Thlihpi CYCLONE FANI vâta India â hrohrua ngâhai!

Thlihpi chichhihpa nata paru kaw awpa, Cyclone Fani, Bay of Bengal luhchô liata a tielaw ngâhaipa cha athaota liata dawh kha chhôhta km 200 (kmph) ta tlôpa ta pathli awpa ta reipa châ taraw ta, anodeikua zâhnia Hriaheihnoh khata India Navy zy chata, he Cyclone Fani he thlihpi ru kawpa lâta pua ha bâ ta, a pathli pasa kaw aw, ama ta. He thlihpi vâna heta Odisha, Tamil Nadu nata Andhra Pradesh zy cha ahrohrua kaw bâ ei ta. Cyclone Fani heta May 2-pa heta Odisha a tlathlu na ta pangiasapa a châ. "He Cyclone Fani he a vâ a suah thaota nota cha 175-185 kmph ta tlôpa ta a pathli aw," tahpa ta HR Biswas, director, Meteorological Department, Bhubaneswar, ta ANI a chho. Cyclone Fani pathli thei awpa duasu liata â duahpa vâna heta sawhkhâ chata National Crisis Management Committee zy cha ahrohrua awpa ta a pahnosa ha hra ei.

Biswas chata, "Cyclone Fani heta Odisha a tlathlu khai tawhta West Bengal pangai aw ta. Railway biehneituhpazy chhao he thlihpi vâna heta Train khitlyna dâh awpa panano awpa ta pahnosapa châ ei ta, zawpizy chhao khôtho pua leipa ta O chhôh tlôh awpa ta eimâ pahnosa" a ta.

National Crisis Management Committee (NCMC) chata he thlihpi pathli thei awpa chôchâh pachiapa heta zâhnia khata ahmaohpakhypa ta, State nano nanopazy hmahlana dâh awpa ta ama pachia.

Odisha liata thlihpi a pathli tita zawpizy achhaina awpa châta ryraopa Multipurpose Cyclone Shelter 879 zy chhao liahsa paryhpapao hapa châ ta. He su zy liana heta chyhsa thysâh 1 (million) amâ tlôh awpa hawhta reipatipa a châ.

Coast Guard nata Navy zy chhao ta zawtheina nata balyh zy chhao abyuhna nata ângiahna hawhta a pielyu thei awpa ta liahsa â mâ chhieliepa ta ama soh khai thlâh ha bâ. Andhra Pradesh, Odisha nata West Bengal liata Indian Airforce zy chhao amâ mâ liahsa ha hra.

National Disaster Response Force (NDRF) chata Team 41 zy cha su dahdie viapa ta pachâpa - Andhra Pradesh (8), Odisha (28) nata West Bengal (5) liatazy ama tuah ha hra.

India sawhkhâ chata he thlihpipa ta a parao awpa saipâpa ta deichhyna sôh Rs. 1,086 crore cha State 4 zy hnohta pie papua ha ta. Odisha châta Rs. 340.87 crore, Tamil Nadu Rs. 309.37 crore, West Bengal Rs. 235.50 crore nata Andhra Pradesh Rs. 200.25 crore a pie ha hra.

- NDTV