A i zaopazy ta ama puhpa kô 57-ta uhtheipa paw pakha ama nie!

Texas, USA liata paw pakha cha thla vâro chhôh a yna chybia pahnopa a châ khao lei tawhta, atliata liana khata a i zaopa 18-zy ta  ama nie khai ha, tahpa Police Department ta ama phuah.

Thohna lâ tawhta mopasiatuhpa, Medical examiner-zy chata zâkhahnia Hriaheihnoh khata, I ie liata rubypa ama hmôpa cha DNA mohpasia ei ta, cha i ie liata rubypa ama hmôpazy cha thla vâro chhôh a lei hapa hawhta ama pahnopa – kô 57-ta uhtheipa, Freddie Mack, ru tlai a châ tahpa ama hmôpapua, tahpa ta Johnson County Sheriff's Office chata ama phuah.

Johnson County Sheriff Office liata Deputy Aaron Pitts chata, i chi nano nanopa 18-pazy ta ama puhpa Freddie Mack he, a chy nata sia, a sâ zy taihta chhao pahlôh leipa ta phie nie khai ha ei ta, ama ie tawhta ama puhpa rubypa ama ie papuapa deita cha a laibâhpa a châ, a ta.

Pitts ta Associated Press a chhona dâhta cha, "He hawhta I zy ta chyhsa sapa/pôhpa zydua a laibâhpa y leipa phie ama nie khai hapa thâtih he pahno beih ma pi," tahpa ta, "A ruzy chhao he phie ama cha-eih padipa hleikhôta, ama pakeipazao pahnie kaw" a tah hra.

He i 18 zy puhpa, Mack he pasana a khiakhi kawpa a hneipa, hnatlâna pha tu leipa châ ta, a pasana vâta a thi tawhta ma a i zy heta ama nie ma, a hroh thlâh hana chôta siesao ei ta ma, ama nie ma, tahpa deikua pahnopa châ vei. Sheriff Adam King ta cha,"Ama siesaopa chhao ta, ama sie sao leipa chhaota, he hawhta I ta chyhsapa a nie khai thlâh hapa he hmo rarô y kawpa a châ” a ta.

Atakô Patô thlâpâ liana khata, Mack chhôhkhazy heta Mack he a pahrâna khih, chyhsa 4000 hlâta chyh viapa yna Venus liata a pahrâna O tawhta a yna chybia pahno khao lei awpa ta phie a lei ha, tahpa Police hnohta report ei ta. A chhôhkhanah reina dâhta cha Pachawh thlâpâ tawhna khata Mack thâtih he khâpa hmahta thei khao vei ei, ama tah hra.

Police zy ta Mack pahrâna O a ngia awpa amâ chhuahnohna chhao heta, a I pasapa a hrâh kawpazy vâta thlaita a ngia thei leipa ei ta; hmohropa hmâpa ta I zy he ama dôvei tawhta O chhôh he amâ ngia thei hapa a châ.

A pahrâna O nata a chheihpâh zy liahsa ama tlua tawhta chhao Mack he hmô pyly leipa ei ta. A O kiahpâh, sipo hryta I ie ama hmôpa liana chata chysia cha-eih padi chiehpa nata chyhsapa sâ hleikhôta, ru bypa hmô ei ta. Cha rubypa ama hmôpazy cha University of North Texas Center for Human Remains Identification, lâ achupasia awpa ta paphao ei ta. Ama vaw mohpasiapa cha, Mack DNA nahta âvaw lyu hapa vâta, Mack cha a i zy ta ama nie hapa a châ hih, tahpa ta bietluna ama tao hapa a châ.

Pitts chata I 18 hryta 2 cha i hropazy ta siesao ei ta, i hropa 13 zy cha amâ hrâh tu hapa vâta thiepa châ ei ta; 3 hropazy cha chyhsa ta amâ la (Adopt) awpa ta sopa ama châ, a ta.

Police zy reina dâh liata cha Mack heta a i zy he khâsia pha kaw ta, pati chhao a pie pha kaw ei, ama ta. Kô 2017 liana khata Mack heta Thohna-O bie avaw chhopa ta, a I zy hnatlâna mohpasia awpa ta âvaw haw ha hra ei

Mack heta a I zy he kyh a pachâ kawpa ta â lâ ta; hiahrihna a ypa deikua cha, khâpa vâta he tluta a i zy kyhpachâtuhpa he a i zy ta ama nie heih tlô?.