aw.

Arsenal ta ama ry liata ypa Manchester United chhao pazao lymá chy awpa ta nata Champions League liata su to awpa ta 4-na duasu peimawhzie pahnopa ta 5-1 ta Bournemouth ama pahnie.

Mesut Ozil nata Henrikh Mkhitaryan Gunners goal 5 hryta goal 2 za khô tua ei ta, he he Bournenouth lâ tawhta Lys Mousset ta goal kha ta a kaw chhy palie ta, Arsenal a zâ tlie hmeiseih heih ei ta, Laurent Koscielny, Pierre-Emerick Aubameyang nata Alexandre Lacazette zy ta goal kha sai za khôpa ta 5-1 ta pahniena topa ta, 4-na liata ama y pazao ha heih.

Manchester United cha 5-na liata y pazao awpa ta 3-1 ta Crystal Palace cha ama khichhaina tlyliah liata kei pahnie ei ta. Romelu Lukaku ta goal no khôpa ta, Joel Ward ta Crystal Palace châta goal kha a za khô tawhta, Ashley Young ta United cháta a za khô heih hrapa a châ.