Champions League Last 16 : Ajax ta Real Madrid ama chapie papua; Tottenham ta Quarterfinals amâ ngia

Zâhnia zâcho ta Champions League last 16 khaih 2-na (2^nd Leg) akhaihna liata Ajax ta ei 13-tlai European champions avaw châ hapa Real Madrid cha Bernabeu tlyliah liata pahlawpa ta, Champions League last 16 tawhta kô 22 chhôhta a eikhana awpa ta Real Madrid cha Quarterfinals a ngia leipa ta ama tla haw.

First Leg liata 2-1 ta Ajax heta Real Madrid he ama pahnie leipa vâta si phaoh chhieliepa ta 2^nd Leg he a khaihpa hawhta châ ei ta. Anodeikua Erik ten Hag nawhta sahlaozy heta minute 18 a khô tawhta Hakim Ziyech nata David Neres-zy goal hmâpa ta 1^st Leg liata amâ khaihna nahta pahlyhpa ta 3-2 hmia amâ sahpâ ha.

He khai tawhta daihti rei leipa liata Ajax goal hmiatuapa goal 2-pazy taopatuhpa, akhaih pha kawpa Dusan Tadic ta za khô chhi heihpa ta, 4-2 (Aggregate) ta Ajax ta Bernebeu tlyliah liata hmia amâ sah pazao heih.

 zaopa ta Champions League nyungiapa 4-na chalo achhuahtuhpa, Real Madrid ta ahrapathina to thei awpa duasu liata a duahpa ta, minute 20 a y bâ aw tahpa liata Marco Asensio ta za khô ta; châhrasala, he he Ajax midfielder Lasse Schone ta free-kick tawhta â ngia kawpa ta Ajax châta a za khô ha heihpa vâta Real Madrid châta ahrapathina tlô awpa alyu kawpa cha si a dia ha heih.

Pachyh zâ El Classico liata Real fans zy ta ama eilaw kawpa, Gareth Bale cha Solari ta first XI liata a pangiasa taraw leipa ta, a zâ ngia tawhta kao tôh deikua a chapiethlu.

Real he ama captain Sergio Ramos, 1^st leg liata âpielyuna dâh vâta khaih 2 hriena atyh haipa a hlao leipa ta amâ khaihpa â hno kaw. Ama hnôhtlâh â pa kaw.

European Club rônahpa nata laipa, Galacticos sahlaozy cha kô 22 chhôhta a eikhana awpa ta UCL Quarterfinals â ngia leipa ta chapie papuapa ama châ haw! 1^st Leg nahta pahlyhpakhypa ta Ajax heta 5-3 ta pahniena topa ta, Quarterfinals amâ ngia haw.

Tottenham Hostpur ta Quarterfinals amâ ngia!

Akhaihna hropa liata Tottenham Hotspurs ta German club laipa Borussia Dortmund pahniepa ta; kô 2011 tawhta a eikhana châ awpa ta Champions League quarter-finals â ngia awpa ta Harry Kane penalty hmâpa ta pahniena topa ta, 1^st Leg nahta pahlyhpakhypa ta 4-0 ta pahniena ama to.