Mobile phone 'top-up' liata sôh hmâh hluh chaipa Mizoram

Aizawl: Mizoram liata Mobile phone subscriber 10.76 lakh ypa ta, he he Mizoram maluh 10.97 lakh (2011 Census) nahta amâ kho daihmâ.

Kô 2018 Statistical Handbook papuapa liata palâsapa a châna dâhta cha, Mizoram liata, Bharat Sanchar Nigam Limited (BSNL) â hlaopa ta Telecom company 5 y hai ei ta, henahzy ta kô 2018 chhôhta Subscriber ama hneipa pahlyhpakhypa he 10,75,316 a châ.

Airtel ta Subscriber hnei hluh chaipa ta, 4.40 lakh subscriber hnei ta, BSNL ta pazipa ta, subscriber 2.08 lakh hlâta hluh viapa a hneipa hawhta palâsapa a châ.

Aircel ta 1,80,980 subscriber hnei ta, Reliance Jio-1,60,102, Vodafone-75,280 nata Idea ta 10,181 ama hnei hra.

BSNL, Indian sawhkhâ Telecom company he kô 2003-2004 tawhta Mizoram liata pathaopa châ ta, ama pathao tua no heta Subscriber 2,450 deita ama hnei.

Airtel nata Aircel zy he kô 2006 nata 2007 liata pathaopa ama châ.

Mizoram liata mopakha ta atlâhpipa ta mobile top-up/SMS pack/Internet pack châta thla kha chhôhta ama hryuhpa cha Rs 170 châ ta, he he India râh liata cha a hluh chaipa hawhta pahnopa a châ.