Copa America 2019 : Argentina ta Semi Final liata Brazil hmiachhy aw

Argentina chata Copa America semi-final liata atlôtuhpa Brazil hmiachhy awpa ta, Venezuela cha rairuna laipa a tyh leipa ta 2-0 ta Quarterfinal liata ama pahnie.

Argentina ta goal 2 ama khôpa zy liana heta Manchester City striker Sergio Aguero â hlaohli khai ta, a ei thôhna châta Copa America Final a ngia awpa amâ chhuahna lâthlôh liata Aguero he a phahnai kaw.

Argentina hmia a sahna goal he Lautaro Martinez ta a khôpa châ ta; ama goal 2-na he Aguero ta lei chahrihpâ daihmâ ta Venezuela kao lâta a chapiepa, Lautaro Martinez nata Venezuela kaovaihtuhpa Wuilker Farinez zy khaipa ta avaw lie heihpa, Giovani Lo Celso ta a nao kawpa ta a za khai pangiapa châ ta. Venezuela heta Argentina châta rairuna taopa leipa ei ta, Ronald Hernandez ta â hniapâ kawpa tawhta a chapiepa cha Argentina kaovaihtuhpa Franco Armani ta avaw pakhâ.

He he Venezuela ta River Plate nata Argentina châta kaovaihtuhpa Armani châta rairuna ama taopa a y chhôhpa tah thei awpa a châ nota, Armani he ziza liata ball a vy tyhpa liata deikua thlahzoh a pachhihsa kaw tyh.

Argentina heta Pakhynoh khita atlôtuhpa Brazil cha Mineirao tlyliah liata Final a ngia awpa tluana akhaihna liata hmiachhy heih aw ei ta;  Brazil heta Quarterfinal akhaihna hropa liata Paraguya cha daihti bitaipa chhôh liata 0-0 ta amâ pahniethaikhei tawhta, Penalty hmâpa ta tlô viapa tluana liata ama vaw pahniepa kha a châ.

Argentina nata Venezuela akhaihna liana heta, Argentina captain Lionel Messi alâluah lei kaw ta. Ball a hriahrâpa nata a phahnai kawpa ta â khaihpa y tu vei. Anodeikua, Messi châta cha Copa America Final a ngia ta, Nyungiapa chalo awpa he peimawh patlua chai aw ta; Final ei palih liata pahniepa ta vaw y ha ei ta, Chile ta Penalty hmâpa ta ei no ama vaw pahnie ha hra.