MP-zy ta MPLAD Fund ama hmâh phahnai ma? MPLAD Fund hmâ chhie chaipa State khâpa maw?

India râh liata daihti nata noh, tha nata zâh, sôh nata thih pahryuh chaipa, Atlyhna cha eima hmiata liata a y ha heih. Kô 2019 Lok Sabha atlyhna ta a ki tlô pathao ha ta, Campaign nata Public Meeting bie nata thâh a hluh ngaita kaw bâ heih.

Kô 2014 liata India zawpi zy ta ama vyuhpa ta ryurei awpa ta amâ tlyh patlohpa - Members of Parliament (MP), Lok Sabha zy ta kheita ma kô pangawh a khô hapa chhôh khata ama Members of Parliament Local Area Development (MPLAD) Scheme fund ama hmâh tahpa India Today ta amâ chupasiana he eima moh tua aw.

Union Ministry of Statistics and Programme Implementation ta a palâsana dâh liata cha kô 2014 liata MP atlyhpatlohpazy ta kô 2004 nata 2009 liata MP atlyhpatlohpazy hlâta ama MPLAD Scheme fund hmâh hluh via hlei vei ei, tahpa palâsa ta; ama MP fund a hmâh phahnai leipa ama hluh kaw, tahpa a palâsa.

15^th nata 16^th Lok Sabha liata MPLAD Scheme fund ama hmâ leipa zie cha 214.63% ta kaw pôh ta. 14th Lok Sabha liata MPLAD Fund ama hmâ leipa nahta pakhopâpa ta chhochhi cha MP Fund hmâ leipa he 885.47% a châ.

14^th Lok Sabha MP (2004-09) zy ta sôh ama hmâ leipa tlohpakhypa cha Rs 176 crore tloh ta. He he 15^th Lok Sabha liata 213.21% ta kaw pôhpa ta, MP Fund ama hmâ leipazie cha Rs 551.25 crore po a kaw tloh ha.

16th Lok Sabha liata ama hmâ leipa nahta pahlyhpa ta chhochhi cha Rs 1,734.42 crore a kaw châ ha.

He hawhta a châ nona heta, Government of India ta MPLAD Scheme châta sôh a pie papuapa tyhpa cha 14^th Lok Sabha liata Rs 14,023.35 crore a pie papua nota, 16^th Lok Sabha liata cha Rs 11,232.50 crore lâta a tla pahnai ha.

He hawhta sawhkhâ tawhta MP Fund pie papuapa he chyh via ngâkaw taraw hrasala, MP Fund hmâ leipa sôh tlohpakhypa deikua a hluh via ngâkaw.

MPLADS Fund cha khâpa maw?

Kôchareihta India râh su nano nanopa tawhta atlyhpatlohpa MP to hnohta ama bia chhôh liata hmahsiena raihriana awpa châta sôh, MPLAD Scheme ry tawhta Rs 5 crore piepa châ tyh ei ta. He scheme ry liana tawhna heta, MP zy ta ama bia chhôh District nano nanopa liata biehneituhpazy hnohta ama Fund ry tawhta raihria n’awpa dâh ama pahnosa tyh.

He MPLADS Scheme ry tawhna heta Achuna (education), Hnatlâna (health), Pathaihna (sanitation), Agriculture tawhta lâthlôh taona (construction of roads) hleikhôta hmahsiena rai nano nanopa hria theipa châ ta. MPLAD funds hmâ n’awpa dâh achhihthana liata â rona dâhta cha MP zy ta ama bia chhôh liata hmahsiena raihria ama hria awpazy cha vâtlâh/khihtlâh châta daihti reipi chhôh châta hmâh phahnai thei awpa chi zy, khihtlâh nata vâtlâhta amâ ngiah hialiapa hmahsiena raihria liatazy a châ awpa a châ.

MP tota ama bia chhôh liata hmahsiena raihria angiahpa zy cha pakhâta ta achupa ta, rohpapua aw ei ta. Chanahzy cha ama raihriana awpa su/District liata biehneituhpazy siepahliepa ta ama hria tyh aw.

MP ta raihria awpa pahruana/pahnosana a pie tawhta, ama raihria awpa nahta ahniahnipa liata biehneituhpazy ta mohpasia aw ei ta, amâ chupasia tawhta nata ângiahpa nata byuhpazy ama mokhei tawhta sôh ama pie papua tyh aw. MP pahruana hlâta hluh viapa sôh biehneituhpazy ta ama pie papua awpa châ vei.

MP-zy ta khâpazy ama hnei thei/hria thei?

16th Lok Sabha liata cha, MP zydua châta Rs 13,637.50 crore sopa châ ta, he tawhna heta India sawhkhâ ta Rs 11,232.50 crore a pie papua.

MPLAD Scheme ry liata hmo peimawh kawpa eima pahno awpa cha he Scheme ry liata sôh pie papua/hmâ awpa tat ah hapa rai rai cha pakua thei leipa a châ (Non-lapsable). Cha yzie cha a kô heihpa liata â ngiapâ theipa a châ lymâ.

He dei châ leipa ta, India sawhkhâ ta he hawhpa châta sôh a pie papuapa tawhta a pôhna (Interest) zy chhao MPLAD Scheme châta hmâ theipa a châ. 16th Lok Sabha liana khata, MP Fund pôhna he Rs 818.26 crore a kaw tloh.

India STATE zy hryta Fund hmâh pha chaipa nata hmâh chhie chaipa

India state nano nanopa liata MP Fund, MPLAD funds hmâh phapa hry liata, India liata State nata UT 37 hryta MPLAD funds hmâh phapa 4 deita ama y.

He hawhta a châ nota, 16th Lok Sabha pôhpalôhpa liata Fund hmânazie cha 91.84% a châ.

Assam cha MP Fund 81.63% hmâhpa ta, hmâh chhie chaipa châ ta, Rajasthan (82.12 per cent), Lakshadweep (82.2 per cent) nata Tripura (82.39 per cent)-zy ta ama pazi.

He hawhta a châ nota, Delhi MP zy ta ama Fund hmâh pha chai ei ta (115.13 per cent), Chandigarh, Telangana, Puducherry nata Sikkim zy ta ama pazi (ama zydua heta MP Fund 100% ama hmâh).

MP mopakha liata BJP MP Ramesh Bidhuri ta a MPLAD funds hmâh pha chai ta. Lok Sabha MP, Delhi South tawhta a tlohpa, Biduri heta a MP Fund 182.96% a hmâ.

Mizoram MP ta MPLAD Fund hma leipa Rs 3.14 Crore a hnei.

Prime Minister Narendra Modi, Varanasi bia tawhta a tlohpa heta, a MP 97.33% hmâh ta. A MP Fund hmâ leipa he Rs 2.27 crore a lai.

Congress president Rahul Gandhi ta a MP Fund 110.52% hmâh ta, Samajwadi Party paduatuhpa Mulayam Singh ta 88.54% a hmâh hra.

India Today ta amâ chupasiana tawhta â lâpa cha – 16^th Lok Sabha MP zy heta, 14th nata 15th Lok Sabha MP zy hlâta ama Fund ama hmâh phahnai lei via, tahpa a châ.

- India Today