Mara Book of the Year 2018 châta Rev RC Nôhro châbu atlyhpa a châ

Mara Writers’ Club (MWC) ta kôchareihta avaw pachhuahpanoh tyhpa, kô kha chhôhta Mara châbu a puapa hryta pha chaipa atlyhna, ‘Mara Book & Magazine of the Year’ atlyhna chata a kô 5-n’awpa ta zâhnia zâ dawh 6:30-pa khata NSV Studio, New Colony, Siaha liata pachhuahpanoh heihpa châ ta. Kô 2018 chhôhta Mara châbu a puapa hryta pha chaipa châta Rev RC Nôhro châbu ropa, “Mararâh liata Thâtihpha Laiseihna” tahpa cha BOOK OF THE YEAR 2018 ta atlyhpa châ ta; Board of Mara Literature ta thlachareihta ama papuapa, “HLA NATA BIE MAGAZINE” cha “MAGAZINE OF THE YEAR 2018” ta atlyhpa a châ.

Video : 

Zâhnia zâ ta Book of the Year 2018 phuahna daihti a hmâna he Puhpa Thâly T.Azyu, CF, Environment & Forest, MADC, Siaha chata khichhailaipa châpa ta â hmâkhei ta, Rev C.Beima, Moderator, ECM Assembly, Siaha ta Daitiziehpa hmâna a hnei.

Video :

Khichhailaipa Puhpa Thâly T.Azyu biereipa tlâhpipa :

1) Khizaw liata râh paduapathituhpazy he chyhsa chyhta dei châ ei ta, reipachhiena tao hnolo ta hmialâ tôh lymapazy he châ ei ta, Mara Writers Club chhao he chyh kawpa châ hra u la, Mara Chi nata Pho châta eimâ pahniehna lai kawpa nama châ.

2) Mara zawpi zydua Mara Writers Club he sôh nah thih ta eima bao thei leipa chhaota, reipachhie leipa ta ama hriapasanazy za thaipa ta reikah chhâta eima bao awpa he eima maohphaona a châ. MWC heta Chi nata Pho châta ama hriapasana zydua liata alynabie ei hlâ.

3) Khizaw liata râh â sosâh viapa maih ama chi nata Pho, reih pabohsa ta palaiseisapa he ama pachâ peimawh chaipa a châ.

4) Mara saw deikua, Chi nata Pho liata eimâ môkua chypa ta pahno na ta pei ei tah kaw.

5) Khazopa ta chyhsa yzia n'awpa ta lyuribâkhâh a tao khaipa hawhta keimo Marapa zy chhao lyuribâkhâh miah a taopa khai hra.

6) Ahy rai he a pikheipa reih a pahlei noh cha a zachhihna pahlei ta, moto ta ama moh dâh â nano kaw tyh.

7) Awnanopa hmahsiena eima tah nota eima Reih ta Biehrai y thlâhpa ta Reih hropa Biehrai eima hmâh ngâkawpa he Khazopa hmosai piepa â Ly leipa tlu châ ta, Khazopa chhaota aly hr'aw vei. 

8) Khazopa reih miah piepa, á ngia kawpa nata yzie hnei kawpa ta paryparipa he eima hmâh tlôh vei khiah a palôh pasasa aw pi ta, 

9) Khizaw liata reih hluhpi he Khazopa rônahzie phualuahtuhpa châ ta, reih eima pahlei nota hmo hluhpi leina a hria tyh.

10) Reih he hmohroh hneipa chi kha a châna pahnopa ta eima pabohsa hialia awpa â ngiah chaipa a châ.

Book & Magazine of the Year lymâ alatuhpa nata mopakha nata py palyupalihna a daopazy :

Book of the Year 2018 – “Mararâh liata Thâtihpha Laiseihna” – Rev RC Nôhro

2-na : “Mara Phôhpa” – Laicho Nôtlia

3-na : “Eima vaw pahno hra awpa ta” – TA Chhôhu

Magazine of the Year 2018 – Hla nata Bie – BML, MADC

Award nano nanopa daotuhpazy :

J.Vialua Award – S.Ngôdei

Dr.S.Hrachu Award – Rev.RC Nôhro

A.Zakia Award – Siaramo, MTP Branch College Vaih Thâtihbu

Special Awards

B.Dawphô, Editor-In-Chief, The Times of Maraland

Bizai Azyu – Kumâ Museum hneituhpa, Tipâ