Pawsaw ngiachhie a chhipa : Hnabeiseihna mei iapa cha thina ku chakuapa ta a hmiesao haw!

Valeria cha chanô hawti aly thei kawpa nata, athyuthua pha kawpa, kô 2 hmahta a tloh mâh leipa, aly thaphana palâsana châta lâh khoh kawpa nata, a maitanô tlaichhai kawpa tlai he châ ta. A paw cha, Óscar Alberto Martínez Ramírez, châ ta, chyhsa chhyu kawpa a châ hra. Khatinorai ta raihria thlâh hapa chyhsa he châ ta, châhrasala, a  chhôhkha nata a sawchanô Valeria châta hro phasa viapa a hnabeiseihpa ta, a Bike zuahpa ta El Salvador, Mexico tawhta United States lâ a paih awpa ta â chhuahnoh ha hra. Martínez nata a lahpinô, Tania Vanessa Ávalos, zy nôvah heta USA liata raihria ta, ama chhôhkha châta sôh hria papua hluh via awpa cha ama saduthliena a châ. USA ngai awpa ama khoh chaina chhâpa cha – abohna nata ryhpaohna pha viapa ama hmô thei mawh la, tahpa he a châ hra.

Pic : Martinez nata a sawchano Valeria-zy pawsaw ri, chavah liata (Image Source - Washington Post)

Ama mahnô, Valeria mahnô Maria Estela Avalos ta a reina dâhta cha, “Ama sawchanô, Valeria châta hmialâ daihti pha viapa ama khohpa vâta USA a ngaipa ama châ” a ta.

He hawhta ryhpaohna, abohna nata ama sawchanô hneichhôhpa Valeria châta hmialâ daihti khochhih viapa tluapa ta USA ama ngaina lâthlôh liana heta KM 1000 hlei tlai sie ei ta. Ama saduthliena liata cha United States ama tlô thei khiahta cha, abohna (asylum) hiah aw ei ta, Central American tawhta USA lâ â paihpa hluhpi ta ama râh buana vâta USA sawhkhâ hnohta abohna ama hia tyhpa hawhpa cha hiah hra awpa amâ chhuah. Châhrasala, hnabeiseihna nata saduthliena zy he a châhta cha pachârôhna mothlih tlana lâta â vaw lie ha tyh!

USA ngaipa ta ama sie lymâpa cha, hâta hmiatuapa Abeipanoh khata Matamoros, Mexico liata râhri hleidy kei tlô ei ta. Vâduachhih kawpa ta he hleidy he ama vaw khaw ha. He vâna heta a mylâ Hriatuanoh a vy lilaw awpa ta ama vaw chho.

Pic : Martinez nata a sawchano Valeria (Image Source : Washington Post)

Châhrasala, khataihlâ e ama kua aw? Khataihlia e amâ rie aw? Ama nôpo ngaita kaw. Mexican râh chhôh lâta a lohpa, Rio Grande chavah tawhna chata, America râh rônahpa cha hleidy dei chata ama likah liata a pakhâ ha bâ. Martínez chata a sawchanô Valeria cha a pyhpa ta, Rio Grande chavah cha ama chaka haw. Châhrasala, cha hawhta chavah ama chaka ngâpa cha, Brownsville, Texas, USA ngiahkâh ama kei pua hlâta liata, chavah tily tlô kawpa chata chanô hawtipa, Valeria nata ano a pyhtuhpa a paw, kô 25-ta uhtheipa, Martinez cha a phaoh syulyu haw. Ama thi ma, ama hroh ma, tahpa pahno theipa châ khao vei!

A mylâ my ta Internet nata thâthbu nano nanopa liata Martinez nata a sawchanô, kô 2 chhao a tloh mâh leipa, Valeria-zy nohthlahpa, ti liata hrona hnei khao vei ei, tahpa â hno thlâh hapa ta, ti liata a pachie thlâh hapazy nohthlahpa chata khizaw pahlaw ta; chyhsa hluhpi ta henah pawsaw ama ngiachhiena chata buakha chhôhta Internet khizaw a charaopâ ha!

Henah pawsaw nohthlahpa, chavah ti liata hrona hnei khao vei ei, tahpa â hno thlâh  hapa ta ama pawsaw ta ti liata â khu lâta ama y thlâh ha nopa nohthlahpa he Mexican thâtihbu La Jornada ta papua tua chai ta, he khai tawhta Associated Press, ta a vaw palâsa ha heih hrapa a châ. Kô 2015 liata Mediterranean tilaipi ngiahkâ liata Syria chapaw hawtipa, kô 3-ta uhtheipa, ti liata tlasao hapa nohthlahpa hawhna khata, henah pawsaw nohthlahpa heta khizaw palôh a pakeichhei hmeiseih.