Sri Lanka Bomb-papa liata a lahpi nata saw 2 zy hrona lei ta, a pathliena reikah he vaw reih hra tua

Easter Sunday liata Sri Lanka râhchhôh su nano nanopa liata Bomb-papa liata a lahpinô nata a saw panozy ta ama hrona sôh kawpa pahlei ei ta; chyhsa 290 a thipa hry liana khata amâ hlao hra.

British chyhsa, Ben Nicholson nata a lahpi nata sawzy he Shangri-La Hotel, Colombo, Sri Lanka liata tlô ei ta. Bomb-papa liana khata ama pawhrâpa Ben Nicholson he a boh ta, a lahpinô Anita, kô 42, ama sawchapaw Alex, kô 14, nata ama sawchanô Annabel, kô 11, zy deikua Bomb-papa liana heta ama hrona ama pahlei ha.

Henah chhôhkha heta Singapore liata ama O nata lyu siesaipa ta Sri Lanka liata cha-yna daihti (Vacation) hmâh awpa ta ama vaw sie. Châhrasala, vâduachhih kawpa ta chhôhkha khochhih kawpa nata kyh â pachâ kawpa zy cha, moleipazy peihriana vâta khizaw liata â tyh khao lei awpa ta amâ chhaih haw! Pawhrâpa Ben Nicholson ta a lahpi nata sawzy a pathliena reikah he vaw reih hra tua.

'Mohropazy thapathyutuhpa Nô'

Ben Nicholson, he Kennedys Law Firm liata a hriapa châ ta, a lahpi nata sawzy he Shangri-La Hotel liata my pati ama dôh ngâhai nota Bomb-papa heta ama hrona a la hapa ei a châ.

Ben chata, ama lahpi nata sawzy thina chata pasana reipapua thai lei awpa pie ta, ano tlai chhao cha hmahta palôhrupa lâta athata a pabua, tahpa ta, châhrasala, “Ama zydua khata pasapa pahno hmâ leipa ta ama hrona kha leipâ ha ta, kyh kha lâta cha pasa tao tua leipa ta ama hrona ama pathliepa khata khachâ rakhama cha ei tha a padâh via tyh” a ta.

A lahpinô Anita cha Anglo-American, ano hawhta dâh lâchhâh athaipa cha "Chanô khochhihpa, lahpinô pha patluapa nata no a vâh kawpa châ ta, a sawzy châta kyhpachâtuhpa nata thapathyutuhpa nô phapa a châ" a ta.

A sawnah chôchâh reihpa ta, "Alex nata Annabel zy kha hawti khochhih patluapa, sovâhpa, mohropazy zo a moh thai kawpa châ ei ta, and Anita nata keichhaota eimâ palaikhei kaw tyhpa, ama pitloh n’awpa daihti eimâ ngiahtiah leipa ama châ”.

"Ama yna maih liata alyna nata thaphana tlôkhei ei ta, mohropazy châta alyna nata thaphapa tlôkheituhpa tlai la ama châ" tahpa ta a lahpi nata sawnah panozy thâtih a rei.

Ben Nicholson heta Thohna lâta ahriapa, Colombo liatapazy nata Sri Lanka chyhsa, Bomb a pa tawhta ano vaw baokhâtuhpazy hnohta alynabie a reipâ hra.

He khizaw he tlyzaw lei awpa hmahta châ hrasala, eima mohmô liata eima kyhpachâpazy thina ku chakuapa ta a patu notapa hmôtuhpa châpa cha khatluta a pasa aw vâ! Ben Nicholson, eima cha taokhei hmeiseih.