Pakistan ta India vyuhtuapa papua

Jammu & Kashmir chôchâh liata India sawhkhâ hmahlana dâh vâta Pakistan a palôhtlâh thei leipa ta, zâhnia (Pakhynoh) khata Pakistan liata India vyuhtuapa, India High Commissioner cha Pakistan tawhta pua awpa ta tahpa ta, India nata Pakistan likah liata sôhdaohna zydua chhao a pachhâsa, tahpa a phuah.

Atahmâ hâta Hriatuanoh liata India sawhkhâ ta Kashmir mohôhna dâh, India Dâhpipa liata Article 370 nata Article 35A a phie tawhna khata, Jammu & Kashmir cha kohkina a icha kawpa ry liata soh pazao lymâpa châ ta. Internet nata Mobile zydua chhao pachhâsa lymâpa a châ hai hra. He hleikhôna heta India pheisaih vâro ta Kashmir state chhôh su nano nanopa ama khâsia pazao lymâ hra.

Sawhkhâ ta kohkina a icha kawpa a siekheina hryta palôhtlâhleina palâsana nata alô ta India pheisaihzy tlahnaona biethâh thei awpa y hai ta. India râh su hro lâta a y haipa Kashmiri chyhsazy chata ama chhôhkhanah bie a chho thei leipa ei ta, khâpa thâtih hmahta Kashmir tawhta pahno thei vei ei, ama ta.

Ama râh chhôh bo kha hawhta Kashmir khâ â vaw chhu tyhpa, Nuclear chhaichhi a hneipa raihrie, India nata Pakistan – zy he ei hluhpi cha Kashmir vâna heta avaw dyuh ha ei ta. Atakô Hmypi thlâpâ liana chhao khata adyuh thei awpa duasu liata ama likah ziza a vaw y ha heihpa kha a châ.