Copa America 2019 : Messi châta Copa America Nyungiapa a lei ha heih!

Gabriel Jesus nata Roberto Firmino ta goal kha rairie khôpa ta, atamy Hriaheihnoh my ta Copa America 2019 Semi Final akhaihna liata, Brazil ta Argentina cha 2-0 ta Belo Horizonte tlyliah liata pahniepa ta, Final amâ ngia haw.

Manchester City forward Jesus heta minute 19-na liata hmia a sahna za khô ta. He he midfield liata Philippe Coutinho nata Dani Alves zy ta â ngia kawpa ta ball amâ hriahrâpa tawhta, ball a vy lymâpa cha Firmino phei thaby liata tlapa ta, he he Firmino heta Jesus kei pie pachhuahpa ta, Jesus heta Estadio Mineirao liata Brazil zawpi thaphana pyury parosa via awpa ta Goal lâta a pachâsa hapa a châ.

Argentina heta he he achhypalie achhuahpa ta Jesus nahta Man City liata akhaihpa, Argentina Forward Sergio Aguero ta 1^st Half chhâna lâchhâh liata a luh ta ball a za supa cha, vâduachhih kawpa ta kao a pakhâhpa khai ta, 2^nd Half liata Lionel Messi ta kao tôh a chapie thlu hra.

Argentina heta ama theina zydua papuapa ta ama opapa, Football khizaw liata amâ iekhyh chaipa Brazil tei ei ta, anodeikua Brazil he tlao chi amâ chhih via lymâ. 2^nd Half liana pyly heta Aguero cha Brazil kao kiahpâh liata Dani Alves ta papao ta, Argentina heta Penalty ama hmô khiahma tah awpa a châ nota hmô vei ei. Minute 71-na châ ta, Brazil heta eikhapi ta Argentina kao kaw chaby heihpa ta, Gabriel Jesus pyly a luah heihpa ta, ta ano khota goal a khô thei thlâh hapa cha sasyh kyh a pachâna mypa ta, Firmino kei piepa ta, Firmino heta a naosia kawpa ta Brazil goal 2-na nata ama tlôna a za khô hapa a châ.

Argentina heta Brazil kao chho awpa ta Angel Di Maria, Giovani Lo Celso nata Paulo Dybala zy cha dyuchhai tawhta za pangiasa khai taraw hra ei sala, Brazil he a chhâna taihta â icha kawpa ta a duahpa ta, pahniena ama to hapa a châ.

Brazil heta Semi Final hropa liata akhaih awpa - Chile nata Peru liata atlô viapa cha Abeipanoh khita Porto Alegre liata Final amâ khaih khei aw.