Short Story : Ei Sawchanô

(He phôh chyupa, palôh hria kawpa nata palôh pahnie kawpa he reih hropa ta ama ropa, Mara reihta paliepa a châ. He arohtuhpa he a moh pahnopa châ leipa ta, FB liata ama post-pa lapachhuahpa a châ.) 

Kô 25 ei châ nota lahpinô hnei na ta. Ei lochona daihti ei kaw hmâh pathao dyuta khiahma ei tah ngâ nota pawhrâpa duasu liata ei kaw duah haw!

Sawchapaw matlupa châ na ta, ei nâ nata ei pâ ta eina dao ngaita kaw ei. Châhrasala satlia ei kaw châ thaota no tawhta ei viasa hluhpi zy hawhta sahma aru lâta dopa nata laihsa pakaohpakâpa cha ei paphasana zie he châ kaw ta. Â lâhâhpa liata ei châna hmeiseihpa palâsa hlei leipa ta aru-nga lâta a pielyupa cha ei dyuthâna zie a châ ngaita kaw hra.

Sôh nata thih liata eima rairu muarua hlei leipa vâta hro cha athata ei hmâh kaw hra. Chanô nano nanopa a pakaohpakâ na ta, a châhta cha â raohpa ta chanô pano pathôh a pakaohpa chhao ei hnei tyh hra. Châhrasala eina ai patawnah ta ei siesai thlâh ha tyh ei. Palôh pasa kawpa ta ei sopa zy chhao ama y ngâkaw hra aw. Ei yzie cha pha vei tahpa ta keima sasyh ta ei zâ pachâ no chhao a y tyh hra. Châhrasala ei hrozie cha ro awpa a ru tahna ta, a chyuna zie ta, ei daochhao ngaita kaw.

Eima nô, ei lahpinô nah heta daihti rei chhao a pazi hmâ leipa pi ta. Chârasala chanô ei vâ-iapa hry liata cha ei chhôhso na pahnie chaituhpa a châ. Cha hleikhôta, ano he awnanopa khâchâ â pabaipa, pihpathi pha kawpa he châ chho ta. Ei nâ nata ei pâ chhaota ama khoh kaw hra. Chatanachata, eimâ khoh tawhta a thla 6-na liata eimâ hnei hapa a châ.

Cha hawhta lahpinô ei hnei ha hrapa vâna chata ei hro chhao a ly kaw hra ta. Keima mopakha chyhsa châna lâ tawhta chhao a taopathi awpa ei chhuah ngaita kaw hra. Ei hro chhao athata â thla ta. Sahma nata laihsa hropa ei pakaoh-pakâ tyhpazy chhao pathlie khaipa ta, ei lahpinô kiah liana chata khâ ei y ngâthlâh ha tyh.

Eimâ hnei tawhta a kô 1 nata â khophie rachhôh liata sawchanô khochhih kawpa hnei pi ta. Eimâ lyzie cha rei thei’pa châ vei. Ei sawchanô sâhmia hnazô ei tyh tua chai no khaw... Nawh hneina room tawhta nurse zy ta a kaw pyh papua ei ta, ei ly tu hapa vâta khatita ma ei lyna mothlih a za loh tahpa rai a thei hmâ vana. Ei hro liata ei hmo a tyhpa hry liata cha ei ly chaina daihti a châ tah leithei vana.

A mahpaw ta a moh châta ‘Beinônai' tahpa bi ta. Â ngia tah muarua taraw vana, châhrasala, thlahpa pathaihpa ta a piepa a tah ha tawh tly cha, thla awpa chi châ khao tlôh leipa ta, a phaoh pazao lymâ hapa a châ. Châhrasala, 'Nunu’ tahpa ta eima aw tyh.

Vâduachhih kawpa ta Nunu hleikhôpa he cha saw hropa rai rai sa thei khao leipa pi ta. Dawhty nah ei saohiah ngâkawpa chhaota yzie rai hnei thei vei. Eima nô hra cha a hnatlâna rai pha thei leipa ta, palôh â tymâ kaw thlâh ha tyh hra.

Eima chhôhkha khihsana deikua a zie-y kaw ta, sawhkhâ rai zakhei a chhih lei kawpa hria ha hra na ta, eima rairu muarua vei. Ei raihriana vâta Siaha tawhta Lunglei lâ apasie pi ta, chatanachata eima nô nata ei sawchanô zy chhaota eima pathôhta khihsa eimâ paryh ha hra.

Nunu chhao cha eima saw hnei chhôhpa a châpa vâta dao ngâsâ ha pi ta. Eima chhôhkha palysa chaituhpa a châ hra. Office ei bâ patawnah ta ei lahpinô nata sawchanô hnazô a tyh awpa angiahtiah lei kawpa ta O lâ thlai ei pangai pâ lymâ ha tyh. Âmo hlâta tlaichhai viapa hnei leipa na ta, âmo chhao chata na vâ ei ta, eina tlaichhai ngaita kaw ei tahpa ei pahnopasia kaw hra.

He hawhna heta eima chhôhkha thâtih he tlâ chhâ sala ei tah kaw dia...Châhrasala â kaw thao dyu awpa tlâ châ tlô!

Kô zy vaw thieh ta, ei satlia nota ei hro kha vaw siesai mâh tiarah vana. Eikha cha Office liata ei hrialâhpazy nahta pati niepahmaoh pi ta, ei viasazy ta khâchâ einâ hnaw hapa vâ ei ta nata, eina dycharao hapa vâ ei ta ei siesai hapa, sahma cha ei doh ha heih. Ei satlia nota athata vaw doh chiehpa ei châ hrapa vâta thlai a iah chata na zai pâ ha heih ta. He zâ ta pari hmahta ei dipa, Nunu nata a nô hmiaphaozie liata no-âhna â baipa kha my thei khao vana...

Pihpathina hmeiseihpa hnei leipa na ta, nohchareihta sahma sei liana chata â tâh via lymâ na ta. A thaota nota cha thlai ei pathleih heih aw tahna ta, châhrasala sahma chata eina pahnie via ngâkaw tahpa deikua my vana. Sahma chata amao-oh thei leina nata diathlâna na pie ta, ei satlia no chhaota pathleih thei sala ei tah tyhpa, chanô pakaohpakâpa liata ei tlaitlao ha heih. Ei sôh lapangiapazy chhao cha sahma do n’awpa nata ei laihsa a pakaohpazy palysa n’awpa ta hmâh lymâ haw na ta, eima O chhôh khaohkha duasu deikua nohchareih a rao via lymâ.

Nohchareih pari hmahta a din a ta, a châhta office bâ patawnah ta O lâ a di leipa ta zâ reina taihta laihsanah zy charei-charâ kheipa ta daihti hmâh na ta. Sôh liata rairuna ei hnei leipa vâta satlia hluhpi hlâta laihsa a pakaohpakâna kyh liata ei dyutlai via ha. Pawhrâpa ei châ tawhta satlia-laihsa hro ei kaw hmâh pathao ha heih tah leitheipa châ vei.

Sahma doh hluh via lymâ na ta, ei pathi hra chhie via lymâ ta. Hmo chyhnawh kawpa liata ei hiehâh patoh kaw ta. Ei luh a pahiah lei nota cha ei zie-y kaw ta, palôh paso kawpa phaohpa ta a taopathi awpa zy chhao ei khoh kaw tyh, châhrasala â daih parei thei vei. Ei sahma do tyhpa nata laihsa ei pakaoh tyhpazy hlâta ei yna dâh tao tuh chaipa nata riethei taotuh chaipa zy cha ei sawchanô nata ei lahpinôzy cha ama châ.

Zâ kha chhao ei dâhryhpa hawhta zâ dawh 11 rachhôh ta a din a ta. Mydi Office ei kiah hlâta eima nô ta,

"Atazâ la a vaw di patoh via awpa a chhuah la, Nunu kô 8 tlohna, a pinoh a châ khaw naw. Zâpati zy chhâ la dôhpahmaoh hmâ awpa ta..." a tahpa chhao ei vaw my liahsa ha heih.

Eima Ochhi ei za pahy awpa cha a chhôh lâ tawhta avaw hrai ta, cha chata ei sahma paripa palôh pathyupa ta, chybâlâkhâ châ awpa ta eina tuah raruah ha heih. A paro kawpa ta awhpâna chôta athata O chhi cha a chô na ta, eima nô chata china vâta a chalyupâna chôta kaw pahy ta,

"Nunu paw, nâ vaw di ha naw, atazâ la thlih hluh tu ha ta ei vaw hrai ha kha maw..." tah ta. Châhrasala cha hawhta reikah nai kawpa ta bie a kaw reipa chata ei hiehâh-ruchhôna pathyu via rili ta. A pasa pâ kawpa ta a viahkao cha phâpa ta, reikah chhiehru kawpa ta tahna chôta a hmia liana chata chabai pâ lymâ na ta.

Eima pyury liana chata Nunu a môpa chhao cha a kaw hra ta,

"Ei pâ....khazia...????"

tahpa ta chana chôta eima likah liana chata vaw tla ta. Ei paripa hiehâhpa vâta ei mo zohpa chata ano chhao cha eikhapi ta vaw nâ na ta, O bâ liata â kei pazeipâ ngâkaw.

Noh hrota cha ei sahma paripa hiehâhpa ta ei lahpi nata saw ku pathla leipa ta beihphiahzy tlâ pazaw tyh na ta, athata a hrâhnao ei na ta, ku ngâsâ la pathla beih vei ei na. Cha hawhta ei ypa chhao chata chi kawpa ta a chalyu ngâkaw tyh ei ta. Chhôhkha pawhrâ chaipa, chhôhkha vaihtuh chai awpa chipa ta ei lahpi nata sawchanô cha amâ chalyupâ ngâkaw tyh. He â chhochhi he cha ei sie pasihpâ ha. Châhrasala ei hiehâhna sie pazao lymâ chy ta, eima nô cha O chhi lâna chata tôh lymâ na ta,

"Pua pâ ha tyh, he O chhôh liana heta cha hmô hoh khao vana...he O chhôh liana heta vaw kua thei khao aw va chi"

tah na ta, khôtho lâ nâ papua na ta, O chhi cha ei hraipâ ha hra.

Khôtholâ cha eima nô chapa pyu cha a hla via lymâ ta, a chhâna lâta a chana ao nata reih chhao â thei thei khao vei. Nunu cha kei moh na ta, a paona kiah liana chata avaw tyuh ta, a luh vaw chahnao ta, na chi hmi kawpa heta a mochaki ta na vaw moh heih tyh ta..

Ao chahrâh kawpa heta, "A mô pâ ha tyh" kei tahna ta..a sihna-ina chôta Room lâ â ngia ha ta.

Ei sahma paripa vâta O chhôh ziza ei paraopa cha pai pathao ta, khatino ta ma ei vaw mô tahpa chhao pahno vana, mâ he vaw sa na ta.

Ei mâ liana chata lôkâh â sâh kawpa liana heta vaw tla daihmâ ha na ta, ei nô vaw po kaw ta. Châhrasala ei ku hiakhalâ raihrie he eima nô nata Bawihtei heta vaw patu ei ta,

"Tei hnolo ma y....."

tahpa ta na vaw pasyu ngâkaw ei ta. Châhrasala a chhâna lâta cha na patu pahnie ngâsâ khao leipa ei ta, lôkâh liana chata ei vaw tla ha awpa he châ ta, ei chi tu hapa cha athata a kaw tlieh chaimâh na ta, ei kaw hra hapa a châ.

Rakhô liata a mô leipa ta sitting room dyuchhai liana heta ei vaw chie pathlahpa he châ ta. Obâ liata sanâh a tawhpa cha kei moh na ta, my dawh 4:15 sikhua a châ. Liahsa ei tlâh ha, zâhnia zâ ta ei hmotaopa peizie chhao ei kaw pahno lymâ ha hra.

A chatlie baikhaipa ta thyu para na ta,  Nunu amôna chhôhpadâhpa lâ a kei ngia na ta, vaw y rai rai vei. A nô a pazi hapa na a châ aw, tahna ta, khôtho lâ pua na ta, O chhi chhao â vaw pahy khai thlâh ha.

Khih deih mâh leipa ta, athata vâ suah ta. O chhôh lâ thlai a ngia heih na ta, nohthy nata torchlight la na ta, eima nô nata Nunu tlua awpa ta vâpi suah ngâpa ry liana chata ei pua lymâ ha heih.

A thaota liata cha pangaipa chhao hnei hlei leipa ta athata a râ na ta, châhrasala khataihlâ ma ama ngai tahpa chhao pahno leipa ta cha hawhta a râ chakhyh chakhi thlâh hapa cha â supa ta pahno leipa na ta. Buakha a pahâ na ta, cha nona chata no-âhchhih kawpa ta ei palôh liana heta, 'Achhyna-O lâ vawh tyh...' eina vaw tahpa heta pahno na ta. Chatana chata pangai awpa chhao ei pahno vei tawh tly cha, aparaparô kawpa ta Achhyna-O lâ cha ei ngai hapa a châ.

Achhyna-O ei kei tlôpa cha ei kâchhiepâ kaw ta. Kô 2 daihmâ apakhy khao vana tahpa a kaw thei papua na ta. Châhrasala ei palôh liata ao chata a ngia awpa ta khâchâ na tuah raruah ta, cha hleikhôta a chhôh liana chata eima nô nata Bawihtei cha ama y aw tahpa ngiapâna khâchâ hnei na ta, chatana chata ei ngia haw.

Ei zâ ngia patawnah chata mohmia pasaih na ta, maihsâh hmiakô liata a pakhu-paneih khaipa ta eima nô thlahchhâ ngâpa he kei hmô na ta, a kiah liana chata Nunu cha avaw mô thlâh ha ta, a luh cha â vaw pahly khai thlâh ha.

Ama kiah liata a kei râpâ lymâ awpa he khoh na ta, châhrasala a zâ nawhtawh pakhua heih na ta, dusawta ta kei pangai na ta, ei pyury a thei patawnah ta eima nô cha avaw heih ta, a hmi cha padâh ngâsâ thlâh ha ta, a pôhpa zy cha mohôh phapa châ vei tahpa â hno kawpa heta zao kari-karo thlâh ha ta. A laihsa nota a ngia kaw hrapa nata sapati panyuh kaw tyh hrapa, cha hawh ngâsâ ta âvaw nano thlâh hapa chata ei palôh hria leithei vei. Eina vaw hmôpa cha a no-âh hmia kaw ta, a kiah liana chata thlai kei ngaipa ta,

"He liata na vaw y thlâh ha naw?" tahpa deita cha rei awpa ei pahnopa a châ.

Eima nô kiah liata Nunu, a luh poh ta pahlypa ta a zia thlâh hapa cha moh na ta, a mo a paso hapa vâta â mô hapa a châ na ta pangiasa na ta. Ama kiah liana chata a zâ tyuh hra na ta, Nunu luh cha za hria na ta, a sah ngaita kaw, a chasipa â sâh kaw. A zo lâta ei nâpa vâta O bâ â kei chhuhpa kha a pasa kawpa he vaw châ ta. Ei mô chhôh khata vâsuapa hryta a nô kei tlua ta, Achhyna-O lâ ama pano ta amâ vypa he vaw châ ta. Ei ku ta ei za veipa cha dusawta ta a mo kaw padeih ta,

"Ei pâ, miah a ngiahthai mah y" kaw tah ta. A kaw ngiahma na ta,

“Nunu, ngiahthai ahawna awpa khâpa hmahta y vei, keima he ngiahthai a ngiah viapa cha ei châ” tah na ta. Cha tawhta a mothlih kaw pa-ô khaipa ta,

"Ei pâ, ei nâ nah heta kyh cha pachâ ngaita pi ta, na châta thlah khâ eima chhâ ngâthlâh ha tyh..châhrasala naw ei pâ (a hu kaw so ta) nâ ly n’awpazie ta y thai hra tlôh leipa pi ta miah a ngiahthai ma y...''

kaw tah heih ta. Nunu nata eima nô cha moh tyh na ta, rei awpa rai pahno leipa na ta, keima sasyh â haona deikua ta bie leithei vana.

Bie kaw reih achhuah na ta, ei chachôhna liata khâchâ na hnaoh ta, Nunu pyly chata bie kaw reih heih ta,

"Ei pâ, ei thi tawhta ei nâ he ahyta vaw mohôh aw?" kaw tah ta,

cha hiahrihna chata na pahlaw leithei vei. Cha tlupo ta ei sawchanô cha thlah a palôhnakhi ta eina vaw hmô khao leipa chata ei chhôhso he a daih pasa chaimâh.

"Nunu, thi rai rai aw va chi, na tlâh para ha heih aw, thina chôchâh zy reih kha y"

tahna ta ei kaw cha papua haw. Nunu nô chhao cha a mao-oh thei khao vei..eima pano chata athata kaw cha pi ta..

Cha hawhta eima cha nona chata Nunu chata ei ku cha vaw patu ta,

"Ei pâ bie nâ taih ma y.."

"Uh, Munu, khâ maw reih tyh"

A nô ku cha kei patu heih hrapa ta, ei mokhaoh ta liata na vaw mohpa ta,

"Ei nâ he daochhao sai khao leipa la, sahma doh khao hra leipa la, tawhta....vârâh lâ na kaw kiah hra aw tahpa bie nâ taih tyh...ngiachhiepa ta" kaw tah ha ta.

Cha ahawna pathaih kawpa nata dycharao kawpa chata ei chhôhso cha pakei leithei vei. Eima nô kei moh na ta, mothlih hryta kyhpachâna mopadei ta na vaw moh ta, ei lahpinô nata sawchanô hmahta châ hra ei sala, ei za ngaita kaw ei...mopathaihpa châ tlôh ei ta.

Ei mo paso na ta, ei palôhrupa zydua ta thlah ei chhâ haw. Ei hro zydua cha Khazohpa hnohta ei hlâ haw, ei sawchanô cha za moh na ta,

"Nunu, bie ei châ taih"

za tah na ta. Aly kawpa heta kaw pahneih ta,

"Ei pâ a di bâ suh u" kaw tah ta.

"Chata sy" tahna ta,  Nunu cha za chalo na ta, eima nô cha chakupâ na ta. Ei palôhrupa chata thohna-O lâ ngai pâ ha awpa khoh ta. Khihdeih pathao ha ta,  Nunu cha ei chachôhna a hniehpa ta azyhpâ kawpa heta hla kaw sa ta, a hawti nota eima pachu tyhpa,

'Chhôhkha lôhraohpa, krizyhpa chhôhkha

Eima châ thei n’awpa ta Abeipa,

Vaw pahrâ ma y, Krista nâma tlai kha

Eima O, eima pathipalôh liata.....' 

tahpa châh a kaw sapapua khai dyuta tahpa liata a pôhpa cha eikhapi ta za nai khai ha ta, a hu a chhâ pâ haw.

Ei moleina vâta ei sawchanô hnei chhôhpa Beinônai chata he khizaw he a puasai haw. Chyhsa ta na maochhie aw ei ta, einâ hao kaw aw ei.  Thaichâna bie rei awpa hnei vana.

Châhrasala, Achhyna-O maisâh hmiakô liata eima chhôhkha zydua maniah a chhipakhy tuhpa khata, a phei thaby liata miah â chhipakhy heih aw, tahpa khâchâ ei ngiapâ. Ei sawchanô ei pahlei hapa vâta, Ano, Khazohpa ei hmô hapa hawhna tlai heta, A Sawchapaw a pahlei hapa vâta chyhsa zydua he pachhapa eima châ tahpa avaw hiehzawh via lymâ mawh sy...