Health & Lifestyle : Chanôzy châta pahno hialia awpa peimawhpazy

1. Chanô ta cha saw a phaoh nota pasana hri thie theipa chi (steroid) tlyma pain killer nata Antibiotic lâchhâh rai rai a nie lei awpa he a pha chai. He hawhpa lâchhâh a nie khiahta cha a saw hawsaihpa cha a vaw pih tita pathilaipa pasana hnei nao pachaih aw ta, palôhrupa lâchhâh liata heih akholeina (mental retardation) a tlôkhei thei hra. Chavâta saw phao nota cha he hawhpa lâchhâh thohna nie leipa a pha chai.

2. Chanô hnatlâna a phapa ta cha noh 28 padaipa ta thi hnei tyh ta; thi a hnei hluh kaw tyh khiahta cha sâhpiti nyu 3-4 doh tyh sala, cha chata thi pua hluh tu awpa a vaih thei. Sasyh thi hnei tyhna dâh pahnopasia ta, avaw hrohrua chhielie theipa a chã.

3. Pati nie khai tawhta dawh 2 chhâ a khô tua leipa ta cha sex hmâ leipa a pha chai. Dawh 2 khô hlâta sex hmâpa a châ khiahta pavyh ta pati na niepa a charieh pazao hmâ mâh leipa vâta digestion châta a pei thei kaw tyh. He heta pavyh y pahâh leipa hleikhôta hmohropa areisipasuana papua thei ta a pei kaw tyh. Chapawzy châta chhao he pahno hialia awpa a châ.

4. Chasi nota chanô-chapaw châna (sex) hmâ lei awpa. Chapaw thokha nohkhih lei kawpazy ta ama lahpinôzy chasipa paru tu leipa zy sex hmâkhei thomo awpa amâ chhuah tyh. Chasipa a pai liahsa tawhta noh 4-5 chhâ a khô tawhta ngâlâh sex hmâ tyh awpa a châ. Chasi nota sex hmâpa heta chasipa parusa tyh ta, chhiena pha lei viapa a tlôkhei thei tyh tahpa pahno awpa a châ.

5. Nawh hnei tawhta thla thôh tlyma thla 4 chhâ tlyma a khô ha tua leipa ta cha sex hmâ leipa a pha. Chapaw thokha nohkhih tu âh leipazy ta ama lahpinôzy tan aw ama hnei tawhta hâta eikhana liatazy sex hmâkhei thomo awpa achhuahpa ama y tyh. Chanôzy ta he he paryhsa rai rai lei awpa. Sex hmâ patoh tu hapa heta chhi panyu kaw chypa kha panyusa via heih ta, chhi a hliapa nata pasana hropa a tlôkhei thei tahpa pahno ngâthlâh ha awpa.

6. Khazohpa heta chyhsapa pôhpa/sapa pachiahpa he yzie hnei leipa ta tao vei tahpa he eima pahno ngâthlâh ha awpa châ ta, chavâta eima chanô/chapaw châna hmi (Pubic hair), hnapasu hmi, mo hmi, chao hmi nata bâhkalie hmizy he eima sapa liata pasana tlôkhei theipa a puapa â ngia lei n’awpa ta nata vaihtuh awpa ta Khazohpa ta a taopa a châpa vâta â ngiahna na ta miah a tuah raruah ha tah leipa liata cha ngyu rai rai lei awpa châ ta, eima ngyupa ta eima pakypa heta pasana tawhta miah pabohsa khao vei tahpa pahno ngâthlâh ha awpa. Hmi seih tu hapa/buru tu hapa chhao pha pyly hra vei. Atliata liata achupasiana ama hneipa liata cha chanô 84% zy chata ama chanô châna hmi ngyu ei ta, he hryta 50% zy ta amah mi zydua phi ama ngyu khai ha tahpa hmôpapuapa a châ.

7. Chanô cha vahpa hnei hapa a châ tlyma, laihsa a châ tlyma, a chhi hri-iah a pathaih ngâthlâh ha thei n’awpa ta khatinorai ta a chanô châna a pathai ngâthlâh ha awpa a châ. He hawhta a pathai beih vei khiahta cha chapaw a ziakhei/amôkhei beih leipa laihsakôpa (virgin) chhao hmahta châ hrasala, chhi byuhpa (ovarian cyst) thlaita hnei thei ta, a Risk â sâh kaw.

8. Chanôzy chata ama pazô ama sâh khai patawnah ta tlyma, sex a hmâ khaina châhki ta ama chanô châna ama pasipathai cheingei awpa a châ. Sex ama hmâ khai tawhta ama pazô sâh thei cheingei ei sala, he heta chanô châna khaoh liata pasana hri zy kha a pathai thei. Nohchareih chaopasyry thlapa ta, a ngai a si hra awpa a châ. He heta pasana hri nano nanopa tawhta vaih ta, hnatlâna châta a pha ngaita kaw hra.

9. Chanôzy châta cha ama pôhpa pathaipa nata ti doh hluhpa he amâ ngiah via pachaih khiahma tah awpa a châ. Ama sapa/pôhpa tawhta mathlai pua hluh leipa hmahta châ hrasala, ama chanô châna a pha kawpa ta avaotuhpa nata pathai tuhpa châta a pha pachaih. Tawhta, nama pahno chiehpa hmahta châ taraw hrasala, chaopasy ry a ngiapa nata sexy-pâpa lâchhâh he aky/apasyna daihti cha y tyh hrasala, khatinorai ta deikua a pasypa pha chai hlei vei. Chaopasyry chaoziepa nata a cha-ie tu hapa a pasypazy chhao pha vei. Chaopasyry pha chaipa cha cotton châ ta, he heta chanô châna â daihna rakhata ta avao ta, pahna (dâ) tu leipa, hupo tu leipa ta a soh tyh.

Stephenie Taylor chata, "Chanôzy heta abeinô hawhta mohôh ta khâsia awpa eima byuh kaw chyu, cha raohpa ta eima châta peimawh chaipa cha, eima chanô châna eima mohôhna kyh liata eima taochhei ha heih tyh tlô. Eima chanô châna eima mohôh phapa heta eima hri-ia pha ta, aly pi ta, eima hro phasa ta, eima vo, eima pato, hmia nata sâ eima mohôh phapa hawhta eima khopahâh kaw awpa a châ," a ta.