Sri Lanka liata Bomb-papa vâta a thipa cha 215 ama tloh ha

COLOMBO: Sri Lanka liata Krizyhpa Achhyna-O nano nanopa liata nata Hotel nano nanopa liata Bomb-papa vâta hrona a pahleipa zie cha 215 tloh hapa ta, chyhsa hluhpi ta hmah ama phaoh hra. He Bomb-papa he bomb pachhopa hleikhôta Suicide Bomber zy chhao amâ hlaopa ta pahnopa a châ.

Google third party Images

Sri Lanka râh thâtih liata Bomb-ta tlahnaona rarô-y chaipa liana heta – Krizyhpa Achhyna-O - St Anthony's Church, Colombo, St Sebastian's Church, Negombo nata Zion Church, Batticaloa zy cha â nua viapa châ ei ta. Zâhnia Easter Sunday my dawh 8.45am rachhôh khata he Achhyna-O zy liana heta Bomb-he a pa.

Achhyna-O hleikhôna heta Hotel - Shangri-La, Cinnamon Grand nata Kingsbury, Colombo liatapazy chhao Bomb hmâpa ta tlahnaopa châ ta. He Bomb papa vâta a thipa zie he thâtih pachhuahpanoh hai no taihna heta chyhsa 215 ama tloh ha.

Chairman, Sri Lanka Tourism Kishu Gomes chata he a thipa hry liana heta râh hropa chyhsa 33 amâ hlao tahpa reih ta. Director, National Hospital Dr Anil Jasinghe chata râh hropa chyhsa 33 hryta 12 zy cha pahno theipa ama châ ha, tahpa ta - Poland, Denmark, Japan, Pakistan, America, Morocco nata Bangladesh chyhsazy ama châ, a ta.

Indian High Commission, Colombo chata National Hospital tawhta bie ama daona dâh liata India chyhsa 3 amâ hlao hra, ama ta. He India chyhsa 3 – zy he Lokashini, Narayan Chandrashekhar nata Ramesh tahpa ta pahnopa ama châ.

Thâtihthiehpa lapakhytuhpazy hnohta Gunasekera ta a reina dâhta cha he Bomb ta atlahnaona he ‘Suicide Bomber’ zy taopa a châ nata châ lei pasiapa a châ mâh taraw leipa ta, Katuwapitiya (Negombo) achhyna-O tlahnaona deikua Suicide Bomber taopa alyu kaw, a ta. He hleikhôta Cinnamon Grand hotel chhao cha Suicide Bomber ta atlahnaopa a châ, ama tah hra.