Pakhy Zâ EPL : Manchester City ta Liverpool ama chhao ha heih

Manchester City ta Cardiff pahniepa ta, Premier League hmia asahtuhpa Liverpool chhaopa ta sâkhana liata ama kaw y ha heih.

Premier League liata â zaopa ta ei charie pahniena a to hapa, Man City heta Liverpool ta saduthliena ama vaw hnei tyhpa, EPL Nyungiapa chalo hra awpa ta thapi ama phiana cha ama phie thlâh ha heih thei.

Atahmâ Season liata a piepha kawpa, Pep Guardiola mohôhna ry liata tily chahra kawpa hawhta ama hmiakô liata avaw duahpa maih chatôh pathla lymâtuhpa, Man City heta Season kha chhôhta Nyungiapa 4 chalo thei awpa duasu liata a duah hai ei ta. Anodeikua hmialâ daihti pahnochhielie theipa a châ leipa heta hnabeiseihna mohropa châta a taopa thei hra.

Pakhy zâ EPL akhaihna liana heta City châta Kevin de Bruyne zâkô Di 22 tawhta a eikhana awpa ta minute 5 a khô dyuta tahpa liata hmia amâ sahna goal za khô ta, Aymeric Laporte ta ball avaw piepa cha a zâ chadaipa ta, Cardiff kao chhôh liata a kâ lâ tawhta a za khô hapa a châ.

Manchester City ta ball to pazao lymâ ei ta, daihti ryhpaohpa hnei pazao lymâ hra ei ta, 2^nd Half amâ pahâ hlâta liata Gabriel Jesus ta a chachôhna ta ball a supa tawhta ball a vypa cha Leroy Sane ta za khôpa ta, 2-0 ta pahniena ama to hapa a châ.

EPL tawhta ama tla n’awpa Point 5 ta â bohpa, Cardiff heta City he pahnie lei kaw ei ta, City kao dady cha rei lei, City kao ama chadiechadâ chyh kaw. Junior Hoillet ta a chapiepa deikua City kaohâtuhpa ta vaw pakhâ vei mawh sala a goal thlâh ha thei.

City thyudyupa Phil Foden a piepha kaw heih ta. Daihti ryhpaohpa ei no hnei ta, anodeikua khô thei vei.

Goal ama khô chhi khao lei tawh tly cha, Manchester City he 2-0 ta tlô ei ta; Goal difference liata Liverpool hlâta goal 9 ta â sâh via ei ta, khaih 32 nairu liata Point 80 hmô ei ta, Liverpool ta Point 79 ama hmô hra. Liverpool heta Chutyh noh liata Southampton ama hmiachhy tita pahniena ama to deikua khiahta la City he Point duasu liata ama kaw chhao thei pyly heih hra.