Kyhpachâna : Hmoto panano theituhpa (A Collection of Short Love Stories)

Na yna su liana maihta kyhpachâna he hiezawh lymâ ma y: Na O chhôhkhaohkha tawhta pathao la. Na sawnah cha kyhpachâna pha chaipa pie la, na vahpa/lahpinô hnohta kyhpachâna thlôh chaipa, na opalyuhrizy lâta kyhpachâna chhâ thai leipa cha pie ma y. Nâma a cha vaw ngaituhpazy cha thapha viapa nata chyhsa pha viapa châna hneipa ta pathlie tyh la. Khazohpa zawngiahna a lâpapuana chyhsa châ la; na hmiaphaozie liata zawngiahna, na mopadei liata zawngiahna, na pakiesilihpa chhaota zawngiahna â hlao sala, chyhsa nâ ly-uana to liata zawngiahna a hlao mawh sy. 

- Mother Teresa

Kyhpachâna ta hlaotlohna a tlôkhei

College professor pakha heta chapaw hawtipa 200 rachhôh thâtih achupasia awpa akhohpa vâta Baltimore liata rietheipazy pahrâna liata Sociology Class pachhuahpanoh ta. Chapaw hawtipa 200-zy cha ama hmialâ daihti ama kaw saina dâh chyu roh awpa ta tah ta. Chapaw hawtipazy chata, "A hmialâ daihti a zoh kaw."tahpa ta achhyna roh chyu ei ta.

Kô 25 a khô tawhta sociology  professor hropa pakha heta cha amâ chupasiana rona châbu cha vaw hmô pasu ta. A pachupa achuhaipazy hnohna chata achupasiana hmiatuapa vaw y hapa liata hawtipa 200-pazy chô liana khata khâpa hmo a tlô tahpa achupasia awpa tat ah ha heih hra ta. Kô 25 a khô hapa liata chapaw hawtipa 200 hryta 20-zy cha su hro lâ apaihna vâta tlyma thina leina vâta tlyma ama chhichâna pahno thei awpa châ khao leipa ta, a hropa 180 hryta 176-zy deikua hlaotlohna topa ta dâhpahnopa (lawyers)-zy, dawhty (doctors)-zy nata sôhdaohpazy ama vaw châ haw, tahpa ama hmôpapua.

Cha professor cha cha hawhpa thâtih ama hmôpapuapa chata a nah charao kaw ta, achupasia via awpa khoh haw ta. Vâhneichhih kawpa ta cha chyhsa amâ chupasiapazy cha amâ chupasiana su chheihpâh liana chata khih vaw sa khai thlâh ha chy ei ta, ama zydua ta pakha pakha ta apakyhpa ta, "Kheita ma na hlaotlohna he na reihpasia aw?"tahpa ta hiahrih chyu ta. Cha chyhsazy chata, “Pachutuhpa pakha he y ta."tahpa avaw chhy chyu ei ta.

Pachutuhpa achupasiana siekheituhpa kha vaw hroh thlâh ha chy ta, tlua papuapa ta kheita ma cha rietheipa vaih liata hawtipazy cha ama duasu chhie kawpa nata hro hnabeidyna tawhtapa thaoh papuapa ta chyhsa hlaotlohpa lâta a papua thei, tahpa ta hiahrih haw ta.

Cha pachutuhpa chata thapawh kawpa nata pahneisilihna chôta, "Hmo chyhnawh kawpa na tlâ châ y," tahpa ta, "Kha chapaw hawtipazy kha kyhpachâna chôta na ei mohôh ha ei."tah haw ta. - Eric Butterworth

Khâ ei thei thlâh hapa zydua

Ei pâ ta bie einâ chhona châhki heta "Ei cha daozie he ei cha chho mâh ma?"tahpa ta. Kyh eina pachâzie a palâsana dâh cha â nano ngâthlâh ha tyh ta, a kô nata khih avaw hluh liahsa tawhta nata a hro noh a tla daihmâ ha bâ hra tahpa liahsa a sia tawhta chhao, eima likah azaokhina cha pha via lymâ ta, eimâ tlaichhaina chhao a pôh via lymâ hra.

Kô 82 ta uhtheipa avaw châ na ta thi awpa ta â mâ hanazie reih tyh ta, keima chhao chata alei kô uhtheina vâta pasa a taonazy khô para sala tahpa ei khohpa vâta pathlie awpa ta ei palôh liahsa ei tao ha hra. Pahnei khohpa ta nata liahsa ku apatupa ta kyh eimâ pachâziezy achhopa ta ei pâ chata thlalôh kawpa ta eina siesai thei ha bâ aw, tahpa na chho ta. Kei chata, "Ei pâ, na vaw thi tita la na yna liata na ngia âryh tahpa ngiana ei hnaw la y."tah na ta. Ei pâ cha kaw pahneih ta. Ei biereipa cha alyupâ lei tu ha a tah thlyu aw; Ei pâ heta pih chaneina tlyma thyuheihna tlyma he zo bohbi leipa ta. Keima tlai chhao heta zo tu hra vana, châhrasala a y thei ngyu aw, tahpa na pazosa thei awpa hmo ei tyh hlao kaw bâpa vâta a thi hapazy yna ama tahpa tawhta ngiana ei hnaw ha hrapa a châ.

Ei pâ nahta eima likah azaokhina a pha tu hapa vâta a châ-ao â chalih nona chata ei châ-ao chhao â chalih ha hrapa hawhta pua pahno na ta. A hu a chhâ pathlah hmeiseih nota thohna-O liata dawhtyzy ta a ku dâhdei chhao patu hmâ leipa ta hri-ia vaihna vâta eina pakhâ ha eipa kha ei maochhie hmeiseih hra ei.

Nohchareih ta ei pâ tawhta ngiana ei hmô thei mawh la tahpa ta thlahchhâ ngâthlâh ha tyh na ta. Zâchareihta ei mâ lâ chhâta ei hmô thei n’awpa ta thlah ei chhâ tyh hra. Noh nata daihti khô ta, thla hluh khô ta, ei pâ thina vâta mâchhie ei sana dei tah leipa ta cha khâpa hmahta hmô vana. Ei nâ he kô pangawh a khô hapa liana khata Alzheimer’s pasana vâta thi ha ta, sawchanô saw sa khi ei hnei ha hra tarawpa ta hawti viavipa hawh deita keimasasyh â pachâna ei za hnei thlâh ha chy.

Nohkha cha, chyhsa nâ thaipa (Massage thaipa) daoh liata eina vaw nâ n’awpa dei daihti hâpa ta ei pazawh thlâh ha nota, ei pâ vâna chata athata na vaw hria chaimâh ta. A thi chyta ngiana na pie awpa ta ei vaw hnaw tu hapa kha ei thaileipa khiah maw, atahna za hnei pakhua na ta. Ei palôhrupa cha cha hawhpa hmo ei pachâpa vâna chata ma a châ ha ma athaileina lai ngâsâpa ta za bie ta. Keima liata y beih leipa a pahnopasiana athata za hnei na ta. Ei hra ma mâ ma ei sa ma tahpa ta keimasasyh cha a zâ pasia na ta, ramâ liata a pahrâpa la châ bohbi vana tahpa ei pahnopasia tlôh chuh. Ei pachâna liata hmo a zâ ngiapa maihzy cha, ti â opa liata ti dikha za thlaohpa ta ti a opa a chatlaopa hawhna heta za pahno na ta, daihti naizualuahpa a hmâhpa hawhta ei pachâna nata thlahpa yzie â thlâzina chata ei no pua na pa-âh leithei vei. Hetana heta za pachâna ta, “Ei pâ thlahpa yna su tawhta bietana vaw tlô awpa kohki/ei biehneina ry liata so awpa ei chhuah tu ha khiah maw; ei taozie he pha vei, a chalihsai bâ tua sâ."tahpa ta.

Eikhapi na ta ei nâ hmi cha a siahlia kawpa ta ei hmiakô liana chata avaw lâ ta  — a pasana, Alzheimer’s pasana ta a pôhpa taolapa ta a pachâna taihta a lapa khai hapa nota a hmiaphazie hawhpa tlai khata na ei hmiakô liata âvaw lâ khaw. A sâ pawh khai hapa ta a khupa a hmi khaw. Ei nâ tlai kha châ ta, ano hmeiseihpa hawh tlaita âvaw lâ. A pasana vâta daihti reipa chhao a hnei leipa hawhta châ khao leipa ta, daihti pasih kawpa a hneipa hawh tlaita ei hmô. A ropahâhpa (Perfume) kho chaipa ‘Joy’ roh chhao thei thei na ta. Chyhsa hâpa hneipa hawhna heta y ta, reikah rai pathlie vei. Kheitazie ma ei pâ sai ei pachâ nota einâ ei hmô thei tly? Kyh kha lâta cha ei nâ hmô awpa ta Khazohpa ei vaw hiah beih leinazie a pahno na ta, a zâ thai lei kaw heih na ta. “Ei nâ, kha pasana na vaw hneipa kha la pei ei tah hmeiseih."kei tah haw na ta.

A luh cha bâhta za pasia ta, ei biereipa cha a pahno hra thlyu aw. Na vaw pakie thlu ta — a pakiena hmi kha â ngia tlaina — ao sia hrâlâ kawpa heta, "Ei saw y, ei pahno chhôhpa la kyhpachâna deita khana a châ."tahpa ta lei ha ta..

Ei yna chhôhpadâh cha eikhapi na ta ziza chakuapa ta vaw bi eta athata chasi ei tahpa vâta a kaw chatho na ta, ei palôh chhôhmaruh chaipa liana chata kyhpachâna eima pie puapa nata eima daopazy deita khana khâ eimâ thei thlâh ha tyh, tahpa kaw pahno papua haw na ta. Pasana zydua a lei tawhta chhao – Kyhpachâna la khâ a châh thlâh ha tyh.  Ei nâ pakah tawhta bie ei theipa kha ei hro châta bie peimawh chaipa châ ta. Kha daihti kha chhâzaw ta ei palôh chhôh chaipa liata a châh ngâthlâh ha bâ aw.

Ei pâ tawhta deikua ngiana tlyma hmôh mâh leipa na ta, châhrasala khatita ma la, ei pachyhparyh lei chaina daihti liata, âvaw luahpa ta, "Kyh ei cha pachâ tahpa ei cha chho mâh ma khâ?"eina vaw tah tlai aw. - Bobbie Probstein

Kyhpachâna dopa

Moses Mendelssohn, German hlapithaipa rônah kawpa mahpaw kha, hmipha sâseih tah awpa châ bohbi vei. A doh a chyupa dei châ leipa ta, a kyh apakoh ta, a pihpasipa a lyu thlâh hapa a châ.

Nohkha cha Hamburg liata sôhdaohpa pakha kei tly ta, he sôhdaohpa heta sawchanô chhithai kawpa pakha, Frumtje ama tahpa he hnei ta. Moses chata cha chanô a hmô patawnah chata kyhpachâpâ ha ta, a iah ta a zai haw. Châhrasala Frumtje chata Moses cha a pihpasina vâta saw ta vaw sa vei.

A khitlyna tawhta a O lâ â di awpa âvaw daihna noh liana chata, Moses chata a riahphana zydua papuapa ta Frumtje cha a chhôhpadâhpa liata bie a chho awpa ta kei ngai ta. Vâ manôhzy hawh tlupo ta chhithaipa tlai na a châ, châhrasala a mo dâhdei chhao avaw moh kholeipa vâta Moses cha a palôh pasa ngaita kaw ta. Ei hluh bie a chho â chhuah tawhta vâsâ ta, Moses chata noza kawna chôta, "Chyhsa ahneina he vârâh tawhta avaw thaopa na a châ tahpa he na zo ma?"kei tah haw ta.

"Uh, ei zo," tahpa ta avaw chhypa ta, alei lâ a khuh thlâh ha ta. "Khiah nâma zaw na zo ma?"tahpa ta vaw hiahrih palie ta.

"Uh, ei zo," tahpa ta achhypa, Moses chata "Na pahno ma, vârâh liata la chapaw ama vaw pih na heta, Abeipa ta ahyma a lahpinô awpa a phuahpâ ha tyh. Keichhao chapaw hawtipa ei châ nona heta ei lahpinô awpa he pahmôsapa châ na ta. Abeipa ta, 'Na lahpinô awpa la a ky abyuh aw.'na tah ta. Kei ta Abeipa hnona chata, "Hy Abeipa y, chanô cha ky byuhpa ta na tao khiahta cha a châta vâduana lai kawpa a châ cheingei aw. Ngiachhiepa ta Abeipa, chanô ky byuhpa cha ei ky liata tlao pa-ysa la, ano cha hmipha chhithai kawpa ta tao lahvâ chi.'ei tah hapa a châ” tah ta.

Cha a rei khai raohpa chata Frumtje cha a mokhaoh liata vaw mohpa ta, a palôhrupa cha a pahnie hapa a châ. A ku vaw chaluahpa ta Mendelssohn chata thlai vaw patupa ta; a lahpinô, a vahpa châta â piepasa kawpa avaw châ hapa a châ.

- Barry & Joyce Vissell

Kyhpachâna yzie

Achupasiatuhpa (Researcher) sahlao heta hawtipa kô 4 nata 8 likahta uhtheipa zy lâta hiahrihna âlyupa, "Khâpa ma kyhpachâna he a yzie a châ tly?"tahpa ta hiahrihna pie chyu ei ta; amâ chhyna chata chyhsa hluhpi pachâna apasihsa ngaita kaw. Duah vaw reih hra tua rai :

"Ei manô ta ruhsiepa pasana hnei ta. Cha apasana vâna chata a phei patoh Nail Polish (Hniasaih) hnia thei khao leipa ta. Cha cha ei mapaw ta a hmôna ta a ku zy cha ruhsie pasana vâta âpiepâ pha thei vei hrasala, eima manô phei patoh cha nail Polish hniapa tyh ta. Cha cha Kyhpachâna cha a châ” - Rebecca - kô 8

“Chyhsa ta kyh ama cha pachâ khiahta la, na moh (Name) ama reina dâh cha mo hropa zydua hlâta ânano via tyh aw. Ama pakah liata cha na moh cha âboh (Safe) hapa hawhta pachâna na hnei tyh aw." - Billy kô 4

"Kyhpachâna cha chanô ta rohpahâhpa (Perfume) â thupa ta, chapaw ta chapaw â thupa chi rohpâhpa â thu ta, ama pano pua ei ta, ama roh amâ pahnâ rairiepa he a châ” - Karl - kô 5

"Kyhpachâna cha ahy tlyma nahta pua khoh ei chi ta, hmo pahâh kawpa na dawh-râh liatapa, ano dawh râh liata âhnabeiseih rai leipa ta na paniesapa kha a châ." Chrissy - kô 6

"Kyhpachâna la naw, na riethei chaino ta cha pahneisa theituhpa kha a châ." Terri - kô 4

"Kyhpachâna la, my ta ei nâ ta ei pâ châta thopi taopa ta, ei pâ ta a do hlâta pahâh tlaina tahpa a pahno thei n’awpa ta ei nâ ta apadi ha tua tyhpa kha a châ” Danny – kô 7

"Kyhpachâna cha khatinorai ta nâpahnâpa (Kissing) he a châ. Nama tha a vaw chhâ hapa chhaota nama pano kiah rairie liata y via chy awpa nama khoh ngâthlâh ha aw. Ei nâ nata ei pâ chhao he hawhpa hena ama châ." Emily – Kô 8

"Kyhpachâna la Krismas nota hmosaipiepa na daopa pahy chi ta, cha daihti liata na kiahpâh liata a y hrapa cha a châ."

Bobby - kô 7

"Kyhpachâ viana dâh âchu awpa na khoh khiahta cha, na viasa nâ hao kawpa tawhta pathao ma y." - Nikka - kô 6

"Kyhpachâna na la naw, chapaw ahy tlyma hnohta a viahkao nâ hmie dâh, tah chi ta cha viahkao â kyh ngâthlâh ha bâpa he a châ." Noelle - Ko 7

"Kyhpachâna la chanô nata chapaw, liahsa amâ pahnopasia ha tawhta chhaota a viasa ngâthlâh ha chypa hawhpa he a châ." Tommy - kô 6

"Na tah hmeiseih leipa ta a châ khiahta cha chyhsa hnohta ‘Kyh ei cha pachâ’ tah khâ. Na tah hmeiseihpa ta a châ deikua khiahta la reih ngâthlâh ha ma y. A chhâpa la chyhsa zy heta eikha reipa he myha tyh tlô ei ta." Jessica – kô 8

Khinah zydua ta amâ chhyna hlâta pha viapa sâkha y ta – cha cha châburohtuhpa Leo Buscaglia-ta ataopasuana mopasia awpa ta ama raona thâtih a reipa he a châ. Cha ataopasuana ta â chhuah chaipa cha hawtipa, chyhsa pachâ/Khâsia (Caring) chaipa âtlyh awpa he châ ta. Cha liata pahniena atotuhpa cha, kô 4 ta uhtheipa chapaw hawtipa, ama Opa liata pawpipa pakha, alahpinô ta âpahâsai hapa a ypa he châ ta. Cha chapaw hawtipa chata, a Opapa pawpipa, alahpinô ta â pahâsai hapa vâta palôhlie kawpa ta a mohthlih chhaota atyuh thlâh ha tyhpa cha charei tyh ta. Apalôhliena vâta a chana châhki ta chapaw hawtipa cha cha pawpipa kiah liana chata a kei tyuh tyh ta. Khâpa hmahta rei hlei leipa ta, tlâ a kei tyuh thlâh ha tyh. Cha hawhta a tao tyhpa cha a nô chata eikha cha, khâpa ma pawpipa kiah liana chata a reih tyh, tahpa hiahrih haw ta. Chapaw hawtipa chata, "Khâpa hmah reih hlei vana. A cha (Cry) awpa na ei bao (help) tyh"tah haw ta.

Kyhpachâna he nyu awpa chi châ vei

Ei kha cha chanô nata chapaw thyudyupa, a viasa pha ngaitahpa, nohlychhiki akao khopa ta, lôraopa nata thaphapa ta noh nata daihti pakhôsa tyhpa he y ei ta. Ama pano chata lôh miahkha khiahma ama phao tah thei awpa ta kyh totie liata âkhyh ei ta, âmo liata azaona khâchâ a y ha khiah ma I ? tah thei awpa ta noh-lychhiki daihti vaw hmâ kho tyh ei ta. Cellphone tawhta dawh hlupi chhôh bie amâ chhopa dei chhao âdai tah leipa ta noh-y kha chhôh hmahta amâ ‘Text’ thei tyhpa a châ.

Ahy thângiah leipa ta amâ kao khona daihti liata cha khizaw pachârôh nôpona zydua he âmo châta cha hmo a y leipa hawhpa dâhdei châ tyh ta. Ama lôh-lyna nata lôh-kina cha khâpa hmo hmahta patypamâ thei vei. Cha hawhna chata noh-lychhiki amâ viasa phana cha ama palaiseihsa tyhpa a vaw châ. Châhrasala, Cha hawhta lôhkipa nata ahy thângiah leita khiahma amâ kao kho hai ama ta ngâ nona chata, nohkha cha, a chanôpa chata a Phone tawhta a viasapaw cha kei ‘Call’ heih ta, noh hrota chyh-eina reikah thlaita a dao tyhpa kha he noh he cha chyh-eina ao nata reih rai theipa y khao leipa ta. Ei hlupi a ‘Call’-pa chhaota chyh-eina reikah rai y pyly vei; ‘khazia rihmâ maw?’ tahpa ta ‘text’ a paphaopa chhaota ziazihropa ta, sikhua a dia haw!!  ‘Hmopha leipazy ta khiahma tlôthlu haw?’ tahpa ta a chanôpa cha a nôpo ngâsâ ta, zâ daihti vaw tlô ta, mokuh ramâh khaih awpa ta khôphei chô kiah cha rei lei, Opi liata dyuchhai liata atyuhpa ta, raithli chhaota zâ daihti cha pakhôsa haw ta. Cha daihti liana tlai chata nah a châta a viasapaw ta yzie a hneizie, ‘kyh a pachâ’ tahpa cha ahy chhopasia byuh leipa ta avaw pahno papua hapa cha!

A mylâ my liana chata, hnahbeiseihna khô lâ tawhta a viasapaw chata vaw call chho ta. Thaphana ao nata vâna ao chhaota chyh-ei para ta. ‘Hello, na ao nata rei ei vaw theipa la ei lyna zydua âki khai heih tlai na. Khazia maw zâhnia khaw?’ . ‘ Ei bua tu ha kha maw’ tahpa ta a viasapaw chyh-eina rei tawhna chata hmo a doleipa a y tahpa pahnothei hrasala, hiahrih awpa ta deikua riahphana rai hnei khao tlô leipa ta. ‘ Bie a chho khao lei’paw sihla na a pha thlyu aw’ tahpa ta a viasapaw biereipa chata ano liata a hriana dâh cha ahy hmahta pahnothai ei sala a ngia thlyu aw vei. ‘Khazia maw? Khazia rihmâ maw…?’ tahpa deileipa cha apakah tawhta biehropa rai kaw pua thei khao vei. ‘ Pei ei ta ngâsâ..ch’aw khiahla sy..’ tahpa ta a viasapaw ta a ‘phone’ a thiepa chhao cha vaw pahno khao leipa ta, ano châta cha a viasa lôhkhychaipa pakah tawhta cha hawhpa chyh-eina reikah châ kholopa a dao thlâh hapa cha pasa leithei vei..a hrona liata hmo peimawhchaipa  sâkha ta a puasai haw ta lei thai rihmâ awpa châ vei.

A chhôhso pachâna liana chata hnôlâ daihti ngiahbâna chata su vaw topa ta, raithli cha pakhâ thei rihmâ lei awpa ta a ô-khai liana chata za lo hawh ta. Yruna nata dytha hapa hawhta apachâna chata a chhôhso vaw bie ta. A biereipazy chata a chhôhso cha taola chanei ngâ kaw ei sala a ngia ta. A palôh cha keichheih khai awpa ta a hrohrua ngâ sala angia ta. ‘Khazia!!?’ tahpa ta a ao hneichhôpa zydua ta kaw aw papua haw ta. ‘Hnahbeiseihna chhâ n’awpa ta bie a chho heih tua rai sâ’  tahpa ta a phone cha la ta, ‘Call’ ha heih ta. ‘Hi..’, ‘Khazia ei na vaw call chi tly?’ ‘Hmo cha chho’pa hneina ta..eimâ viasa na eima pachhâsa hlâta hmo sâkha ngâlâh cha chhopa kho na ta’ ‘Um..na vaw chho tyh..’ , ‘Na pha bao ma châ..’ .. a ao zy cha lapa a châ khai ha khiah maw tah awpa ta biereipa pahno khao leipa ta, a chhôhso cha vaw kei chanei heihpa ta, raithli ti palosa hawh heih ta. ‘Chôkhazoh ryhrao leipa na a châ thlyu aw,,..’ tahpa ta a phone cha thie hawh ta. Lôh-hripa chhaota, châhna chyhpa liata hmo rohpa ta, ama O cha puasai haw ta.

Dawh 5 chhôh tlai vaw khô ha heih ta. A chapawpa phone cha vaw paro ta. A viasanô nô he vaw châ ta. A viasanô cha Car ta su ta, atahmâ he thohnah O liata âzia thlâh ha tahpa bie rarô ypa he vaw chho ta. Phone cha so parapa ta, a viasanô yna thohnah o cha pangai haw ta.

Thohna O liata chanô a ziapa chata a viasapaw ao nata reih a thei patawna chata a mo kaw padeih ta. Aviasapaw ta,‘Keima thaileipa na a châ..na vaw tlâh ti ta ei hmo taochheipa zydua vâta pasa na vaw taona zydua he..’ tahpa a rei ngâ nona chata, ‘Pha papua thei khaovana, hro thei awpa duahmo liata a duah khao vana…khazia maw bie a chho’pa na kho khao vei? tahpa deikua na chho thei la ei ly kaw aw ’ tahpa ta chanô chata hiahri haw ta. ‘ Châh-ao pha leipa hneina ta, daihti rei hro khao vana tahpa ei pahnopa vâta na palôh pachhie’pa ei chipa vâta  nah apakyh’pa ei kho khao vei’ tahpa ta a chapawpa ta a chyh-ei khai tawhna chata, hrona chata  chanô cha puasaipa ta, thina chata a pôpa cha vaw to haw ta. Vâsâ chana ao ta aw pakhua thei khao leipa ta, a viasa lôhkhychaipa ta a mohmô cheingei liata a leisapa siesaipa ta thina lytlâh a khôsaipa cha a châta cha taothai rihmâ awpa châ vei, a châh-ao pasana cha vaw pua heih ta, ei khapi ta pao ta, ano chhao cha hrona chata vaw puasai haw hra ta. Ama chhôh-marupa liata kyhpachâna anyupa chhao cha palâhâh hmâ leipa ta hrozô thochiah hawh thliepa ta lytlâh ama vaw khô haw.

Kyhpachâna he nyu awpa chi rai vaw châ vei. Kyhpachâna palâsapa heta hmo to a panano thei.

(‘Love Story between two best friends’ tahpa tawhta paliepa a châ)


- Collected & Translated into Mara by Robert B.Syuhlo..

(Ahawna - Comment nata Share awpa my kha y)