Mara History : Pâkao By liata ahmpakhyna (Nochhi nata Notla Mara Achhaihna)

Pakao cha Tyulai Lôchhei khihpa, beinô chavah ngiahkâ liata a ypa by a châ.

Kô 1939 liana khata, Notla Mara râh liata Missionary raihriatuhpa, Lakher Pioneer Mission nata Nochhi Mara râh liata Missionary raihriatuhpa, American Baptist Mission-zy cha, Râhri (Boundary) chôchâh pasia awpa ta Pâkao By liata British sawhkhâ su sâkha liata ahmôpakhy ei ta. He Pâkao By he Ngiaphiah nata Chapi khih likah liata a ypa a châ. He Pâkao By ahmôpakhyna he Mara râh, Nochhi nata Notla apachhaihna kyh liata hmo ngiatlâh kawpa a châ.

He Pâkao By ahmôpakhyna liana heta Notla Mara râh vyuhpa ta ahlaopa, Lakher Pioneer Missionary-zy :

1.Rev RA Lorrain

2.Rev AB Lorrain Foxall nata Marasaw pano – Rev Hratlu Nôhro nata Marasaw hryta Pastor chahnao pa-i tuachaipa, Rev K.Heisa-zy a hlao ei ta.

Nochhi Mara râh tawhta, American Baptist Missionary-zy :

1.Revd.Dr CU Strait

2.Revd.Dr CW Cope-zy amâ hlao hra

He ahmôpakhyna liata chhithatuhpa/Chairman awpa ta Thompson, Deputy Commissioner, Chin Hills-chhao a hlao hra ta, ano he biechhâna taotuhpa hawhta pachâpa a châ hra.

He ahmôpakhyna liana heta, Rev RA Lorrain-zy nata American Baptist Missionary-zy cha athata a eichhia ei ta, râhri pachhaih n'awpa dâh liata ama pachâna dâh alyu thai khao vei. Chatanahchata, kha hlâ tawhta Lakher Pioneer Mission ry liata avaw y zôzaw tyhpa, Lytu nata Lôchei râh zydua nata Vyhtu chizy pahrâna hluh viapazy, Chapi chi nata Ngiaphiah chi yna khih thokhazy cha American Baptist Mission mohôhna ry liata so awpa ta bietluna taopa a vaw châ haw.

Rev RA Lorrain cha, khahlâ tawhta Siku nata thohna amohôhna liata hmahlana avaw hnei hana khihzy mohropa ku liata so awpa a châ awpa cha a palôh a pasa kaw hrapa a châ. Anodeikua, tao theipa hnei tlô leipa ta, a khisawzy khona châ ha tlô ta.

He râhri awpa reipahmaohna liana heta Bietluna taotuhpa, Thompson chhao a palôh bua kaw ta, charâta bietluna tao thei hra vei. Chatawhta cha, ama reipahmaoh ngâpa a ôpa chhôh liata a pahrâpa zy cha khotlyna pahneisa haw ta.

“Lakher Pioneer Mission ry liata y awpa ma nama kho ma American Baptist Mission ry liata y ta, Chin Hills a ôpa chhôh liata y awpa maw?” tahpa ta hiahrihpa châ ei ta. Chatawhta cha, âmo chata, American Baptist Mission ry liata y ta, Chin Hills, Burma râh lâta abai awpa amâ tlyh haw.

He hawhta Burma râh lâta liata y awpa amâ tlyhna chhâpa ama reipa miakha cha, India/Notla Mara lâ amâ bai khiahta cha, alôh/Salt chiepadâh leipa ta dao thei khao aw veih ei tahpa ama chipa vâta a châ ama ta.

He daihti nona heta cha, Alôh he Chittagong tawhta Demagiri siepahliepa ta phaoh tyh ei ta. India lâ amâ bai khiahta cha sievawna akhiakhi ta, lâpi phapa a y leipa vâta rairuna amâ tyh aw tahpa ama pahno thlâh hapa vâta a châ ama ta. A chhâ chaipa miakha cha, India tawhta alôh ama la khiahta cha, âmo tlaita alôh cha ama khih lâ phaoh byuh aw ta, cha cha hmo rairu ngaitapa a châpa ta ama pahno. Chin Hills lâ amâ bai khiahta cha, alôh cha arainao kawpa ta ama phaoh thei ha aw.

He ama khotlyna heta Rev RA Lorrain palôh pasasa ngaita ta, Mara râh a ôpa chhôh hawhta a pachâpa nata a sawzy hawhta a vaw pachâpa zy ta Notla Mara râh/India lâ a bai leipa ta, Burma lâ a bai awpa ama khona cha pahnothai a ru a ta ngaitapa a châ. Chatanachata, Notla Mara râh nata Nochhi Mara râh râhri cha pachhaihpa vaw châ haw ta; Kô 1947 liata India nata Burma râhri pasiapanôpa a châ nona khata, Pâkao By liata Missionary-zy ta râhri ama vaw pachhaihpa ch a pyhpa avaw châ hapa a châ.