NOÂHCHHIHPA : "NA VAW MO KHAO KHÂ!"

[Ei chyhsa phaopa he chyhsa châ vei]

Rohtuhpa ~ Pachi Hlychho

"Kô 7 hlei khô hapa lia khata noh kha cha ei puhpa khitlyh awpa pathlie na ta. A châh parei awpa vata kei cha Siaha lâ a vaw lie lilaw heih chy na ta. Lengpui Airport tawhta keima deita ta  a vaw liepa ei châpa vâta a para kaw na ta, hetana chô heta Zero point ei vaw tlôpa cha motor a râhreihpa chhao â vaw hâh kaw ha bâ. Anoh noh y apahâ  leipa ta avaw râpa ei châpa vâta ei no vaw di kaw ta, Zero khih thopi daoh miakha liata thopi doh awpa ta a ngia heih tua na ta."

Ei Driver a tlâhleipa vâta Road Transport Officer hnohta Driver pakha na vaw tuapa awpa ta ahaw na ta, Asawm Khaila, a sapa chiehleina  vâta 'Driver spare' hawhta ypa  na vaw tuapa ta. Ano he ei tupapa, driver pôhraoh phapa, reingiahpa,  a  reih hluh leipa, Hindi BA nata general line liata Plus 11 pass-pa a châ. Rai a hmô ryhpaoh  leipa vata District Council liata Driver ta  hria haipa a châ. Ahmo atyhpa noâhchhih kawpa a viasa driver thokha ta ama reipa thâtih he lâpôh pasih kawpa nata yru chhih kawpa amymiah n'awpa ta hiahhrih na ta. He he ahmo atyhpa eina chhopa cha a châ. Ano rei dâh hawhta  rei a chhuah sih la.

"Thopi cha a para tu leipa ta doh na ta, thopi mâ zy ei pie khai  tawhta ei sanâh moh na ta,  8 pm vaw paro ha ta, Zero khih puasai na ta, Zero khih khô, lâpi â pakohpa kawh kawpa  ei khô awpa chy cha lâpi kiah liata  chanô pakha  â duahpa ta a bâh vaw chaluah ta, 'Siaha taih ei vaw kiah hra aw' na vaw tah ta. A sâ ta a hmia a khu hapa vâta a hmi cha hmô pasia thei leipa na ta. Atahmâ hawhpa daihti liata chanô ano dei ta siepa cha khôsai awpa aryh leipa vâta Motor cha  paduasa na ta, vaw kiah ta, a râ heih na ta. Pano eima châpa vâta thlalôh â vaw chhih via ta, bie deikuala a chho  ma pi.  Zero nata Titlao chavah likah he lâpí a kotlâ kaw ta, lâkuchakhipa chhao a hluh kaw. Lâki ki 3  eimâ râ tawhta cha ei chyhsa phaopa cha chyhsa châ vei tahpa pahno na ta. Ei noâh kawpa cha, lâpi âkó kawpa liata a chatlie ngâsâpa ta eima râpa cha, a piepâ rai rai leipa ta, a sâbu dah dei chhao a zaw  vei. A hmialá khâchâ moh ta, a piepâ leita ta a tyuh thlâh ha ta. Ei kei moh nata cha a khu chhyh ha ta, a hrolâ phie â heih hmâ ha tyh. Ei palôh a vaw pahno chhyh hapa a châ thlyu aw. A hmi hmô awpa ei khohpa vâta, ano baih lata lâpi â kopa cha ryhpaohna ta lapa ta kei moh tyh na ta, a hrolâ phie â heih hmâ chhyh ha ta. Cha hawhta ei mo tyhpa cha vaw   khoh leipa ta, 'Na vaw moh khao khâ' na vaw tah ta. 'E, ei mopa a khoh vei he tly ma,' tah na ta, moh khao hlei va na. Ei noâh kaw heihpa la, lâpi pakaopa (pot hole) liata a râ na ta, motor thata â chatho no chhao ta a piepâ rai rai vei, â chalih katô thlâh ha. A râ lymâ pi ta, vâsâ ta chhâtlâh khô pi ta, thlahchhâna o tlô pi ta, thlachhâna o eima tlô chyta liata 'He lia he ei chô khoh' na vaw tah ta, motor paduasa na ta. Motor o chhi cha ano kho ta a pahy ta, chô ta, motor a khô awpa chy ta, ochhi cha ano kho ta, taphai a  khaw heih ta, noâh ei tah hmeiseih. Ei vaw ngia hôhhia leipa vâta vaw châ ta, Zero khih opâh liata motor a vaw kia no chhao kha, motor â vaw ngia hlâta motor ochhi kha ano kho ta a pahy ta,  a tyu tawhta ochhi kha ano kho ta a khaw heih tahpa ei pahno papua. He dei châ vei,  ei pahnopapua heihpa miakha cha, motor liata a piepâ leita ta a tyuh ta  a sâbu dâhdei chhao a zaw leipa kha, motor seat  lia kha a vaw tyuh leipa ta, a ruapa liata a tyuh thlâh hapa kha vaw châ ta,  kha vâ tlai kha a châ thlyu aw, lâki liata motor â hiesaw ngâ awpa ta steering eikhapi ta ei  pahieh raruah tyhpa chhao khata a pie rai rai leipa kha a vaw châ.

Mortor light pakhaih thlâh ha na ta, motor  light khaihpa liata sie ta, moh thlâh ha na ta, thlahchhâna o kiana step mia nona a tly patawnahta  meikhu lâta a lie ta, a lei salyu ha. Alyu chaipa la châhnamei pazy pi ta eikhapi ta eima pakah tawhta a khuh vâ lâ eima tô papuapa  he alyu chai" tahpa ta eina chho.

Noâh tah kaw na ta,  

"Na chi ma,?"

tah na ta,

"Chi hra vâ, thlahchhâna o khôta liata khôkhâh kha kiah na ta, a duah heih na ta, thlahchhâna o cha za moh  na ta, khâpa hmahta hmô khao va na, pyury chhao thei awpa y khao hra vei"

tahpa ta eina chho.

Saiso lâta

"Thlah a chhâ hapa chhao a châ thei,"

tah na ta, eima pahnei ngâ kaw.

He thâtih he noâh â chhih kawpa vâta khi eima tly heih nota eikha cha  eima nô Thomas nô nata viasazy  chho pachhuah hra ei na ta, vaw khoh tiarâh leipa ei ta,

"Cha hawhpa thâtih saina na reih, bie hropa  reih thlâh tyh"
na vaw tah chhiechhu hôlô ei ta,

Photo : He hmo atyhtuhpa Asawm Khaila

"Aw, ka-uapa  hmahta thie thei leipa thlahhmihpa/lyurâhhripa a chipa nata â vy heihna  ahnia ha tawh  chhao ta Ahmawh y awpa ta  khâ  pangiasa hnolo ngâpa, Malaria PF vâta palôh maorih pâ ngâpa  Ahmawh siepa hawhta pachâ ta papua awpa ta pawtlohpi  thua chaikie chalo ta, chanô chieh leipa nata tlâhleipazy pheipi athiloh i ngâna taihta  chakie bâhsai mah leipa eima hluh kaw chypa hela aw!" 

tah na ta  ei chalih ha.