ICC Cricket World Cup 2019 : India ta Semi Finals a hnia via lymâ

India chata ICC Cricket World Cup semi-finals â hnia via lymâpa ta, zâhnia Pohbienoh khata West Indies cha Old Trafford tlyliah liata Run 125-po ta ama pahnie.

India heta pazei tuapa ta, Run 268 ama tao. He he West Indies ta Over 50 chhôhta pazei papua hmâ cheingei awpa a chhuah ei ta, châhrasala India bowler zy a pie phana zawzi ta Target ama pazei papua hlâta ama Out khai haw. India châta Bowler Mohammad Shami ta Wicket 4 la ta, Jasprit Bumrah ta Wicket 2 a la hra.

He akhaihna liana heta noh hro hawhta India Batsman zy a pie pha muarua leipa ei ta – Captain Virat Kohli ta run 72 taopa ta tao hluh chai ta, MS Dhoni ta run 56 pazei papua ta, Over chhâ chaina liata run 16 pazei papuapa ta, India he vâsâ ta Run 268-7 ama kaw tao thei.

West Indies ta vaw pazei heih hra ei ta, anodeikua a pie thei lilâ vei ei. Run 143 deita taopa ta, ei 94 vaw awpa a y thlâh ha chy tahpa ta ama Out khai hapa a châ.

India heta ICC Cricket World Cup a tlôtuhpa, England, Semi Finals a ngia awpa ta thapi phia hra awpa hmiachhy heih aw ei ta. Atahmâ hâta Abeipanoh khita Edgbaston tlyliah liata amâ khaih aw. India heta pahniena ama to khiahta cha Australia hnôh pazipa ta, Semi Finals a ngia theipa 2-na ama châ aw.