A pasa a tah tu hapa vâta a bâh/ku tai thlâh ha awpa ta ahaw

Bangladesh chyhsa, a pôhpa liata thochiah alyu kawpa kaw thao khai hapa chata, a pasa taopa cha a zie-y via thei hlei leipa vâta, a pasa taona a zie-y via thei n’awpa ta a ku cha tai thlâh ha bâ awpa a khonazie a reihpapua.

He chyhsa vâdua kawpa, Abul Bajandar heta a pasana no-âhchhih kawpa vâna heta ei 25 tlai kô 2016 tawhna khata âpa (Operation) vaw châ ha ta. Ano mohôhtuhpa Dawhty zy ta athata ama mohôh tawhta a pasana cha ama pahnie hapa ta ama rei tawhta daihti rei leipa liata a pasana cha avaw pua lilaw ha heih. He vâna heta zâkô Patô thlâpâ liana khata dawhtyzy ta ama mohôh ngâpa cha ano khota a pua syulyu hapa kha a châ.

Kô 28 ta uhtheipa, saw pakha a sa hapa Abul he atakô Nawh thlâpâ liana khata a pôhpa liata thochiah hawhta a kaw thao tyhpazy Inches 1 daihmâ ta seihpazy ta a kaw thao lymâ ha heihpa vâta Thohna-O lâ pyly a ngiakheipa a châ ha heihpa a châ.

Abul heta, “He pasana he tao thei rimâ khao vana. A zo ta a mô thei leipa na ta. Dawhtyzy cha ei bâh/ku tai thlâh ha awpa ta ei haw ei. Ei ku ama tai khiahta cha ei pasa taopa he bâhta chhâta a zie-y via thei aw” tahpa ta hnabeidy kawpa ta reikah a pathlie.

He Abul khona heta a nô, Amina Bibi chhaota a vaw châhkheipa ta, “A bâh ama tai khiahta a pasa taona he a zie-y via thlyu aw...pasa a taopa he a ta tupâ ha bâ” avaw tah hra.

Abul pasana no-âhchhih kawpa he thohna lâ reihkah ta cha, ‘epidermodysplasia verruciformis’ châ ta, pasana sôh kawpa, ‘Tree Man Syndrome’ ama tah tyhpa a châ.

He hawhpa pasana a hneipazy cha ama pôhpa pachiahpa liata thokô/thochiah alyu kawpa kaw thaopa ta, he heta athata âmo châta rairuna nata pasana a tlôkhei tyhpa a châ.

Abul duasu mopa ta, he hawhta a bâh tai thlâh ha awpa ta khotlyna a taopa he mao vei!