CWC 2019 : New Zealand Bowler-zy hmiakô liata India Batsman-zy a duah parei thei vei ei!

Pakhynoh ta ICC Cricket World Cup 2019 Semi finals hmiatua viapa akhaihna liata, New Zealand chata Cricket hrukheipa râh, India cha Run 18 ta pahniepa ta, World Cup final amâ ngia. Old Trafford, Manchester, England liata Cricket World Cup 2019 Semi final akhaihpa he, Hriaheihnoh khata akhaihpa châ ta, New Zealand ta ama pazei ngâkaw nota, vâ a suah hapa vâta Pakhynoh khata amâ khaih pazao ha heihpa a châ.

New Zealand heta pazei tua via ei ta, a pie pha tu vei ei. Nohkhih pha lei kawpa ry liata Run 239 deita tao ei ta. He he One Day Cricket, Over 50 akhaihna liata cha Target hluh kawpa ta rei thei awpa châ tlai vei.

Châhrasala, pachâ pha leipa hmo tlôpa ta, New Zealand ta Run 239 ama taopa he, khizaw liata Cricket thaipa râh, kô 2011 ICC Cricket World Cup Champion, India ta pazei papua thei vei ei.

India heta Run 24 deita ama tao nota, Batsman 4 amâ pahlei hmâ ha. Run 92 ama tao nota, Batsman 6 amâ pahlei hmâ ha heih. Ravindra Jadeja nata MS Dhoni-zy apakaohpa cha bâhta ama tlyuh via hra. Partnership run 116-tlai tao aw ei ta, India châta hnabeiseihna ama kaw tao kaw.

Fielding nata Bowling liata New Zealand châta a hnykhaw kawpw, Jadeja heta pazei pha kaw ta, châhrasala, India ta tlô awpa ta ball 18 tawhta Run 37 deita amâ ngiah ha bâ tahpa liata, Jadeja heta Trent Boult ta ball a vaw vawpa ziza liata pazeipa ta, Black Caps captain Kane Williamson ta vaw patupa ta, Jadeja he run 77 taopa ta a pua ha hra.

MS Dhoni ta India hnabeiseihna chaba pazao heihpa ta, châhrasala ano chhao he Over 48-na liata Martin Guptill tawhta 'Run-out' ta a pua ha heih hra.

Dhoni a pua raohpa ta India hnabeiseihna leipâ ha hra ta; Dhoni hnôh lâta a zâ ngiapazy cha movi hlâ likahta liata pua lymâ ei ta, New Zealand ta pahniena topa ta, Final amâ ngia hapa a châ.

New Zealand heta atanohta England nata Australia akhaihpa liata a tlô viapa Final liata ama hmiachhy aw.