Islamic State riahrupa chhihthatuhpa Abu Bakr al-Baghdadi âvaw luah ha heih

Kô 2014 July thlâpâ tawhta khizaw mohmô liata a hmi a palâsa khao leipa, Muslim riahrupa py  ‘Islamic State’ luhpa, Abu Bakr al-Baghdadi cha zâhnia khata IS ta Video miakha ama papuapa liata âvaw luah ha heih.

Islamic State luhpa Abu Bakr al-Baghdadi cha ko 5 a kho tawhta video liata avaw luah (Photo: Twitter/@Natsecjeff)

He Video, ‘Al-Furqan Media’ ta zâhnia zâlâ ama papuapa liana heta, Baghdadi he a phei chavia khaipa ta â tyu nopa palâsapa châ ta; a kiah liata Meithei sohpa ta, a hmiakô liata a ypa chyhsa hropa zy deikua ama hmi a siapa ta palâsapa châ vei.

He video liata âvaw luah hlâna heta, Baghdadi he Mosul liata Muslim achhyna-O liata bie a rei nopa hmôpa châ ta. He IS luhpa, kô 2015 liata zawtheina hmâpa ta a yna ama tlahnaona liata hmah athata phaohpa he, he video liana heta cha a hmah phaohpazy chhao liahsa a tlâh hapa a lyu kaw.

He video liana heta, Baghdadi heta, Sri Lanka liata hmotlôpa cha Baghouz, Syria liata IS riahrupa py pahniepa ta ama yna phuhlana a châ, a ta.

Video lâchhâhta a thaipazy ta he Video he achupasia ngâkaw ei ta. Baghdadi hmeisehpa tlai ma a châ, tahpa sia mâh vei.

Abu Bakr al-Baghdadi he US sawhkhâ chata a luh mâ liata $25 million reih ta, ei hluhpi cha a thi hapa hawhta pathâhsapa a châ tyh. He hawhta Video sâkha liata âvaw luah heihpa heta khizaw thlahlôh a pachhihsa lei kawpa hawhta pahnona a lai kaw.