India Finance Minister parohpa P.Chidambaram ama patu
India finance minister parohpa Palaniappan Chidambaram cha
nieparuna nata arulâ ta phusâ pasopakhypa (corruption nata money laundering)
biebuapa hmâpa ta patupa a châ.
Finance Minister parohpa he Foreign Minister a châ nona khata, râh
hropa company zy ta India râh liata sôh ama palie thei n’awpa ta thlyuna
(bribes) a lapa hawhta baipa châ ta, amâ vaw laichadai hapa kha a châ.
Kô 73 ta uhtheipa a châ ha hrapa Chidambaram, deikua heta he ama
baina zydua he a dytha. Congress party chhihthatuhpa hlôpa nata kô 1984 rawhra
MP a vaw châ lymâ hapa he Home Minister chhao a vaw châ ha hrapa a châ.
Chidambaram he Pakhynoh khata Central Bureau of Investigation
(CBI) khata ziza a tymâ kawpa hryta patupa châ ta. Media chyhsazy ta ama patu
nona heta ama bylyu ngaita kaw.
Hriaheihnoh zâ khata CBI lâ tawhta Chidambaram he a pahrâna O
liata bie hiahrih awpa ta kei ngai ei ta, anodeikua Home Minister parohpa heta
O liata y vei, tahpa avaw chho ei.
Ama patu hlâta liana khata, Chidambaram heta Delhi High Court ta ‘Bail’
pasaina ama pie kholeipa chôchâh liata Supreme Court lâ tlôkhei ta. Ano vyuhpa
ta a duahpa Dâhpahnopa chata, Bharatiya Janta Party-sawhkhâ chata Politics
liata phuhlana châta Chidambaram nata a sawchapaw, Karti, cha biebuapa ama
taopa a ta.
Chidambaram he Finance Minister a châ no, kô 2007 liana khata râh
hropa company zy cha INX Group liata sôh, thysâh hluhpi soh thei awpa ta â do
lei kawpa ta a taopa hawhta baipa châ ta. A sawchapaw, Karti Chidambaram chhao
he INX Group athôhna tawhna heta sôh a dao hrapa hawhta baipa a châ hra.
Chidambaram sawchapaw, Karti Chidambaram he Congress party MP a
châ haipa châ ta. Ama pawsaw heta CBI nata Enforcement Directorate (ED), zy
heta sôhthih kyh liata amâ vaw laichadai ha tyhpa ama châ hra.
No comments