Noh 6 a khô tawh chhaota IAF zawtheina a lei hapa hmôpa châ mâh vei

Indian Air Force (IAF) chata noh 6 chhôh a yna chybia pahno leipa ta a lei hapa, chyhsa 13 a phaohpa zawtheina, Antonov AN-32 tluana rai cha hria pazao lymâ ei ta; he zawtheina tlana su â do kawpa ta a chho theituhpazy cha Rs thysy 5 (Lakh) ama pie aw, tahpa ama phuah. He zawtheina he hâta hmiatuapa Hriatuanoh khata Assam tawhta Arunachal Pradesh ngaipa ta a zaw ta, he tawh rakhana heta atanoh taihta a yna chybia pahno khao leipa ta, a lei hapa a châ.

Indian Air Force chata noh 6 chhôh tlai thapi phiapa ta tlua pazao lymâ ei ta. Châhrasala he thâtih pachhuahpanoh hai no taihna heta he zawtheina, An-32 Zawtheina he a yna chybia rai pahno thei mâh vei ei.

Defence PRO, Wing Commander Ratnakar Singh, chata Pachyhnoh khata Air Marshal RD Mathur, AOC-in-charge, Eastern Air Command, chata he zawtheina yna chybia a rei theipa maih cha, biedopa a châ khiahta cha Rs 5 lakh piepa ama châ aw, tahpa a phuah, a ta.

Air Marshal RD Mathur chata, ahyrai zawtheina yna nata, a thâtih a pahnosa theipazy châta bie a chho theina nuhby chhao he hawhna heta a tawhpapua hra - 0378-3222164, 9436499477, 9402077267 nata 9402132477 liatazy chho theipa a châ.

Zawtheina lei hapa tluatuhpa, IAF chata nohkhih pha tu leipa vâta hlaotlohna atanoh taihta hmô mâh leipa ei ta. He zawtheina a leina dâh he no-âh â chhih kaw.

Russia taopa, AN-32 transport zawtheina he târi 3.6.2019-pa khata Assam liata Jorhat tawhta dawn 12.27pm ta Mechuka Advanced Landing Ground, Shi-Yomi district, Arunachal Pradesh ngaipa ta a zaw ta. Zâlâ dawh 1 pm tawhta deikua alei lâ tawhta bie a chho theipa châ khao leipa ta, a yna chybia chhao pahno thei khao lei awpa ta a lei hapa a châ. He zawtheina liana heta hriatuhpa 8 hleikhôta, mohropa 5 ama kiah.

- NDTV