Autorickshaw driver ta a rickshaw liata chyhsa ta ama mypa Rs 10 lakh a hmô. Kheita a tao vâ he?

Hyderabad : He hawhpa chyhsazy vâna heta khizaw he pha pachaih ta, thlalôh â chhih via heih tyh. Hyderabad liata Autorickshaw driver pakha chata a rickshaw liata a kiahpazy ta ama mypa, sahria chhôh liata Rs thysy 10 (lakh) cha a hneituhpa tlua papuapa ta a pie pakhua ha heih.

He kô 30-ta uhtheipa Rickshaw driver J Ramulu ngâchhihna heta he phusâ mytuhpa unawh panopazy palôh a pahnie tu hapa vâta lymâ châta Rs 10,000 ama pie.

Ramulu, he Devarakonda, Nalgonda district, liatapa châ ta. Sri Ram Nagar Colony, Gachibowli liata pakhy noh khata chyhsa pano kei pathliepa ta, âvaw lie na lâta amâ tyuna liata sahria ama mypa cha hmôpa ta, a za pahypa cha phusâ, Rs thysy 10 (Lakh) avaw y thlâh haw. Ano ta a reipachhuahna dâhta cha, “Sahria cha pahy na ta, ei za mohpa cha phusâ hyhkha avaw y thlâh ha” tahpa ta.

Ramulu chata, “Bâhta cha ei thlahzohpâ ta. He sahria ei hmô nona heta Jubilee Bus Station (JBS), Secunderabad, ei vaw râpapuana su ei tlô daihmâ ha. Kha chyhsa panopazy khata JBS tawhta na hmâh pathao ei ta, Gachibowli liata ei pachhô ei, tahpa a kaw thei papua na ta. A chatlie baikhaipa ta a râ palie lymâ heih na ta, Sri Ram Nagar Colony, ama chôna su lâ cha ei ngai lymâ ha heih,” a ta.

Ramulu chata “He hawhpa zie phusâ he cha kô 2 chhôh phasa kawpa ta ei hro ei hmâna thei aw. Châhrasala cha hawhpa hro lâthlôh a chhih awpa cha khoh bohbi vana. Chavâta ahneituhpazy hnohta ei pakua ha heihpa a châ,” a ta.

Ramulu heta a Autorickshaw he Loan ta a lapa châ ta. Rs thysy 1.5 (lakh) loan thô awpa â ngiah thlâh ha chy ta. A nohkha hlao hra cha Rs 500 dei châ ta, ama nô he nohchareih a hlaopa ta, ama sawnah pano siku kiah haipa chyh awpa ama hnei pâ. LB Nagar liata chyhsa O tlôhpa ta khih a sa haipa ama châ.

He phusâ mytuhpa, unawh pano K Prasad nata K Kishore zy cha Ramulu ta a pachhôna su liana chata nôpo kawpa ta vaw y thlâh ha hra ei ta; ama kiah liata Police pakha ta Autorickshaw avaw râpa maih cha avaw mohpasia ngâkaw hra. Ramulu chata Police paw hmiakô liana tlai chata sahria nata phusâ cha â boh kawpa ta a pie pakhua ha heihpa ei a châ.

K Prasad chata, “Nohto niebaw zuana daoh hnei pi ta, he phusâ he O sana châta eima tahpa a châ” tahpa ta cha hawhpa chyhsa ngâchhihpa amâ tyhpa cha amâ lyzie athata ama rei.

Keimo râh liata châ ha mawh sala? Ngâchhihna pakahta athata apachu tyhpa chi nata pho Marapa hryta he hawhta ngâchhihpa he eimâ tyh tlai ma? cha leipa ta tlao ama vaw hluh kaw thei vâ ma he?.