Mara satlia BLACK CAT COMMANDO

Mara satlia India pheisaih phapa Black Cat Commando eima hnei

India râh liata pheisaih phapa nata India sawhkhâ ta â palaikheipa, 'BLACK CAT COMMANDO' liata Mara satlia ama vaw y thlâh ha hra. Hmiakai â chhih ngaita kaw!

A thâtih eima rei awpa, Marasaw hryta 'BLACK CAT COMMANDO' hmiatua chaipa K.T. Chozah he puhpa V. Chozah sawchapaw châ awpa ta târi 2/3/198? khata vaw pih ta, Siaha College Vaih liata a pahrâpa a châ.

Black Cat Commando  akaw châ laihna dâh :

K.T.Chozah he, kô 2005 khata Assam Rifles Football team liata a ngiapa ta, kô 2012 liana khata, Detective team lia a roh patloh heih ta, he team liana heta, August 2016 taihta a hria.

Nagaland liata ama post nota, 'Black Cat Commando training' awpa ta, NSG lâ tawhta hruana dao ta, a khoh kaw tarawpa ta ngiarohpâ kaw ta, chãhrasala  'Black Cat Commando training' he ngiaroh kawna chôta, August thla chhâna lã kô 2016 khata training-na supipa Haryana (Maneser) cha a za tlô haw hra.

KT Chozah Black Cat Commando Training ama hneina chôchâh cha hetana heta a rei -

"Eimâ training chhôh he thla 3 ngâlâh hmahta châ hrasala, a rairu kaw ta, rairuna hluhpi chhao eimâ tyh hra. Eimâ training nota ei phei chavei lã hmah phao haw na ta, eima training instructor hnohta chhuti hiah na ta, eimâ test nawpa daihti â hnia hapa hnaihta chhuti awpa na pasaih leipa ta. Ei palôhrupa ta a test awpa cha ei siepahlie lei tlamaw aw tahpa chipà kawna chôta thohna zy vaw nie na ta, a zie chhao a vaw y via ha hra. Eima training kha avaw rairu kaw tlaina a châ ei aw, chyhsa 272 a training pi ta, 82 ngàlâh eimâ training papua".

Black Cat Commando châ awpa ta atlyhpa a châ haw!

He hawhta palôhru ngia a ryh leipa nata chihu pâ kawna chôta a thlâh ha nota, ama Test result cha vaw pua ta, Black Cat Commando châ awpa ta December 17, 2016 lia khata atlyhpa a vaw châ ha hrapa a châ. Atahmâ he KT Chozah he Alpha Team liata a y hai.

He hawhta Marasaw  'Black Cat Commando' eima hnei theipa he a palaikhei hmeiseih pi ta, a sie laih n'awpa liata chhao khokheina a sâh chaipa eima hlà.