Pakistan ta J&K chôchâh International Court of Justice tlôkhei a chhuah

Pakistan chata Kashmir buana chôchâh cha International Court of Justice (ICJ) lâ a tlôkhei aw, tahpa a phuah ha heih.

Jammu & Kashmir chôchâh liata India sawhkhâ bietluna khata Pakistan palôh patlâh thei leipa ta, China siepahliepa ta UN Security Council liata a tlôkhei tawhta, ICJ lâ a tlôkhei aw, tahpa ta bie nata hla a hnei ha heih. Article 370 phiepa a châ rakha tawhna khata Pakistan heta India nahta ama likah liata sôhpaliena (trade) nata a siepahliena (transport) pachhâsa ha ta, India vyuhtuapa a papua ha hra.

Hriaheihnoh khata Pakistan Foreign Minister Shah Mehmood Qureshi chata, "Kashmir chôchâh he International Court of Justice hnohta tlôkhei awpa ta bietluna eima tao ha," tahpa ta, "He bietluna he dâh nata phôh kao nano nanopa tawhta eima sai tawhta a taopa eima châ” a tah hra.

He hleikhôna heta Pakistan Foreign Minister heta, “Muslim hluh chaina Kashmir buana kyh ICJ liata eima tlôkhei awpa liana heta, chyhsapa adona tovyuh paraopa ta a ypa cha a lai via chaipa a châ aw” a tah.

He hawhta a châ nona heta, British Prime Minister Boris Johnson chata India Prime Minister Narendra Modi hnohta Kashmir buana cha Pakistan nata India buana châ ta, râh nopazy ta adaohna siepahliepa ta ama pathlâpazi awpa a châ, tahpa phone siepahliepa ta a chho hra.

French President Emmanuel Macron chhaota Kashmir chôchâh he PM Modi nahta atahmâ hâta chhôhta Paris liata amâ hmô tita a reikhei hra aw.

Thâtih thieh chaipa liata cha, India sawhkhâ ta Kashmir liata kohkina a siekhei haipa cha pathlâpazi via lymâ hapa châ ta; nohto khihsana chhaota zie-yna lâ a ngai pathao hapa hawhta India Today chata a palâsa.