NCFC ta SDFA CUP 2019 nyungiapa ama chalo

Siaha Local Football liata club pahreihpa miano, New Colony FC nata FC College Vaih ta SDFA Cup 2019 Final liata akhaihna mophapa Siaha zawpi pahmôsapa ta, SDFA Cup ei 3 a vaw chalo hapa, FC College Vaih cha New Colony FC ta 2-0 ta pahniepa ta, SDFA Cup nyungiapa cha, a eikhana awpa ta New Colony vaih lâ â di ha hra.

Atliata FCCV tawhta NCFC ngaituhpa, Coach Ng.Beirôna ta Club 2 a mohôh chhôhta SDFA Cup nyungiapa ei 4 a chalo ha tahna châ ta, a hlaotlohna he a rônah hmeiseih.

SDFA Cup 2019 pathaopa a châ hlâta achhuahnohna pha kawpa a hneipa nata, 'Transfer Window' hmâh phahnaituhpa, New Colony FC ta Final liata ama pahniepa, FC College Vaih Coach, Ng.Beirôna ama lapangia pasu kaw. Ng.Beirôna raohpa heta FC College Vaih player phapa 5 rachhôh tlai lapangiapâ ei ta, âmo sahlao he NCFC ta Final amâ ngia theina lâthlôh liata nata, SDFA Cup ei thôh a chalo theipa, FC College Vaih ama pahnie theina lâthlôh liata ama phahnai ngaita kaw.

Siaha khihpi liata vaih laipa miano, Football liata a iehkhyh kawpa nata, amâ hmiachhy ha chiehpa liata ziza a hnei kaw tyhpa NCFC nata FCCV akhaihna he a mopha ta, a mohtuhpa zawpi chhao ama hluh ngaita kaw.

Daihti pathaopa a châ tawhta Club mianopazy ta tlyliah liata a chatôh thei rairie kaw ei ta; cha nota Player hnei pha viapa tah thei awpa NCFC ta FCCV he ama chadie hluh via tah thei awpa a châ. Tlyliah liata Player hnei pha viapa ama châna cha NCFC ta palâsapa ta, N.Chhuarôna nata K.Ngâchhi ta goal 1 rairie khôpa ta, he he daihti chhâna taihta pabohsapa ta, NCFC he 2-0 ta tlôpa ta, SDFA Cup 2019 nyungiapa amâ dikhei hapa a châ.

NCFC Captain, ama goal a bohna nata thlalôhna, SN Hmasie cha 'Best player' ta atlyhpa châ ta, Best GoalKeeper châta NCFC Kaovaihtuhpa Tochhua atlyhpa a châ hra.