Pasana chichhihpa Japanese Encephalitis vâta Mizoram sawhkhâ ahrohrua!

Aizawl : Atahmâhlâ ta Assam nata Bihar liata pasana hri a charei haipa, chyhsa vâro tlaita hrona ama pahleina chhâpa, ‘Japanese Encephalitis’ (JE) chôchâh liata Mizoram sawhkhâ chata ahrohrua awpa apachuna siekhei awpa ta hmahlana a hnei pathao hai. Mizoram State Opa, Assam liata cha he pasana, thlohmiah siepa tawhta a hiezawhpa vâna heta chyhsa vâro tlaita hrona ama pahlei hai.

Sawhkhâ biehnawh ngâtlâh a châ kawpa ta a palâsana dâh liata, Mizoram State opa Assam liata he pasana charei haipa chôchâh reipahmaohpa châ ta. He pasana tawhta Mizoram state zawpi zy amâ boh thei n’awpa ta apachuna nata achhihthana siekhei n’awpa dâh reipahmaohpa ta Hriaheihnoh khata Dawhtyzy amâ tyupahmaoh.

He atyuhpahmaohpa heta, Japanese Encephalitis pasana he Mizoram liata hmôpa a châ mâh taraw leipa ta, zawpi abohna nata he pasana â hiezawhna tawhta eimâ vaih thei n’awpa ta apachuna nata nah-apavâsana (Awareness) hnei awpa â ngiah hmeiseih, tahpa ama rei.

Dawhty atyupahmaohpazy heta, a kawh thei chaina hawhta he pasana chôchâh liata nah-apavâsana (Awareness) hnei awpa nata, he pasana a hneipazy tlua papua awpa ta hmahlana châta, pangiasa viapazy thisaih mohpasiana hnei awpa ta bie ama pathlu. Atahmâ duasu liata Mizoram liata JE pasana hri a hneipa he hmô papuapa y mâh vei ei.

He hawhta a châ nona heta, eima opa State, Assam liata cha he pasana vâna heta chyhsa 57 thi ha ei ta, chyhsa 234 ta he pasana he ama hnei tahpa hmôpapuapa châ ha ta, District 26 district tlai cha he pasana heta a rô ha bâ.

Japanese encephalitis he ‘flavivirus’ ta a tlôkheipa châ ta, chyhsapa nata sahroh/râhsa ta ama hnei raihrie thei. He pasana hri he thlohmiah ta he pasana hri a hneipa râhsa/sahroh a siepa tawhta a hiezawhpa châ ta. Thlohmiah chi kha, ‘Culex mosquito’, Mizoram liata hluh kawpa he he pasana hri a hiezawhtuhpa pha chaipa thlohmiah zy ama châ hra. He pasana âlâpapuana dâh cha – Luh pasapa, chasi a sâh kawpa tawhta â lâpapua tyh.