LIALAIPI Nochhi MTP Gen.Conference liata MTP Gen.HQ : Siaha President biereipa

1) MTP heta Aims & Object eima hnei. He zydua liata Mara chi nata pho châta asosâna nata kao nanopa hmahsiena hleikhôta paritheipa adyuna nata Ku raihria pasâhsapa ta ngâchhihna adona chôta râh chakao awpazy a châ.

2) MTP ta â chhuapazy he vaw paduatuhpa nôpawzy khata Khazopa bie tlychakapa ta ama phorâpa châ ta, MTP chakaona he Khazopa khozie a châ.

3) Py thokha liata po-oh kawh hra vei sala MTP lia deikua, rietheipa nata hneirôpa, molai mochyh, âchuhaipa nata â chu leipa, mo to amâ tlôna su châ ta, eima râh hmahsie n'awpa ta pôhkhapa nata reiraoh kawpa ta keih chakâkhoh awpa a byuh ngaita kaw.

4). Sawkha ryureina vâta lyuribâkhâh maniah haih ta, India Mara, Burma Mara tahpa ta reikah eimâ pathliethlu tyhpazy he pasa ngaita ta, eima likah liata kheihawhpa lyuribâkhâh a ypa chhaota ochhóh khaokha liata pahrâkhohpa nata pilâhpa eima châna khâchâ pahnopa ta tha apasapa nata kyh apachâ rairiepa ta Mara Chi nata Pho châta hriakhoh awpa he eimâ ngiah ngaita kaw.

5). Tanoh Mara saw ta byhnâ hluhpi eima tona miakha cha Nochhi Mara foreign lia ypazy ta Mara reih ta Abeipa ama reithaina nata Mararâh liata pahrâpazy ta Abeipa moh ama padona he notla Mara saw zy chhaota Byhna eima to hra.

6) Pei ei tah kawpa  cha Nochhi Mara sawzy township sâ 3 ta pachhaihpa a châpa he châ ta, Matupi Township & Township hropa liata ypa Mara saw zydua eima Chi châna khâchâ pahnopa ta Mara chi nata pho châta adua tyma aw he eima maohphaona a châ.

7) Eima Mara reih he pasôpa ta pabohsa lyma sih la, Missionary zy ta Mara saw zydua pahno khai thei awpa ta Biehrai nata Hlabu reih, Reih hlypa Tlôsai reih he eima palaiseihsa lyma awpa chhaota eima maohphaona a châ.

- LB Thatlô