Pakistan Media zy ta India Pilot Pakistan ta ama patupa riahphazie cha ama reithai kaw

Pakistan ta IAF Pilot ama patupa, MIG-21 zawtheina IAF Pilot Abhinandan Varthaman cha India chata, “Thlaita papuapâ ha awpa ta” Pakistan cha a pahnosa.

He hawhta a châ nona heta Pakistan Media zy chata IAF Pilot Abhinandan he reithaipa ta, a riahpha zie zy, ano a patutuhpazy âvaw dyuhpaliena dâh zy nata ama patu hlâta ta châ peimawhpa (Important Document)-zy cha cha-eih cha-eih ta a palâ khai ha, tahpa ta ama thâtihthiehpa zy liata ama palâsa.

Pakistani thâtihbu âlâluah kawpa Dawn ta a palâsana dâhta cha : He Pilot heta Pistol a chakaih ta, Pakistan râhchhôh liata avaw tla tawhna heta a chyhsapa hmôpa chapaw thyudyupazy cha a yna su cha ‘India ma Pakistan maw?’ tahpa ta hiahrih ta. He a hiahrihpa hryta thyudyupa pakha chata so thai kawpa ta ‘India a châ hih’ tahpa ta palie ta. He IAF Pilot Wing Commander Abhi Nandan, ‘India’ tahpa a thei patawnah ta aly kawpa ta hladyu kaw pathluah ta, thyudyupazy cha ‘India râh kheihawhpa su?” tahpa ta hiahrih heih ta. Thyudyupa pakha ta Qilla'n tahpa ta â chhy.

Pilot chata a ky a pasa kaw, tahpa kaw reihpa ta, a dâh a phi kawpa vâta ti doh awpa lapa awpa ta thyudyupazy cha ahaw ta.

Cha hawhta Pilot ta India reithaina hladyu a pathluahpa cha thyudyupa hryta râh thapasana palôh a phaohpazy chata tao thei khao leipa ei ta, “Pakistan army zindabad” tahpa ta ama kaw awh. Cha hawhta ama awh patawnah chata Pilot cha a pistol cha a vâ lâ paheihpa ta kaw ka ta, thyudyupazy chata thlai alô amâ huahpâ lymâ hra.

Mo ta hmôtuhpa pakha, Razzaq ta a reina dâhta cha, chapaw thyudyupazy heta Pilot he a chadaipâ lymâ ha ei ta, Pilot heta a hnôhlâ a sy laipa ta nata Pistol ta ano a chadaituhpazy mopa-aihpâ laihpa ta a sy lymâ ta. He a hnôh lâta â sypâna chô heta thyudyupa ano a chadaituhpazy pachhiparyna châta a Pistol cha a vâ lâ kaw ka heih tyh ta; buakha chhôh amâ chadai tawhta Pilot he ti a opa liata a zaw pangiapa ta, a byh chhôh tawhta châ peimawhpa kaw thaohpa ta, thokha cha cha-eihpa ta palâ ta; thokha cha ti liana chata nypa ta, a padâ khai ha hra, a ta. The boys kept on asking him to drop his weapon and in the meanwhile one boy shot at his leg, Mr Razzaq said.

He Pilot riahpha kawpa he Pakistan media zy ta reithai hmeiseih ei ta; a riahphana nata a zachhihna pabohsa awpa â chhuahna dâh zy, a râh châta â piepasana zy cha ama reithai kaw.

India chata Pakistan ta Pilot ama patupa he ‘Geneva Convention’ dâh nata phôh hawhta mohôh awpa ta Pakistan sawhkhâ cha a pahnosa ha hra.