Premier League : Pachyhzâ akhaihna liata khâpa hmo zy e tlô?

Uefa Super Cup champions Liverpool ta pahniena to pazao heihpa ta, Southampton cha St Mary's tlyliah liata ama kei pahnie.

Liverpool châta Sadio Mane ta 1st Half chhâ chyta liata hmia amâ sahna khô ta. 2nd Half liata Roberto Firmino ta goal kha vaw khô heih hrapa ta, 2-0 ta pahniena ama to awpa a za lyu kaw bâ nota, Minute 83-na liata ama kaovaihtuhpa Adrian ta taochheipa zawzi ta, Saints lâ tawhta Liverpool player parohpa, Danny Ings ta goal kha za khôpa ta, Liverpool heta 2-1 ta pahniena ama to hapa a châ.

Pachyhzâ zârei lâta Premier League champions Manchester City nata Tottenham zy 2-2 ta amâ pahniethaina akhaihna liata deikua ziza â sâh kaw. Etihad Stadium, Manchester City tlyliah liata club pahreihpa rairie tah thei awpa akhaihpa liana heta, daihti chhâ chy, daihti piechhipa liata Gabriel Jesus ta City tlôna goal châ thei awpa a khôpa cha, video assistant referee (VAR) ta â pyh leipa ta, ziza â sâh kaw. Kô 2018 rakha tawhta Man City ta ama tlyliah liata Point 1 deita ama hlaopapua ha hra.

Raheem Sterling ta a luh ta a supangiapa hmâpa ta City ta hmia a sah ei ta, châhrasala he he Erik Lamela ta â hlapâ thlâh hapa tawhta za khôpa ta, â kaw pasu ha heih. City goal 2-na he Sergio Aguero ta a khôpa châ ta; he chhao he a zâ ngia thiehpa, Lucas Moura ta a zâ pasu heihpa ta, 2-2 ta amâ pahniethai hapa a châ. City tlôna goal châ thei awpa ta, Gabriel Jesus ta daihti piechhipa liata za khô ta, châhrasala he goal he VAR ta mohchaneipa châ ta, Aymeric Laporte ku liata ball ta a veipa vâta a pyhpa châ khao vei.

Season pathao zâ liata Liverpool ta 4-1 ta ama pahniepa, Norwich City châta Teemu Pukki ta 'hat-trick' taopa ta, Season hmiatuapa liata 'Championship Division' nyungiapa chalotuhpa Norwich City ta Newcastle United ama pahnie.

Norwich City Striker Teemu Pukki heta Premier League khaih no liata goal 4 a khô ha bá tahna châ ta, Liverpool ta 4-1 ta ama pahnie nota Norwich goal a y chhôhpa kha ano khôpa a chã. Pukki heta 1st Half liata a goal khana heta â ngia kawpa ta pazei pangia ta, 2nd Half liata goal no za khô chhi heih ta. Magpies châta Jonjo Shelvey ta za khô taraw hrasala, 3-1 ta Norwich City ama tlô.

Season hmiatuapa liata Premier League akhaih thei awpa tluana, 'Play-off' liata vâhneipa, Aston Villa ta Premier League liata pahniena hmiatua chaipa to awpa ta tei via chy lymâ ei ta, anodeikua Bournemouth hmiakô liata 2-1 ta pahniepa ta ama y ha heih.

Brighton ta Amex Tlyliah liata ama Player lapangia thiehpa, Leandro Trossard zawzi ta West Ham nahta point 1 rairie amâ rai. West Ham heta Javier Hernandez goal khôpa hmâpa ta hmia a sah tua ei ta; châhrasala he goal he Seagulls lâ tawhta nopi noh player a pasiena daihti liata ama lapangiapa, Leandro Trossard ta a zâ pasupa ta, 1-1 ta amâ pahniethai hapa a châ.

Everton châta minute 10-na liata Bernard ta goal a khôpa cha, Watford ta a kaw pasu thei khao leipa ei ta, 1-0 ta Everton ta pahniena ama to.

Pachyhzâ ta akhaih tua chaipa, Burnely nata Arsenal akhaihpa liata, Pierre-Emerick Aubameyang ta pahniena goal khôpa ta, Arsenal ta Burnley he 2-1 ta Emirates Stadium liata ama vaw pahnie.

Arsenal heta Alexandre Lacazette goal hmâpa ta hmia a sah ei ta, he he Ashley Barnes ta 1st Half chhâ hlâta Burnley châta â zâ pasu ta, 1-1 ta 1st Half ama pachhâ. Châhrasala 2nd Half liata Aubameyang a vaw luahpa ta, 'Gunners' tlôna Goal a za khô hapa a châ.