A hawti nota thohna ama kachheipa vâta a mo chao ha hrasala UPSC Exam 2019 liata â roh patloh!
UPSC ry liata Civil Service Exam he India râh liata Exam tloh a ru
chaipa châ ngâthlâh ha chy ta. He liata aroh patloh theipazy chhaota za hlao ei
ta, pasâhsa ama hlao kaw hra. Atakô 2019 liata UPSC Exam a tlohpa hryta thâtih
nahcharao kawpa, Satender Singh thâtih he vaw reih la, kheihawhpa kao liata
chhâ ma la nâ thôhkhei cheingei aw.
Satender Singh he atahmâ ta UPSC ry liata Civil Service Exam liana
khata Rank 714-na châ ta, na vaw mo pahnai kaw thei ngyu la y; châhrasala,
mochaopa ta UPSC Exam a roh patloh theipa, Satender Singh he nota châ vei.
Amroha City, Uttar Pradesh a pihpa Satender heta UP puasaipa ta Delhi
ngai ta, a chô liata hmo a tlôpa, atanoh taihta a y pahâhsa leituhpa vâta UP he
a puasaipa ama châ.
Indiatimes ta amâ pakyhna liata, Satender heta UPSC Exam awpa ta
âchhuahnohna dâh nata, a mo a chaona dâh a reipa he vaw reih hra tua :
Thohna do leipa ta ama ka
(Injection)-pa vâta a mo a chao!
Pôhpa pachiahpa hropa âvaw khaihly leipa chhaota, mo ta eima hmô
thei khiahta palôh chhao aly via tyh tlai aw ta, hro chhaota yzie a hnei
viapachaih tyh hra; châhrasala, vâduana vâta eikhapi ta khizaw vaw zoh ta,
zohna ry liata khâpa hmahta hmô thei leipa ta vaw y ha la, kheita hro na hmâh
vâ he?.
Satender heta a mo a chao pathaona dâh he hawhna heta a rei -
"Kô 1 nata khophie ei châ nota, pneumonia pasana vâta thohna-O liata
mohôhpa châ na ta. He thohna-O liana heta thohna a do leipa ta kapa
(Injection)-pa châ na ta, he thohna heta mota ei hmô theina parao lymâpa ta, ei
mo avaw chao hapa a châ. He noh rakha tawhna heta ei khizaw cha a leidia hapa
ta pahno na ta, atanoh taihta tao thai a ru ei tah hmeiseih" a ta.
St. Stephen's College vâta a hro
â nano
Satender he Hindi medium government school tawhta achupapuapa châ
ta, he vâna heta India râh liata College phapa ta reipa, St' Stephen's College
liata â ngia thei hra aw, tahpa he a saduthliena liata y beih vei. Kô 2009
tawhta 2012 taihta BA achupa ta, Satender chata College liata daihti a hmâpa
cha a hro pananotuhpa tahpa ta a rei.
Satender chata, "He college liata ei vaw pazao nona heta,
Hindi siku puapa ei châpa vâta Mongyuh reih chhao cheih thai leipa na ta. Ei
viasanahzy chhao chata cha hawhpa college phapa liata ei daihti kaw hmâh lai n’awpa
dâh cha na pachâkhei ei ta, eina ngiaroh khei ngaita kaw ei. Hmoto cha keima
châta cha no-âhchhih chaipa sai tlâ châ", a ta.
College liata daihti a hmâpa vâta hlaotlohpa a châ zie reihpa ta,
Satender chata, "He College heta kei heih a kho leipa tlai he a kalachhôh
liata nâ vaw lypangiapa ta, hmototie na pachupa tan a chhihtha ta, ei
hlaotlohna he College vâta tah leithei vana. English, hrozie nôchâ, palôh dopa
phaona dâh, hmo akhaihna lâta saina dâh, achuna nata hmo pahnothaina zydua he
College ta eina piepa tah leithei vana. College heta chyhsa pakha ta miah a
papua" a ta.
UPSC châta achhuahnohna?
Atahmâhlâ thaina hmâpa ta taopa, mochaopa zy châta châ reina ‘screen
reading software’ hmâpa ta châ achupa, Satender heta he Software a hmâpa heta
mohropazy hawhta châbu nata thâtihbu rei thei awpa ta athata a bao hrapa a châ.
Anodeikua mochaopa a châ hapa vâta athata rairuna deikua a tyh
leithei vei. Hnabeidyna vâta a châhta cha UPSC Exam hmiachhy â chhuahpa cha
hnôh a sy sai awpazy a chhuah tyh ta; châhrasala, chhyuna a piepa ta, a tôh
hnolo heih tyh.
Khazia Civil Service?
Satender chata Civil Services Exam awpa â tlyhna chhâpa cha,
pahaona a hmiachhy khohpa vâta a châ, a ta. "Civil Services heta pahaona
nano nanopa hmiachhy awpa na pie ta, he he ei tlyhna chhâpa a châ. He pahaona
zy heta y molo thei lei awpa ta a cha tuah raruah tyh” a ta.
Satender heta MA (International Relations) cha JNU tawhta patlô ta.
MPhil a tao hleikhôta, PhD tao awpa ta a moh â roh pangia ha hra. UPSC exams he
ei 3 a hmiachhyna liata hlaotlohna a to hapa a châ.
Satender ta a hro chhihthana châta bie â vaopa heta eima pachhâsa
tua aw -
No comments