JSA : India râh liata Ti rairuna District 256 hryta Siaha District â hlao hra

Siaha : Pohbienoh my dawh 11:00Am khata DC's conference Room, Siaha liata ‘JAL SHAKTI ABHIYAN( Water Conservation Campaign- Ti ativy awpa ta thapi phiana)’ pahyna Siaha liata hneipa a châ.

Photo : Lalsanglur, Central Prabhari Officer for JSA leg Economic Adviser, Ministry of Chemical and Fertilizer, Gov’t of India nata Siaha DC, Bhupesh Chaudhary, IAS

Siaha liata he hmahlana, JSA pahyna apakhyna he Puhpa Lalsanglur, Central Prabhari Officer for JSA leg Economic Adviser, Ministry of Chemical and Fertilizer, Gov’t of India, Puhpa Manik Chandra Pandit, Deputy Secretary,Ministry of Rural Development nata Dr.Sanjay Kumar, Scientist E, National Institute of Hydrology zy sahlaota hmâpa a châ.

JSA he India râh liata Ti rairu viapa district 256 atlyhpapuapa zy liata siekhei awpa ta hmahlana châ ta. Mizoram state tawhta Siaha District he JSA hmahlana ry liata y awpa ta atlyhpa a châ hra.

JAS hmahlana he Phase no (2) lâta siekhei awpa châ ta.  Phase-I na he Monsoon avaw tlôna lâta vâsua a daopa State nata UT-liata zy Khihpa noh 1 tawhta Thlarâh noh 15 chhôhta hmâ awpa châ ta. Phase-II he Monsoon â liena lâta vâsua vaw daopa State nata UT-liata zy Phiata noh 1 tawhta Phiapi noh 30 chhôhta siekhei awpa a châ aw.

JAS he District nata State liata concern official zy nata Central sawhkhâ liata Officer nata  Scientist zy nahta  hriaparaohpa ta siekhei awpa châ ta. JSA siekhei n’awpa nata siekhei n’awpa dâh ‘targeted intervention Point 5’ taopa ama taopa zipa ta hmahla awpa a châ aw.

Siaha DC Puhpa Bhupesh Chaudhary IAS ta chhao he point 5 azipa ta, JSA hmahlana siekhei awpa ta Siaha district â chhuahnohna dâh nata hmiasai zy Power point presentation hmâpa ta a pamosa hra.

Puhpa Lalsanglur chata  JSA he Prime Minister pet project châ ta, Dept.of Drinking water and Sanitation(DDWS) ry liata Ministry nano nanopa hriaparaohna ry liata siekhei awpa a châ, tahpa ta Siaha district ti liata â tivy theina awpa ta hmahlana liana heta  thapi phiapa ta sawhkhâ baokhâ awpa ta Siaha district zawpizy â hawpâ hra ei.

DC conference room, Siaha liata JSA hmahlana awpa pahyna daihti hmâ khaipa a châ tawhna heta PHED tilana hnawh (Gravity system) Tlâhpi liatapa cha tlypa ta, Central Prabhari Officer Puhpa Lalsanglur nata a team zy heta JSA hmahlana pathaopatôna châta thodaw ama loh pâ hra.