India chyhsa hneirôhpa Mukesh Ambani ta a unawhpa lô-O â tâh awpa pachhapapua

India chyhsa hneirôh chaipa, Mukesh Ambani chata a unawhpa leibâh thôpa ta, a unawhpa lô-O liata â tâh awpa cha a pachhapapua.

Mukesh nawhtapa, Anil Ambani cha a Company, Reliance Communications (RCom) ta telecoms company laipa Ericsson leibâh â bâpa a thô thei khao leipa vâta lô-O liata â tâh awpa châ ha bâ ta. Anil heta Ericsson he 5.5bn rupees ($80m; £60m), â bâpa ta, a thô n’awpa daihti bitaipa chhao liahsa a khô ha hra. He vâna heta Court chata a leibâh a thô lei khiahta la lô-O liata â tâh awpa ta a chôchâh a pachia.

Châhrasala, a unawhpa, India râh liata hneirôh chaipa, Mukesh Ambani chata a nawhta, a  pilâhpa nata a thisaih a zaopa cha hawhta leibâh vâta lô-O liata â tâh thlâh ha awpa cha a ngiachhie tu hapa ma a châ ma,  a leibâ he a thôpa hapa a châ.

Anil Ambani Company, RCom heta Ericsson leibâh â bâpa he zâkô târi 15 December hlâta a thô awpa a châ, tahpa ta Supreme Court chata bietluna vaw tao ha ta; he he a pie thei khao leipa a châ.

Unawh châ taraw hra ei sala, Anil nata Mukesh Ambani he khahlâ zydua ta avaw dyhryh khao leipa ei ta; ama chhôhkha company, Reliance Company chhao sâno lâta amâ vaw patlaw hapa kha a châ. He hawhta Mukesh ta a nawhta leibâ a thôpa vâna heta ama likah ziza chhao a pha via ha bâ na ta pangiasapa a châ.